Kem Lingón 69:2 - Udél Dwata: Gna Kesfasad ne Lomi Kesfasad

² Lómón ke denge gebeng lem hitok, là kóe gemdà tonok. Tey nelem yóm él gónóhu geblos, udì duen gónóhu là lemneb.

Kem Lingón 69:2 Referans Kwoze

Kem Lingón 40:2

Ktengen ou lem yóm tey sidek gónóhu gebeng, lómón ke denge geblos elem yóm helek lebu. Yó nmoen béléu, lómón ke nkayen ou eta yóm tey botu bong, ominen yó he mgel kegnómu du.

Matyu 7:25

Ne e demsù yóm tey kulón bong, ngangen ne dmunuk yóm él, ne mbel se yóm tey lenos bong. Tódô senloben yóm gónô yó, okóm là kô ghugónen du, abay se deng hdaen te botu.

Jirimaya 38:6

Tahu se, nwa le Jirimaya ne omin le mfét du, hloyol le elem yóm sol tehe hokol Malkiya mò gónó le hemyu él. Nim Malkiya ni sotu ngà yóm tau hol geta bélê le. Yóm sol yó, nô talak lósól gónô bong yóm tau hol geta bélê le bè yóm gónóhen nô yóm tau gel mentey bè yó. Laen dù élen tódô hono hitok, botong gebeng lemen Jirimaya.

Kem Lingón 32:6

Duhen yó, Dwata, yake hol le mni béléem yó kem kóm tau ke wen blat sut bè klowil le. Ke yó nmò le, baluen ke tódô dmunuk eta le yóm tey mgel, là kô gwiten kul.

Jirimaya 38:22

Tódô kdê yó kem libun tebel bè yóm gónô bongem, gotu nwit le lu ebè yó kem genlal yóm tau hol geta bè Babilun. Bè yóm igò le mógów yó kem libun yó udél le ebéléem, mon le, ‘Deng snukat le uu yó kem weem deng snaligem. Tólóng lan hlolò le kóm. Ne ni, deng gebeng lem hitok tihem, lelen yó he deng knogol le uu yó kem weem yó.’

Juna 2:6

Lemnebe etlaan ditu bè but yó kem bulul nô lem mohin, ditu bè yóm benwu laen dù bud lanem gewà lemen. Okóm kóm, Dwata yóm hol gónóhu mogot, deng tódô nitem o semfulék lemwót gu bè yóm hol gónón nelem yó, nam e bud hlowil o.