Kem Lingón 23:1 - Udél Dwata: Gna Kesfasad ne Lomi Kesfasad

¹ Dwata yóm tendo semgyok dou. Gotu blayen dou yó kem wen muhu du.

Kem Lingón 23:1 Referans Kwoze

Flipay 4:19

Ke Dwata kun, lemwót bè yóm tey kendengenen, gotu blayen kuy yóm gónó ye élél hlanen bè Krays Jisas.

Kun Snulat Jan 10:11

Ou se yóm tau tilob kesegyoken ubiha. Gloku tódô hamà klowilu bè yó kem ubihahu.

Isaya 40:11

Tey hyu yóm angat kesegyoken kul, lómón yóm tau hyu kesegyoken yó kem ubihahen. Gel sentifunen yó kem ngà ubihahen ne gel sniwihen lu. Ne hen-ganagen malak yó kem yê le.

Kun Snulat Jan 10:14

Ou se,” mon Jisas, “yóm tau hyu kesegyoken ubiha. Gotu tngónu yó kem dou ubiha ne tngón le se ou kul,

Deng Hegfan 7:17

Abay se yóm Ngà Ubiha, yóm fen mdà bè solu yóm gónón myón yóm fen kmamal, du se yóm fen gel semgyok kul. Ne angat nalaken lu ebè yóm tbul él, yóm él mò hlowil kul. Ne angat gotu nifu Dwata yóm lewok bè mata le.”

Matyu 6:33

Ni dé hol nmò ye. Hol hogot ye ke Dwata klowil ye, ne hol nmò ye yóm gel hmoen kuy. Ke yó se nmò ye, Dwata he angat bemlay du kuy yó kem kdê wen mu ye du.

1 Pitér 2:25

Gu laan ye là deng hemtahu he, lómón tô ye ubiha gel mógów hetlas. Okóm ni, deng bud niten yu mulék ebè Dwata ne. Du se yóm tendo semgyok ne tendo mentey kuy.

1 Pitér 5:4

Ne ke bud semfulék edini Jisas, yóm semgyok ubiha hol geta bè kdéen, wen tey ofol blayen kuy, yóm ofol là kóen monol yóm alì kehyuhen.

Kem Lingón 84:11

Dwata se yóm hol mofin tekuy. Du se yóm hol dandónen geta alì minggel kmoen. Tey któbóngen tekuy mlan bè yóm hyu gel nmoen bélê tekuy, ne bè yóm kadaten tekuy. Là kô nalihen du yóm hyu ebè yó kem tau mò du yóm tedeng.

Sulat Pol Ebè Yó Kem Tau Hemtahu Bè Rom 8:32

Ke là nalihen du yóm hol tek sotu Ngaen, tódô hamaen klowilen bélê tekuy, sélét mom yó ne là blayen du tekuy yóm kdê deng tehe fasaden tekuy.

Hibru 13:20

Deng hlowil Dwata yóm gónó tekuy mogot Jisas. Lemwót bè yóm katayen bélê tekuy yó, hol lómón ke du yóm hol geta bè yó kem semgyok ubiha, ne tekuy se yóm hol sen-gyoken. Yóm litô hamaen bélê tekuy, yó se hol hemget du yóm lomi lan nmò Dwata mò lan tau ebéléen, ne laen kô sónen yóm lan nmoen yó. Yó hem Dwata gónón lemwót yóm kenek nawa tekuy hol tmóbóng kuy anì gbek ye mò du yóm kun kóyô. Ne bud du se hembaling tekuy kem tau mò hol hefligal du hlanen bè Jisas Krays. Hol bê tekuy abay nmò sónen yóm kdóyón tekuy ke Krays.

Mika 5:4

Bè yóm angat ksut yóm tau mogot benwu yó, tódô mdà lem blóng le, gotu nalaken yó kem kun tau mlan bè yóm kgis lemwót bè Dwata ne mung du yóm tey kegeta boluy yóm kun Dwata yó. Ominen yó kem tau nalaken, balù udì ke wen hemen le abay se tódô lenngeben klamang benwu yóm tey kegetahen.

Kem Lingón 78:52

Okóm yó kem kun tau, fen nalaken lu lómón kem ubiha, nalaken lu hlalak yóm benwu laen hol wen tauhen.

Jirimaya 31:10

Ó kem kdéen tau bè klamangen benwu, hol hnungol ye yóm udél yóm sana Dwata hol gónó mogot. Hol heglalag ye etu bè kem benwu mayuk kilil mohin. Yó udél Dwata, monen, Deng tehe senklahu lu yó kem tauhu, okóm angat bud sentifunu lu, sen-gyoku lu lómón yóm tau gel sen-gyok yó kem ubihahen.

Kem Lingón 79:13

Duhen yó, laen dù tul sónen yóm tendo kdóyón me kóm mi kem kóm tau, yó kem ubiha gel hótóbem. Dóyón me uu efet kól bè yó kem hilu bud lugod me.

Mika 5:2

Okóm kóm Bitlihim Ifrata yóm sotu benwu lemnek snakuf Juda, béléem angat gónón lemwót yóm tau néléku mò mogot yó kem tau Israél. Yóm kun kbut yóm tau néléku ni, tehe kem yu ne ekni.

Kem Lingón 34:11

Ó kem weu lomi lemnok, hol hnungol ye ou. Wen toloku kuy anì wen klikò ye ke Dwata.

Isikél 34:14

Tahu se, angat tódô bayau lu mótób bè yó kem tey bnes bè yó kem bulul bè Israél. Bè yó tódô gónó le henek hlilil ne mótób le bè yó kem tey tilob bnes gu ta bulul.