Kmukum 2:11 - Udél Dwata: Gna Kesfasad ne Lomi Kesfasad

¹¹ Ngangen ne yó kem tau Israél deng mom nmò le yóm kenbê Dwata yóm sana kul Dwata, deng le mom tmaba ebè yó kem lennged yóm dwata kéng boluyen Baal.Là bud le tmaba ebè Dwata yóm sana kul Dwata hol gónó mogot yó kem tehe fù le, yóm Dwata tehe mit kul hewà gu bè Idyip. Deng le mom tmaba ebè yó kem dumu dwata kéng yó kem tau hmilol kul ne mtud le bukol bè solu le. Tey kehefebut le du yóm sana kul Dwata hol gónó mogot.

Kmukum 2:11 Referans Kwoze

Kmukum 6:1

Timbow bud nmò yó kem tau Israél yóm kenbê Dwata yóm sana kul Dwata hol gónó mogot, yó gónó Dwata hemlus kul elem hólól yó kem tau Midyan. Botong hitu halay le kegen le nô lem hólól le

Kmukum 4:1

Kogol katay yóm sotu tau boluyen Ihud, deng bud nmò yó kem tau Israél yóm kenbê Dwata yóm sana kul Dwata hol gónó mogot. Yó gónó Dwata hemlus kul elem hólól Jabin bè syudad Hasor yóm tau hol geta bè yó kem tau Kanan. Yó boluy yóm kmandér bè yó kem sendaluen duhen Sisira tau menwu bè Harusét, yóm sotu syudad yó kem tau Kanan.

Kmukum 8:33

Bè yóm katay Gidyun, là kô le bud hteneb lemolò ke Dwata yó kem tau Israél. Deng le mom tmaba ebè yó kem dwata lennged boluyen Baal. Wen sotu bélê le boluyen Baal-birit mò kul dwata.

1 Bok Kem Tau Hol Geta 18:18

Bnalà Ilaydya se, monen, “Là kóe tau mit sbeweg bè Israél dou, kaem uu ne yó kem fes lówó maem, abay se là kô dog nimón ye du yó kem hlau Dwata, ne deng ye mom tmaba ebè yó kem dwata kéng boluyen Baal.

Kmukum 13:1

Timbow bud nmò yó kem tau Israél yóm kenbê Dwata bélê le yóm sana Dwata hol kul gónó mogot, yó gónóhen hemlus kul elem hólól yó kem tau Flistin ne botong fat folò halay le kegen le nô lem hólól le.

Jirimaya 9:14

Mom yó nmò le, hgel le kulu le ne tmaba le ebè yó kem dwata lennged boluyen Baal, yóm deng hlolò le kul yó kem tehe fù le.

Jirimaya 2:23

Okóm yó gel udél ye, ‘Kéng yóm monem yó. Là kô me gel tmaba ebè Baal se kum.’ Okóm hnénég ye dé yóm deng nmò ye ditu bè sbong. Hol hendem ye yóm deng nmò ye bè yó. Bè yóm kektes ye yó kem dumu dwata, hol lómón ke yu yóm kamél libun móyô logi, sónmoen mlóy sembeweg mebel tô lanen.

2 Tutul Israél 33:6

Nim Manasi ni, balù ngaen botong gbeken hkekeb du bè Datal Hinom mò dsuen. Deng mom dmalang gel hmayam, ne hemgawang ne tmaba ebè tulus seitan ne ebè mton bù ne gbeken tódô temsob moluy. Yóm kdê nmoen yó, tey sidek kehebuten ke Dwata.

1 Samwél 7:4

Tahu se, gotu kó yó kem tau Israél yóm dwata lennged boluyen Baal ne Astarti. Tek són Dwata bud gónó le e tmaba.

Tekang Kbuten 38:7

Okóm yóm Ir, nmoen yóm tey sidek bè kton Dwata du, ne yó gónó Dwata ma klowilen.

Tekang Kbuten 13:13

Yó kem tau bè Sodom yó, hol kem tau gónón smala sidek, kem tau alì gemsalà bè Dwata.

Dwata 31:16

Yó mon Dwata mò ke Musis, “Bang kukol towokem ne. Kesoki deng matay, là kô le bud teneb béléu ne yó kem tau ne angat nulé le yóm deng senfasad tekuy. Tódô knogol le ou ne tmaba le ebè yó kem dwata kéng yó kem tau nô ta yóm tonok móyón hnusek le.

Kmukum 6:25

Bè yóm kifu yó, yó bud mon Dwata mò ke Gidyun, “Nwahem yóm gewu safì tudu maem deng hitu halayen. Genbaem yóm gónó maem gel demsù ebè Baal ne nofokem yóm hehek ilô yóm dwata libun boluyen Asira mdà klohoken.

1 Bok Kem Tau Hol Geta 22:53

Gel tmaba ebè Baal ne gel demsù ebéléen snéen. Tey kehebuten ke Dwata yóm kul Dwata yó kem tau Israél, lómón yóm kun gel nmò yóm tehe maen.

Nihimaya 9:26

Okóm yó kem tauhem, Dwata, là kô dog nimón le kóm, deng mom kenbê le uu. Knogol le yóm hlauhem kul. Tódô hnatay le yó kem tugodem gel tô mit kul semfulék ebéléem. Ne deng mom nmò le yó kem alì kenbéem.

Kem Lingón 78:56

Baluen ke lómón yó deng nmoen bélê le, sana ktilów le du he yóm Dwata Hol Dandónen Geta. Sana là kimón le du, là móyô le mimón du yó kem hloloen kul.

Lista 25:3

Nbut le bè yó ne yó kem tau Israél yóm tendo kmung le tmaba ebè yóm dwata kéng boluyen Baal bè yó bè Bulul Piyor. Ya tey sidek kebut Dwata kul.

Dwata 4:25

Baluen he ke deng legen knô ye ta yóm tonok blay Dwata kuy ne deng dê kem ngà ye ne kem témê ye, hol bê ye abay gemsalà bè Dwata ke lan ye mò yó kem dwata lennged balù kihu kayen. Ke yó nmò ye, tey salà bong bè Dwata ne tey sidek kebuten kuy.

1 Samwél 7:3

Yó udél Samwél ebè kdê yó kem tau Israél, monen, “Ke hol tahu lemwót lem but blutut ye yóm bud kesfulék ye ebè Dwata, hol knogol ye ne yó kem tólóng dwata lolò ye dalang se yóm dwata lennged boluyen Astarti. Hogot ye ke Dwata klowil ye ne són du nimón ye. Ke ni se nmò ye, angat lenwaen yu lem hólól yó kem Flistin.”

1 Samwél 12:10

Omin le yó bud hkodu mni bè Dwata anì tnóbóngen lu. Yó udél le ebè Dwata, mon le, ‘Ó Dwata, deng me gemsalà béléem abay se deng knogol me uu ne deng me mom tmaba ebè yóm dwata lennged boluyen Baal ne bè Astarti. Okóm ni, ke hol lenwaem mi bè yó kem hohon me ne són uu ne bud gónó me e tmaba.’

1 Bok Kem Tau Hol Geta 11:5

Deng mom tmaba ebè yóm dwata libun boluyen Astarti yóm kul dwata kéng yó kem tau Sidon ne ebè Molék yóm dwata kéng yó kem tau Amunayt, yóm alì kenbê.

Jirimaya 2:20

Yó bud mon yóm Dwata hol dandónen geta, “Ó kem tau Israél, deng tey legen ne yóm kekbê ye dou. Là kô nimón ye dou ne là se kô ye tmaba ebéléu. Tódô ket ta yó kem bulul geta ne ket laan yó kem koyu lembang gónó ye gel tmaba ebè yó kem dwata kéng. Lómó kmò ye dou lómón ke tau mdà yehen.

Jirimaya 32:23

Okóm bè yóm kkól yó kem tehe fù me na le e kwa yóm tonok ni là kô bud nimón le kóm, deng mom kenbê le yóm kóm hlau. Là kô nmò le du yó kem hloloem kul. Yó se gónóm heglumfak du kul nim tey hlayam le ni.