Kem Lingón 21:4 - Udél Dwata: Gna Kesfasad ne Lomi Kesfasad

⁴ Deng mni béléem anì hlowilem, ne tahu se, bnalaem yóm hnihen yó. Laen kô dù tul sónen yóm keblayem du klowil.

Kem Lingón 21:4 Referans Kwoze

Deng Hegfan 1:18

Ou se yóm laen dù tul katayen. Denge tehe matay, okóm ni denge bud mowil, laen dù bud sónen ne yóm dou klowil. Ou se yóm wen kfasangen mogot hatay, dalang se yóm benwu gónó le nô yó kem tau deng matay, ou se yóm mogot du.

Kem Lingón 91:16

Yó ofol blayu kul, angat htahau klowil le, ne angat lenwau lu.”

Kem Lingón 119:77

Hol knodum o anì mowile, yakà bè hlauhem du gónów hligal.

Kem Lingón 133:3

Yóm kessotu nawa, lómón kehyuhen lómón yóm amù hméfê yóm bulul Hérmun, ne yóm amù hméfê yó kem bulul bè Sayun. Bè yó kem tau ssotu nawa le yó, bélê le gónó Dwata fmasad du yóm hol hyu, duhen yóm klowil laen dù tul sónen.

Kem Lingón 119:175

Hlowilem o anì tendo dóyónu u, ne yó kem hlauhem yóm tendo tmóbóng do.

Kem Lingón 72:17

Yake laen dù kmifót du boluy yóm tau hol geta bélê me, ne anì laen dù tul sónen yóm któtólen, lómón yóm klaen dù tul són yóm nóng kdaw. Yóm kdéen dumu benwu, yake gotu le mni bè Dwata anì tnóbóngen lu, lómón yóm gel któbóngen yóm tau hol geta bélê me.

Kem Lingón 89:29

Laen kô dù sónen yóm kogoten benwu, hol lómón yóm klaen dù són longit. Sal gel wen bè yó kem semfu gu béléen angat baling tau hol geta.

Kem Lingón 13:3

Tenngelem ou, Dwata yóm sana Dwata hol dou gónó mogot, ne bnalaem ou. Hlowilem ou anì là mataye.

1 Bok Kem Tau Hol Geta 2:33

Hol laen dù tul sónen kbô Juab du ne dalang se yó kem tau semfu gu béléen yóm katay ni kem tau ni. Ne laen dù sónen snéen yóm khenek Dwata nawa Dabid ne yó kem tau semfu gu béléen dalang se yóm tau myón bè yóm kun gónó myón kmamal.”

1 Bok Kem Tau Hol Geta 2:45

Okóm Dwata he hol tmóbóng do, ne hol hemdohò du anì tendo wen bè yó kem sfu Dabid stufì myón bè yóm kun gónó myón kmamal.”

2 Bok Kem Tau Hol Geta 11:12

Omin Jihuyada hefewà ke Juas yóm ngà yóm tehe tau hol geta, ne ominen smuub kuruna bè kuluhen. Blayen du yóm snulat tehe senfasad le Dwata yó kem tau Israél mò lolò yóm tau hol geta bè kogoten benwu, ne ominen heglalag du bè kdéen, Juas ne yóm tau hol geta bélê le. Wen hnolo twélen ta kulu Juas mò ilô yóm kbalingen tau hol geta bélê le, ne gotu le semdofì hólól yóm kdéen tau, gotu le mensag, mon le, “Hol tahà he klowil yóm tau hol geta.”

Sikaraya 6:13

Tahu se, du se angat hemdà du yóm kun Gónô Dwata ne tey kadat le du lómón kadat le yóm tau hol geta ne nogoten yó kem tauhen lemwót bè yóm gónón myón kmamal. Ne lenwóten bè yóm gónón myón kmamal, bud du se mò blóng le ebè Dwata ne tey tilob kessogot yóm lewu nmoen yó.