Kem Lingón 112:9 - Udél Dwata: Gna Kesfasad ne Lomi Kesfasad

⁹ Là sgafas nawa le bemlay yó kem tau élél. Yóm kehyu nmò le laen kô dù tau kmifót du. Tey mbegel ktau le, ne tey kadat le du kem dumuhen.

Kem Lingón 112:9 Referans Kwoze

Kem Lingón 75:10

Yakà deng mon Dwata du, “Kóhu yóm kul kfasang yó kem tau mò sidek, okóm bè yó kem tau tedeng kmò le, tennuu yóm kfasang le.”

Hibru 13:16

Ne bê tekuy abay klifót yóm ktilob kmò tekuy bè kem dumu tekuy tau ne yóm gel kestóbóng tekuy, abay se ni se mò henged dsù gónón hyu nawa Dwata.

Hibru 6:10

Tey tedeng knawahen yóm Dwata. Là kô klifóten du yóm hyu tehe gel nmò ye, ne yóm tey kbong nawa ye du. Yó gónón gfan yóm nawa ye ebéléen yó bè yóm gel któbóng ye yó kem dumu ye hemtahu. Balù ni kmoen ni, sana kmò ye du.

1 Timuti 6:18

Yó dé hyu ke hol tnóbóng le yó kem dumu le tau. Yóm gel któbóng le kul yó, yó se henged kendengen le. Yake hol tnóbóng le yó kem tau élél.

Sulat Pol Ebè Yó Kem Tau Hemtahu Bè Rom 12:13

Hol gel tnóbóng ye kem dumu ye hemtahu ke wen gónó le élél se kul. Hol ye gel hmódó ke wen tau milo sut bélê ye.

Deng Hegfan 22:11

Yóm tau mò sidek, tódô henlósen ne yó kem sidek nmoen. Yóm tau là mólósen, tódô henlósen se kun mò du yóm là mólósen. Okóm yóm tau hyu kmoen, hol henlósen sen mò du yóm hyu. Yóm tau laen dù belenen yóm kmoen, hol henlósen mò du yóm laen dù belenen.”

Kul Nmò 20:35

Deng hdalangu kuy se bè yóm kmò tekuy nmò, sal gel wen gónó tekuy ma mò tóbóng yó kem dumu tekuy wen gónó le élél. Hol hentulón ye nawa dé yóm sotu tehe mon Jisas, yóm monen, ‘Bong kligalen he kun yóm tau bemlay senta yóm tau benlay.’ ”

Isaya 58:10

Hyu ke benlay ye ken yó kem bitil ne hegsengel ye nawa yó kem tau wen gónó le élél. Ke yó se nmò ye, angat baling layag yóm tey kkifuhen hmilol kuy, lómón layag kdaw gtungó.

Isaya 58:7

Gel henken ye yó kem tau bitil ne hnódó ye bè gónô ye yó kem tau élél laen dù gónó le nô. Benlay ye nes yó kem tau laen dù bang nes lesek le. Hol bê ye kenbê tmóbóng yó kem kuy dumu.

Kehedem Tau Tmolok 11:6

Holi heged mulu yóm kdê kay hulu, là kô tngónem du ke mahi du tmowok bélê le, duhen ke tódô kdê le gotu tmowok.

Kem Lingón 92:10

Okóm deng tey kehekgisem dou, lómón kgis yóm safì tudu tabag. Ne tey kehyu kegnómu du lemwót bè yóm nmoem béléu.

2 Kurin 8:9

Deng tngón ye se yóm alì nawahen tekuy yóm gónó tekuy mogot Jisas Krays. Gloken gemtagak yóm tey kun kendengen bè longit na a baling tau élél te tonok. Yó gónón mò du yóm yó anì baling wen kendengen tekuy mlan béléen.

Kun Snulat Jan 13:29

Ofo kul mon du ke wen ken na a hebli Jisas ke Judas mò kul ken bè yóm mò ken yó, duhen ke wen nan e heblay du bè yó kem élél, abay se Judas se yóm fen gel mogot filak bélê le.

Kun Snulat Luk 16:9

Tódô tulónu kuy,” mon Jisas, “Hol gel benlay ye yó kem tau élél yó kem kendengen ye te tonok. Abay se ke deng gotu blay ye, angat tey khódó Dwata kuy ditu bè yóm gónó ye angat nô laen kô dù tul sónen.

Kun Snulat Luk 12:33

Hebli ye yó kem kimu ye, ne blay ye bè yó kem tau élél yóm blihen. Ke yó nmò ye, lómón ke deng wen filak henyu ye bè longit bè yóm gónó hemyu filak là buden sidek. Ke wen ten-ginof ye bè longit, là kô wen fen mtón du ne laen se dù mnagaw du ne laen se dù kaba hemsidek du.

Mark 14:7

Hyu he kul yó kem tau élél, eles le tendo nô lem blóng ye, mahil bélê ye tmóbóng kul. Là dou.

Kem Udél Hlalak Tehe Selumun 19:17

Yóm tau knoduhen yó kem tau élél lómón ke hendómen Dwata ne Dwata he hulék du yóm deng blayen.

Kem Lingón 112:3

Wen tey kendengen le ne laen kô dù kmifót du yó kem hyu gel nmò le.

1 Samwél 2:30

Yó gónóm mon, ni se udél Dwata yóm Dwata yó kem tau Israél, monen, ‘Deng tehe fasadu kóm, laen dù sónen yóm keseblóng le tau ebéléu yó kem fes lówóhem kkólen bè yó kem angat lugodem.’ Okóm ni, là ne. Olohu madat yó kem tau madat do ne kóhu yó kem tau kembê do.

1 Samwél 2:1

Omin Hana mni bè Dwata, monen, “Tey kehefligalen do Dwata. Ya tey któbóngen dou. Laen dù bud gónóhu myak ne bè yó kem hohonu, tey kligalu ne ni lemwót bè yóm tey któbóng Dwata do.

Kul Nmò 4:35

blay le yó kem hógów Jisas anì lu fen gel mólól du ke wen bélê le wen gónón élél.

Kun Snulat Luk 18:22

Timbow gungol Jisas nim monen ni, monen mò du, “Sotu he duen tolo gónóhem là deng sikof. Hbaluem yóm kdê nô béléem, ne blayem bè tu kem tau élél yóm blihen. Ke yó nmoem, angat wen tey kendengenem bè longit. Lemwót yó dum kóm, loloem o.”

Kun Snulat Luk 11:41

Yó dé hyu, olò bnasa ye lu tu kem élél mò balà yóm hyu gel hton ye ta.

Matyu 6:4

anì laen dù dumu tau temngón du. Ne yóm Mà tekuy bè longit, gotu tonen yóm là kehetngón ye du yó, ne du he angat bemlay kuy ofol.

Isaya 32:8

Okóm yóm tau laen dù kéngen, tey tedeng yóm gel nmoen ne tey mbegel kdaen du yóm tedeng.

Kem Lingón 92:11

Deng ton matahu yóm là kegmò yó kem hohonu, ne deng dou klingu mungol du langat yó kem hohonu gel mò sidek.

Kem Lingón 111:3

Gel gfan bè kdê yó kem nmoen yóm tey keklóónen ne yóm tey kegetahen. Ne yóm tey ktedengen, laen kô du tul sónen.

Kem Udél Hlalak Tehe Selumun 14:24

Yóm kun kendengen yóm tau hulung hedem duhen yó se yóm ofolen, okóm yóm tau book olon tótól bè yóm kbooken.

Kem Udél Hlalak Tehe Selumun 21:26

Yóm tau lemfu són ófô yóm tendo nô bè nawahen, okóm yóm tau tedeng kmoen là kóen segafas keblayen.

Kehedem Tau Tmolok 3:6

Wen se kdaw mebel ne wen se kdaw lemana. Wen se kdaw hemyu ne wen se kdaw mbot.