Kehewà 5:13 - Udél Dwata: Gna Kesfasad ne Lomi Kesfasad

¹³ Ya tey kdanda le mdók kul yó kem tau Idyip anì hol senged bè yóm gnan yóm nmò le ket kdaw, lómón yóm kwen yóm nmò le bè yóm tehe hanà kwen gel bemlay kul lami.

Kehewà 5:13 Referans Kwoze

Kehewà 1:11

Tahu se, yó nmò yó kem tau Idyip, wen tau snigang le mò fen gel dmanda mdók kul yó kem tau Israél, ne tey sidek keblaten yóm gel hmò le kul, anì laen dù bud gónóhen e mefet nawa le. Hefdà le kul yóm syudad Pitum ne syudad Ramisis mò gónóhen gel semtifun ken yó kem tau Faro bè Idyip.

Kehewà 5:6

Bè yóm kdaw yó, gotu htaba Faro yó kem tau Idyip dmanda mdók kul yó kem tau Israél hesek le ne yó kem tau Israél gel malak kul mò nmò yó kem dumu le Israél. Yó monen mò kul,

Kehewà 5:12

Tahu se, tódô lenngeb yó kem tau Israél yóm benwu Idyip na a mebel lami.

Kehewà 5:14

Lemwót yó kem tau Idyip gel dmanda mdók kul yó, gel nfes le yó kem tau Israél gel malak kul mò nmò yó kem dumu le Israél. Yó mon le mò kul, “Moen du ke là sengeden bè yóm gnan yóm bud nmò ye?”

Kehewà 5:11

Monen, tódô ye mebel kuy, balù kihu gónó ye e mebel, okóm hol tódô senged bè yóm gnan yóm kwen ngom gónô bud nmò ye lemwót bè tonok miket.”

Isra 3:4

Bud nmò le se yóm Kehligal bè Slung, tódô lolò le yóm hlau tehe snulat Musis. Tódô ket kdaw bè yóm kehligal le yó, wen kem dsù hkekeb le ebè Dwata.

Job 39:7

Gel le hlayuk bè yó kem syudad alì hebnes. Là kô gungol le du se kul ke wen udél tau dmanda mdók kul mò nmò.