Malakay 1:11 - Udél Dwata: Gna Kesfasad ne Lomi Kesfasad

¹¹ “Okóm yó kem tólóng tau bè dumu benwu, tódô lenwóten bè yó kem benwu fi dmata kdaw kól bè yó kem benwu fi desdef, tey kadat le du yóm dou boluy. Tódô keten benwu wen gel hboo le ebéléu yóm alì tilob boohen ne dsù le ebéléu yóm dsù alì knóón béléu,” udél yóm Dwata laen dù là gbeken du.

Malakay 1:11 Referans Kwoze

Isaya 54:5

Yóm Dwata tehe dmimun kóm, hol lómó kmoen ebéléem hol lómón ke du yóm tuha logihem. Yó kun boluy, duhen yóm Dwata laen dù là gbeken du. Angat lenwaen uu yóm Dwata yó kem tau Israél yóm laen dù belenen. Du se yóm hol kmamal yóm klamangen.

Isaya 45:6

Yó gónóhu mò du yóm ni anì yó, kdéen tau bè klamang benwu angat temngón du ou yóm hol gónó mogot. Laen kô dù dumu Dwata, són o.

Deng Hegfan 5:8

Timbow deng nwahen, tódô lemwót yó kem fat mtulus ne yó kem lewu folò fat tau tuha, gotu le hegluduk bè soluhen. Sket kul mogot heglung ne tukung blówón. Yó kem tukung blówón yó, tódô henok lemen yóm alì minggel boohen boluyen insinsu, yóm gel ntem le ebè Dwata. Yóm gel hboo le ebè Dwata yó, yó hnigaden yóm gel kni yó kem kun tau Dwata.

Matyu 28:19

Yó gónóm mon, mógów ye do ebè kdéen but tau bè klamangen benwu anì baling le tau lemolò do. Bnabtays ye lu hlan ye bè boluy Dwata, yóm Mà tekuy, ne bè boluy yóm Ngaen ne bè boluy yóm Tulusen.

Sikaraya 8:7

Bud ni se udél yóm Dwata laen dù là gbeken du, monen, Tahu dohò se yóm angat kehewau kul yó kem dou tau deng negef le ebè yó kem benwu fi dmata kdaw ne ebè yó kem benwu fi desdef.

Kem Lingón 50:1

Mudél yóm Dwata laen dù là gbeken du yóm sana Dwata hol gónó mogot. Tinoken yóm kdéen tau talak tonok lenwóten fi dmata kdaw kól desdef.

Deng Hegfan 11:15

Ominen mféw yóm ghitu yó kem hógów Dwata, sen-gengu se mungol yóm tey udél gu bè longit, mon le, “Deng hto ne yóm kul kdaw mogot klamangen benwu yóm Dwata gónó tekuy mogot ne yóm kun Misaya. Ne laen kô dù sónen yóm kkamalen yóm klamangen yóm kun Misaya yó.”

Kem Lingón 141:2

Henmóyóem yóm knihu, mò henged boo tilob ntemu ebéléem. Ne yóm kehdau sigelu eta, mò henged dsuu ebéléem ke kimel.

Kem Lingón 67:2

anì yó, angat tngón le se kul yó kem tau bè klamangen benwu yóm kóyóem bélê le, ne angat tngón le se yóm lanem hewà kul.

Deng Hegfan 15:4

Uu se yóm kum gónó mogot, laen kô dù tau ke là knikò le kóm, duhen ke là dóyón le kóm. Tek sónen uu yóm laen dù belenen. Angat le gotu mógów ebéléem yó kem tau bè klamangen benwu na le e dóyón uu, abay se deng gotu gfan bè kdéen tau ne yóm tey ktedengen yóm kóm nmò.”

1 Timuti 2:8

Sok ye gel stifun bè simbahan, kóyóu ke logi yóm fen mni, syan ke logi deng hogoten ke Dwata klowilen, ne laen dù tlek lenbuten, ne laen dù gónón seglius bè kem dumuhen.

Flipay 4:18

Duhen yó, ni sii mò lesibuhen yóm kdê deng blay ye do, botong wen lukasen béléu lemwót bè yóm blay ye do yó. Laen kô dù hendeenu ni kmoen ni lemwót bè yóm blay ye dou hlan ye bè Ipafruditus. Ni kem blay ye dou ni, hol lómón yóm gel dsù le alì minggel boohen gel blay le ebè Dwata, yóm dsù gel henmóyóen, ne yóm gónón gel hyu nawahen.

Sulat Pol Ebè Yó Kem Tau Hemtahu Bè Rom 15:16

Yó hmoen do, henbalingen ou tau mò hógów Jisas Krays ebè kem tau là Ju le. Bè yóm kwitu du ebélê le yóm Tulón Hyu lemwót gu bè Dwata, lómón ke ou yóm tau gel demsù ebè Dwata. Yó henged dsù blayu du, duhen yó kem tau là Ju le deng hemtahu bè Jisas. Ne henmóyô Dwata snéen yóm dsuu yó, abay se deng nfunen lu yóm Tulus Dwata.

Sulat Pol Ebè Yó Kem Tau Hemtahu Bè Rom 12:1

Duhen yó, kem dumuhu setwoli, ni alì nalu nawahu bélê ye lemwót bè yóm tey kkodu Dwata tekuy. Hol blay ye ke Dwata dé lówó ye mò henged dsù ye ebéléen, yóm dsù tolo mowil ne tendo gel nmò ye yóm hyu. Ne tey kehyu nawa Dwata du yóm keblay ye du yó. Ke hendem ye yóm kdê deng nmoen bélê ye, tey knóón ke ni se yóm kut nmò.

Kun Snulat Luk 1:10

Yóm igoen mtem du ditu lemen, fen le mdà bè lewaen kul yó kem tey tau wen. Yó nmò le, fen le mni bè Dwata.

Malakay 1:14

“Yóm sotu tau, ke deng hol fasaden dou yóm keblayen du do yóm hol hyu bè yó kem ógófen, okóm mom yó blayen do yóm ógóf wen óngóhen, yóm tau mò kéng yó deng hol tahu golu elem hatay. Kiholen mò du béléu yóm yó, igoen ou se yóm hol geta bè kdéen ne gotu le likò dou yó kem tólóng tau bè dumu benwu,” udél yóm Dwata laen dù là gbeken du.

Sifanaya 3:9

“Bè yóm kdaw yó, tenlesu yóm ksumóng tau anì baling mólós ne anì tódô kdê le tmaba bè yóm dou boluy ne ssotu nawa le lemolò dou.

Sifanaya 2:11

Angat tey sidek kehlikò Dwata kul lemwót bè yóm sulék kegbaen yóm kdê dwata lennged le. Bè yóm kton le du yó kem tau bè klamangen benwu nim ni, angat són ebè Dwata gónó le e tmaba ne tódô ket kul ne sotu tmaba ebéléen bè yóm kul benwu.

Mika 5:4

Bè yóm angat ksut yóm tau mogot benwu yó, tódô mdà lem blóng le, gotu nalaken yó kem kun tau mlan bè yóm kgis lemwót bè Dwata ne mung du yóm tey kegeta boluy yóm kun Dwata yó. Ominen yó kem tau nalaken, balù udì ke wen hemen le abay se tódô lenngeben klamang benwu yóm tey kegetahen.

Amus 9:12

Ne bud gfun yó kem tau Israél yó kem dù tau tebel bè Idom dalang se yó kem tau bè klamangen benwu gel mit du yóm dou boluy. Ou se yóm sana Dwata hol gónó mogot yóm mudél ni ne angat dnohò nmou nim ni.”

Isaya 59:19

Lemwót bè yó kem benwu fi dmata kdaw kól bè yó kem benwu fi desdef, gotu le likò du. Knikò le yóm alì kfasangen. Yó kmoen kul bè yóm kógówen elem blóng le, hol lómón ke dunuk yóm tey él bong, duhen ke mbel yóm hol yéen lenos bong.

Kem Lingón 113:3

Yóm klamangen benwu lenwóten fi dmata kdaw kól desdef, hol dóyón tekuy yóm boluy Dwata.

Matyu 8:11

Ni tódô tulónu kuy. Bè yóm mò ken bong angat nmò Dwata bè longit bè yó kem tau nogoten, angat tey dê tau là Ju le lemwót fi gu dmata kdaw ne fi gu desdef, angat le gotu na a seyón mken bè tu kem tehe fù me Abraham ne Isak ne Jakub.

2 Tisalunika 1:12

Ni se gónón hol megdóyón yóm kun boluy yóm gónó tekuy mogot Jisas, ne dalang se kuy, bud ye megdóyón béléen snéen lemwót bè yóm któbóngen kuy Dwata ne yóm gónó tekuy mogot Jisas Krays.

Kem Lingón 45:17

Lemwót bè nim klingónu kóm ni, là kóen lana yóm boluyem bè yó kem angat lugodem. Yó gónóm mon, laen kô dù tul sónen yóm kdóyón le kóm yó kem tau.

Kem Lingón 48:10

Botong gefet bè són tonok yóm tendo kdóyón le kóm yó kem tau, dalang se któtól yóm boluyem, botong gefet bè klamangen benwu. Yóm sigel kwananem tendo mit kegmò.

Kem Lingón 111:9

Deng hol tahu nsoken yó kem tauhen. Laen dù tul sónen yóm fasaden kul. Laen dù belenen yóm kun boluy, botong wen klikò te du.

Isaya 12:4

Bè yóm kdaw yó, angat le lemingón yó kem tau, mon le, “Hol ye slamat bè Dwata. Hol ye tmaba ebéléen anì tnóbóngen yu. Tulón ye bè kdéen benwu yóm deng gendengen bélê ye. Hol tulón ye kul yóm tey kegetahen.

Isaya 12:5

Lemingón ye ebè Dwata lemwót bè yóm deng tey gendengen bélê ye. Hol heglalag ye bè klamangen benwu yóm tulón yó.

Jirimaya 10:6

Ó Dwata, laen kô dù semnged kóm. Laen kô dù là gbekem du ne tey mfasang yóm boluyem.

Jirimaya 10:7

Tau du se là likò kóm, igoen uu yóm hol geta bè klamangen. Uu se yóm hol knóón bang gónó likò. Bè yó kem tau alì temngón bè klamangen benwu laen kô dù tau semnged kóm. Ne laen kô dù bè yó kem tau hol geta mogot kul ke semnged kóm.

Danyél 2:45

Yó se hnigad yóm botu lemkà bè yóm tey léhék, lómón ke wen kemleng du, bede sundu tau du mò du. Bè yóm kegdeken bè yóm lennged wen bala tóken ne tembagahen ne tonok miketen ne blówón bukayen ne tahu blówónen, gotu lenunahen. Yóm ni, mò gónó Dwata eles heglileb du kóm yóm angat hesuten elem hulin kdaw. Tahu se yóm knahem ne dohò yóm hnigaden.”

1 Tutul Israél 16:25

Tey geta yóm Dwata, tey knóón semdóyón du. Yake wen klikò tekuy du senta yó kem dwata kéng.

Kem Lingón 48:11

Hol hefligalem lu yó kem tau bè Bulul Sayun. Hol hefligalem lu yó kem tau bè Juda lemwót bè ktedeng kkukumem.

Kem Lingón 65:9

Tey kehedemem du yóm tonok, Dwata. Sal gel hkulónem etahen anì hyu, ne anì hol mabù huluhen. Ne senflósem hlel kul yó kem él. Ne wen se kem hulu htowokem te tonok mò hlowil tau, yó se kmoem du.

Kem Lingón 86:9

Kdéen tau bè yó kem benwu deng nmoem, angat le gotu mógów ebéléem, ne heglaan le bè soluhem, Dwata. Angat dóyón le yóm kegetahen ne yóm klaen dù belen yóm kóm boluy.

Kem Lingón 96:8

Hol dóyón tekuy abay se tey minggel boluyen. Mógów tekuy ebè Gónóen, eles tekuy mit yóm mò blay tekuy du.

Kem Lingón 138:5

Tahu se, angat utóm le bè sngal le yóm kun kmò Dwata, abay se tey kegetahen yóm kun keklóón Dwata.

Isaya 19:21

Tódô hegfan Dwata bè yó kem tau Idyip du se hol tahu Dwata. Omin le yó he temngón ke Dwata ne tmaba le ebéléen. Demsù le ebéléen ne wen kem dumu blay le du. Ne wen yó kem tey fasad mget nmò le béléen ne gotu nmò le yó kem fasad le du yó.

Jirimaya 4:2

ne ke tek són bè dou boluy gónó ye hlan du ke wen safà ye ne ke nbut ye mò du yóm hyu, là mò ye kéng ne ndà ye yóm kukum tedeng, ke yó se nmò ye, yu se gónóhu hlan du yóm któbóngu yóm kdéen tau bè klamangen benwu ne angat le mógów ebéléu yó kem tau yó na le e dóyón yóm dou boluy.”

Malakay 3:3

Yó nmoen, nan e myón kmukum. Yó kmò kkukumen, hol lómón ke yóm tau hnò blówón bukay, gotu kóhen ke wen bolen. Hol lómón yó se angat nmoen bè yó kem sfu Libay, nmoen lu tau laen dù belenen. Yó kmoen du, lómón ke lu yóm tahu blówón ne blówón bukay hnoen anì kóhen ke wen bolen, ngangen efet tódô hono tahu duhen. Ke lómón yó, gbek le bud demsù du ebè Dwata yóm dsù henmóyóen.