Kem Lingón 15:2 - Udél Dwata: Gna Kesfasad ne Lomi Kesfasad

² Yó olo knóón, són yóm tau tendo mimón ke Dwata, ne laen dù belenen yóm gel nmoen, ne hono tahu yóm gel btang bè sumóngen, laen kô dù bool kestulónen,

Kem Lingón 15:2 Referans Kwoze

Kem Udél Hlalak Tehe Selumun 28:18

Yóm tau laen dù belenen tey hyu knóen, okóm yóm tau là tedeng kmoen mekto keglaen.

Kulasi 3:9

Bê tekuy abay gel mò kéng, yakà deng kó tekuy tum tehe gna klowil mahil mò sidek.

Ifisus 4:25

Duhen yó, hol bê tekuy abay bud mò kéng sen. Tódô gel tulón tekuy yóm ktahuhen bè kem dumu tekuy hemtahu, abay se deng kuy ssotu bè kun lówó Krays.

1 Jan 3:7

Bê ye hegsukat bè kem dumu tau, kem ngà. Ke tedeng nmò yóm tau, yó se yóm tau deng tedeng kmoen, hol mkél bè yóm kun ktedeng kmò Krays.

1 Jan 2:6

Ke mon yóm sotu tau, “Deng me ssotu ne Dwata,” yake hol nulit nmoen sen yóm kun kmò Jisas Krays.

Ifisus 2:10

Yakà Dwata du yóm deng hmomi tekuy. Ne lemwót bè yóm deng kessotu tekuy ke Krays Jisas, deng henbalingen tekuy ne tau mò du yóm hyu. Ne yóm hyu gel nmò tekuy ni kmoen ni, deng tehe eles kem hendem Dwata ne ekni yóm kmò tekuy du.

Kul Nmò 10:35

Balù kihu tau, ke wen klikoen ke Dwata, ne ke hol nmoen yóm hyu bè Dwata, là kô knogol Dwata du se kun, nô kihu se kun gónó gu mbut.

Mika 2:7

Ó kem tau Israél, yó kô udél ye? Gbek Dwata hembala du kô yóm nmò ye yó? Ke yó dum tedeng yóm tendo gel nmò ye, kaem hyu bélê ye yóm udélu ni.

Kem Lingón 24:4

Yó knóón mò du, duhen yó kem tau laen dù belenen yóm kekdol le ne yóm kehedem le. Là tmaba le ebè yó kem dwata lenbù nmò, ne là tódô le mò fasad hkawang.

Hibru 11:33

Ni kem tehe tau gnan ni ekni, lemwót bè yóm kehtahu le bè Dwata, yó gónó le gel matù bè yóm gel kesgida le. Tódô nmò le yóm tedeng, ne yó gónó le gmuta du yóm fasad Dwata kul. Lemwót bè kehtahu le, là kô gebngat le du kakim le yó kem liyun tô msék kul.

Isaya 33:15

Song gónó ye mowil kuy bè yóm ofi yó ke tedeng yóm gel kebkó ye ne ke tedeng yóm gel nmò ye. Béem nwit yóm kwen boluy ye mò smukat yó kem tau élél. Hol bê ye henmóyô ke wen tô blay le kuy mò wa nawa le. Hol bê ye abay mung bè yó kem tau matul monok, duhen ke wen dumu sidek natul le.

Glasya 2:14

Timbow tonu yóm là bud klolò le du yóm ktahuhen lemwót bè yóm Tulón Hyu, yó gónóhu tódô mon du mò ke Wè Pitér lem blóng yó kem tau, monu, “Tauhi Ju se kóm, Wè, okóm bè yóm knóem bè ni, kéng tô là Juhi, deng nmungem yóm kul adat yó kem tau là Juhen. Ke yó se nmoem, tô kmò kehloloem du kul du yó kem tau là Juhen yóm hlau tekuy kem Ju?”

Sulat Pol Ebè Yó Kem Tau Hemtahu Bè Rom 2:10

Okóm kul yó kem tau mò du yóm hyu, angat tey kdóyón Dwata kul, ne tey kadaten kul, ne heneken nawa le, lenwóten bè yó kem Ju kkólen bè yó kem tau là Ju le.

Deng Hegfan 21:8

Okóm yó kem tau likò lemolò do, ne yó kem tau là hemtahu le béléu, yó kem tau ssamuk honon lu, ne yó kem tau monok, ne yó kem tau mò samuk, ne yó kem tau smalig bè imò, ne yó kem tau hemtahu bè dwata kéng, ne kdéen tau mò kéng, angat le gógów elem lanaw ofi yóm kdê le, yóm ofi wen kbudahen tendo seflós dmilóf. Yóm lanaw ofi yó, yó se yóm mon le gewuhen dulék matay tau.”

1 Jan 2:29

Lemwót bè yóm ketngón ye du tey tedeng yóm Krays, bud tngón ye snéen ke tedeng kmoen yóm tau, du se yóm tau deng tahu ngà Dwata.

Kun Snulat Luk 1:6

Tey tedeng kton Dwata kul yóm lewu le, ne tey gulit klolò le du yó kem hlau Dwata.

Isaya 63:8

Yó mon Dwata, “Lu se yó kem dou tau. Là kô na le e snukat dou.” Yó gónó Dwata lemwà kul

Kem Lingón 84:11

Dwata se yóm hol mofin tekuy. Du se yóm hol dandónen geta alì minggel kmoen. Tey któbóngen tekuy mlan bè yóm hyu gel nmoen bélê tekuy, ne bè yóm kadaten tekuy. Là kô nalihen du yóm hyu ebè yó kem tau mò du yóm tedeng.

Kem Udél Hlalak Tehe Selumun 20:7

Hyu nawa le kul yó kem kun ból yóm tau tedeng ne laen dù belenen yóm kun kmò.