Kem Lingón 17:3 - Udél Dwata: Gna Kesfasad ne Lomi Kesfasad

³ Bè yóm kifu deng kauyem dou sóól buteng, deng hensokolem yóm nô lem hendemu dalang se yóm nô lem but blututu, ne laen kô dù sidek tonem béléu Deng hol nô bè nawahu yóm là kegsalau ke mlan bè kudélu.

Kem Lingón 17:3 Referans Kwoze

Kem Lingón 26:2

Tilówem ou, Dwata, hol hen-getem smisif dou. Tenngelem yóm nô lem but blututu, ne yóm nô lem hendemu.

Kul Nmò 11:23

Timbow kól bè yó, ya tey kehyu nawahen yóm ktonen yóm któbóng Dwata kul. Gel gendufen lu anì hol le teneb, ne là monol nawa le ebè yóm gónó le mogot.

Kem Lingón 39:1

Yó mon nawaw, “Ten-gamahu yó kem gel nmou ne ksubaku anì là gemsalae. Yóm igò le nô klohoku yó kem hohonu, là kóe mudél.”

Malakay 3:2

Okóm bè yóm ksuten, tau du se gembek hembala du? Tau du se gembek mdà bè soluhen bè yóm kdaw kegdeken? Laen duen. Abay se yóm nangat ye yó, hol mkél bè yóm tey ofi gbeken hnò bala tók, duhen ke mkél bè yóm sabun alì lóbô gbeken hbukay nes.

Sikaraya 13:9

Yóm dù mowil yó, angat lómó kmou kul lómón yóm tau tmógó tahu blówón ne blówón bukay bè ofi, gotu kóhen ke wen boolen. Omin le yó tmaba bè boluyu ne angat bnalau lu, monu, ‘Lu se yó kem dou tau’ ne yó mon le se kul, ‘Dwata se yóm sana kum Dwata hol gónó mogot.’ ”

Kem Lingón 139:1

Ó Dwata, deng gotu henklolem ne yóm dou kmò, laen kô dù là tngónem du béléu.

Kem Lingón 119:106

Tey mget yóm tehe fasadu kóm, duhen yóm kimónu yó kem tedeng gel hloloem kum.

Kem Lingón 66:10

Deng tnilówem mi, Dwata. Lómón yóm blówón bukay hlan le bè ofi anì baling hol tahu duhen, lómón yó se yóm ktilówem kum.

1 Pitér 1:7

Yó gónón tmilów kuy anì gfan ke hol tahu duhen yóm kehtahu ye duhen ke là. Yóm kehtahu ye, lómón ke yóm blówón gel hlan le bè ofi anì gfan yóm hol tahu duhen. Bong bè yóm blówón, olo kem hlun kimu. Okóm yó dum kehtahu ye, bong muhen senta yóm blówón. Milud he ktilów Dwata du anì tngónen ke hol tahu duhen. Ke là lanahen, tey kdóyónen kuy bè yóm kdaw bud kesfulék Jisas edini, lelen tey hegeta kuy ne tey kadaten kuy.

Mika 2:1

Hatay ye kuy, kem tau olo le beyen hlilil kifu là dog tungô matul mò yó kem sidek. Hlafusen bè yó, tódô kendel nmò ye yóm sidek deng eles natul ye yó, abay se gbek ye mò du.

Kem Udél Hlalak Tehe Selumun 13:3

Nabungen klowilen yóm tau eles hendemen kudélen ne yóm tau tódô óyóen bemkó yóm udél sidek hensideken knóen.

Kem Lingón 16:7

Tey kdóyónu ke Dwata abay se gel sen-galaken ou. Ke kifu, eles wen gel hefedemen dou anì elese temgama.

Kem Lingón 11:5

Henklol tenngel Dwata yó kem tau tedeng kmò le dalang se yó kem tau sidek nmò le. Tey kutó nawahen kul yó kem tau alì móyô hemsidek tau.

Kem Lingón 7:4

ne ke deng mom bnalau sidek yóm hyu deng nmò weu béléu, duhen ke deng negefu kimu yó kem hohonu, baluen ke laen dù buten,

1 Samwél 26:23

Dwata he bemlay ofol bè yóm tau tedeng nmoen ne bè yóm kteneben. Deng blay Dwata uu elem tdoku kemdaw ni, okóm là kô hnatayu kóm abay se uu yóm tau hol geta deng kun nélék Dwata.

1 Samwél 24:12

Dwata he kmukum kut. Déke tnafaken u bè yóm tô nmoem béléu. Okóm béléu do, là kô gbeku du ke tô hensideku uu.

Kul Nmò 16:9

Bè yóm kifu yó, wen hegfan Dwata bè Pol bè knahen, yóm sotu tau lemwót bè prubinsya Masdunya. Yó henkoduhen bè Pol, monen, “Holi mifal kum edini bè Masdunya nam e tnóbóng mi.”

1 Samwél 24:10

Tódô kóm mata se mton du kemdaw ni yóm là ktahuhen. Deng blay Dwata uu elem hólólu ditu lem kilib. Ne wen kem tauhu mon du mò dou, hnatayem ne. Okóm là. Mom lenwau u. Yó monu mò kul, ‘Là glefu hemsidek du yóm tau deng kun nélék Dwata.’

Sulat Jim 3:2

Kdê tekuy, sal gel wen gónó tekuy gemsalà. Okóm yóm tau laen dù salà sumóngen, deng tahu gulit ne yóm tau yó, deng hulung mit ktauhen.

2 Kurin 1:12

Sotu gónó me gel hligal, abay se tódô tngón me laen kô dù belenen yóm kmò me ebè kem dumu me tau, hol néen yóm gel kmò me ebélê ye. Laen kô bang buni me bélê ye se, ne tódô tngón Dwata snéen yóm kgotu nawa me ebélê ye. Bè yóm kmò me du nim nmò me ni, là kô tódô salig me du yóm kum ketngón, sal gel snalig me yóm kfasang Dwata tmóbóng kum.

1 Kurin 4:4

Bè kehedemu du yóm dou kmò, laen kô dù tngónu ke wen gónóhu là gulit. Okóm bà yó he, là kô tngónu du ke hol gulit ktonen ou yóm gónóhu mogot. Tódô du he yóm angat kmukum dou.

1 Samwél 26:11

Okóm là móyô Dwata ke ou hmatay du yóm tau hol geta deng kun nélék. Okóm olo te ma yó dém buyus mteg bè kuluhen ne yóm gónóhen gel hemsù él mò ninumen, omin te lemwót.”

1 Tutul Israél 28:9

Ne uu, ngau Selumun, yake holi setngón ke Dwata yóm Dwata yó kem fuem. Hol nmoem yóm hmoen kóm Dwata, ne hol hewótem lem but blututem yóm óyóem hol mimón du. Yakà yóm Dwata yó, gotu tonen yóm nô lem hendem yóm ket tau, ne gotu tngónen yóm kdê atulen ne kdê hendemen. Ke hnebelem Dwata, dohò se ktonem du. Okóm ke tebelem, bud laen kô dù tul sónen yóm kdohò yóm kekbéen kóm.

1 Tutul Israél 29:17

Tngónu se, Dwata, gel henklolem yóm nô lem but blutut me, ne teyi hligal ke tonem yóm kgulit me. Nim kdê blayu ni, hol lemwót lem but blututu, ne deng hol tonu bè yó kem tauhem nô bè ni yóm hol kewóten lem but blutut le se kul yó kem blay le kóm, mung du yóm tey kehligal le.

Kem Lingón 139:23

Hol henklolem o, Dwata, hol tenngelem yóm nô lem nawahu. Hol tilówem o anì tngónem yóm nô lem hendemu.

Jirimaya 12:3

Okóm béléu dou, Dwata, deng tngónem yóm nô lem but blututu. Tonem ou ne tngónem se yóm nô lem hendemu. Ni kem tau mò sidek ni, dyolem lu hlayuk lómón kedyol le yóm ubiha ebè yóm gónó e tmétê du. Htólóngem lu efet kól bè yóm kdaw khatayem kul.