Kem Lingón 7:9 - Udél Dwata: Gna Kesfasad ne Lomi Kesfasad

⁹ Nmoem sónen yóm sidek gel nmò yó kem tau gel mò sidek, okóm tnóbóngem yó kem tau mimón kóm. Uu temngón du, Dwata, yóm nô lem hendem tau ne yóm nô lem but blutut tau, yakà hono tedeng nmoem se kóm.

Kem Lingón 7:9 Referans Kwoze

Jirimaya 17:10

Okóm ou se yóm sana Dwata hol gónó mogot, ou se gel hemklol du yóm nô lem hendem tau ne gotu tonu yóm nô lem but blututen. Yóm ofol blayu du sal lemwót bè yóm deng kun gel nmò.”

Jirimaya 20:12

Ó Dwata yóm laen dù là gbeken du, tngónem se kóm yó kem tau tedeng kmoen, gel henklolem yóm nô lem but blutut le ne nô lem hendem le. Htonem do dé yóm fen kbelesem, yakà deng suu du lem hólólem yóm dou klowil.

1 Tutul Israél 28:9

Ne uu, ngau Selumun, yake holi setngón ke Dwata yóm Dwata yó kem fuem. Hol nmoem yóm hmoen kóm Dwata, ne hol hewótem lem but blututem yóm óyóem hol mimón du. Yakà yóm Dwata yó, gotu tonen yóm nô lem hendem yóm ket tau, ne gotu tngónen yóm kdê atulen ne kdê hendemen. Ke hnebelem Dwata, dohò se ktonem du. Okóm ke tebelem, bud laen kô dù tul sónen yóm kdohò yóm kekbéen kóm.

1 Samwél 16:7

Okóm yó mon Dwata mò ke Samwél, “Béem tenngel yó dum keklóónen logi ne yóm ktahaen, sundu du yóm néléku. Yóm dou kélék là mkélen bè kélék tau. Yóm tau, són olo tonen yóm gfan ta, okóm yóm dou tenngel yóm nô lem nawahen.”

Deng Hegfan 2:23

Tódô gotu hnatayu snéen yó kem tau gel lemolò du. Yó gónóhu mò du yóm yó anì tngón kdéen tau hemtahu béléu yóm klaen dù gebnos béléu, gotu tngónu yóm nô lem hendem le ne yóm dê tô hendeen le. Angat blayu kuy yóm mò balà yóm kuy deng gel nmò, yóm ket kuy na sotu.

Kem Lingón 139:1

Ó Dwata, deng gotu henklolem ne yóm dou kmò, laen kô dù là tngónem du béléu.

Kem Lingón 44:21

kaem deng tngón Dwata ne, yakà gotu tngónen du yóm kdê nô lem but blutut tau.

Kem Lingón 37:23

Yó kem tau gel hefligal ke Dwata, tey tendo gel kesgalak Dwata lan le, ne sal gel nofinen lu.

Kem Lingón 26:2

Tilówem ou, Dwata, hol hen-getem smisif dou. Tenngelem yóm nô lem but blututu, ne yóm nô lem hendemu.

Kem Lingón 11:5

Henklol tenngel Dwata yó kem tau tedeng kmò le dalang se yó kem tau sidek nmò le. Tey kutó nawahen kul yó kem tau alì móyô hemsidek tau.

Kem Lingón 10:15

Tenfokem sigel yó kem tau alì mò sidek. Snoloem yó kem sidek gel nmò le efet gotu genlaem yóm kdê le.

Sulat Pol Ebè Yó Kem Tau Hemtahu Bè Rom 16:25

Hol dóyón tekuy dé Dwata. Du se yóm gembek hol hbegel kuy bè kehtahu ye hlanen bè yóm Tulón Hyu gel nitu gbak ebè Jisas Krays. Nim Tulón Hyu ni, ni se yóm tehe gbuni bè yó kem tau gnan ekni.

Kem Lingón 17:3

Bè yóm kifu deng kauyem dou sóól buteng, deng hensokolem yóm nô lem hendemu dalang se yóm nô lem but blututu, ne laen kô dù sidek tonem béléu Deng hol nô bè nawahu yóm là kegsalau ke mlan bè kudélu.

Kul Nmò 12:23

Tódô sen-gengen se wen hógów Dwata gu bè longit, tódô wen des hegnómen ke Hirod, lanen là madat ke Dwata. Tódô gotu ken kuled tnahihen, ne matay.

Kem Lingón 58:6

Ó Dwata, tenfokem nihi le. Gotu senfékem kakim le, Dwata, ni kem liyun ni.

Kem Lingón 10:18

Nmoem yóm kukum tedeng bè yó kem ngà hikit ne bè yó kem tau hen-gnok anì laen dù bud tau hmikò kul.

Kem Lingón 40:2

Ktengen ou lem yóm tey sidek gónóhu gebeng, lómón ke denge geblos elem yóm helek lebu. Yó nmoen béléu, lómón ke nkayen ou eta yóm tey botu bong, ominen yó he mgel kegnómu du.

1 Samwél 2:9

Gel kenlungen yó kem tau mimón du, okóm yó kem tau mò sidek són le lem gónón kmifu. Laen dù gendeng tau ke mlan bè kun kgis.

Sulat Jud 1:1

Ou se Jud gónón lemwót nim sulat ni. Ou se yóm sotu tau mò tóbóng lówó Jisas Krays, ne ou se yóm twoli Jim. Smulate ebélê ye yu kem tau deng tehe tnaba Dwata. Tey kbong nawahen kuy Dwata, yóm Mà tekuy bè longit, ne tey gel kofinen kuy Jisas Krays.

1 Pitér 5:10

Okóm ke deng legen udì yóm keglayam ye, tey któbóng Dwata kuy. Du se hol hbegel kuy ne tendo ten-gelen yu efet là buden sliwo yóm kehtahu ye. Yó gónón tehe tmaba kuy anì gbót ye bè yóm tey kegetahen ditu bè longit hlanen bè yóm deng kessotu ye bè Krays. Ne yóm kegetahen yó, laen kô dù nan e són.

1 Tisalunika 3:13

Ni se mò lanen hol temgel kuy anì hol ye gulit ne mólós ke mdà ye bè solu Dwata yóm Mà tekuy, bè yóm kdaw angat kesfuléken edini yóm gónó tekuy mogot, mung du yóm kdê kun tau.

Tekang Kbuten 20:5

Yó tulón Abraham dou, monen, ‘libunu’ ne bud mon Sara se kun, ‘El, logihu.’ Laen dù salau ne laen se dù sidek deng nmou.”

1 Bok Kem Tau Hol Geta 8:32

Ó Dwata, hol hnungolem dyó bè longit, ne hol knukumem yó kem tau tóbóng lówóhem, yóm tau kmamo ne yóm tau klamohen. Hol tnafakem yóm tau wen salaen, ne hol hewaem yóm tau laen dù salaen.

Kem Lingón 9:9

Dwata se yóm kul gónó e mlo yó kem tau lenunog, ne gónó le hofin bè yóm kdawen wen gfà le.

Kem Lingón 18:21

Abay se deng lolou yóm kun lan Dwata, ne là kô knogolu du ke tô nmou yóm sidek.

Kem Lingón 35:23

Hkuóni kut, Dwata. Hol nfihem ou. Knukumem dou nim salà duón le dou ni. Uu se yóm Dwata hol gónóhu mogot.

Kem Lingón 43:1

Ó Dwata, hol hdilóem yóm là ktahuhen yóm gel duón le dou yó kem tau là temngón kóm. Hol nfihem ou. Hewaem ou lem tdok yó kem tau mò kéng ne bè yó kem tau gel mò sidek.

Kem Lingón 96:10

Yó hol tulón ye bè kem tau bè klamangen benwu, mon ye mò kul, “Yóm Dwata, du se yóm hol dandónen geta kmamal yóm klamangen. Tey mbegel kmoen du yóm benwu, là kóen sliwo. Angat knukumen yóm kdéen tau, ne tey tedeng yóm kkukumen kul.”

Kem Lingón 96:13

sok kól Dwata mò kmamal yóm klamangen. Angat tey tedeng yóm kkamalen kdéen tau, laen kô dù mtukul nfihen.

Kem Lingón 98:9

bè solu Dwata. Yakà kól Dwata nan e knukum klamang benwu. Knukumen klamang benwu mlan bè ktedengen, ne laen kô dù mtukul nfihen.