Kehewà 34:13 - Udél Dwata: Gna Kesfasad ne Lomi Kesfasad

¹³ Yó dé nmò ye, gotu genbà ye yó kem gónó le gel demsù ebè yóm kul dwata. Hnugón ye yó kem hehek botu tahà gónó le gel tmaba ebélê le ne nofok ye yó kem dwata lennged le.

Kehewà 34:13 Referans Kwoze

2 Bok Kem Tau Hol Geta 18:4

Gotu genbaen yó kem gónó le gel tmaba ebè yó kem dwata kéng, ne gotu lenusoken yó kem hehek ilô yó kem dwata kéng le, ne hofoken yóm lennged yóm dwata kéng le boluyen Asira. Gotu lenusoken snéen yóm ulal tembaga tehe nmò Musis, abay se efet bè yóm kdaw yó mo le mom mtem insinsu ebè yóm ulal yó, yó kem tau Israél, yóm bnoluy le Nihustan.

Kehewà 23:24

Hol bê ye abay mtud bukol bè kul dwata lennged ne hol bê ye abay gbót tmaba ebélê le ne hol bê ye abay lolò yóm kul gel hlolò bè yóm ktaba le ebélê le. Yó hmou kuy, gotu genbà ye yó kem dwata kéng gel nmò le ne gotu hnugón ye yó kem hehek botu gónó le gel tmaba ebélê le.

Dwata 7:5

Yó gónóm mon, gotu genbà ye lu yó kem kul gónó demsù, lenusok ye yó kem hehek botu deng hetfing le ebè yóm kul dwata lennged. Nofok ye yó kem hehek deng hdà le ilô yóm dwata libun le boluyen Asira ne gotu dnutung ntem ye lu yó kem dwata lenbù deng nmò le.

2 Tutul Israél 31:1

Timbow deng kmò le du yóm kehligal yó, yó nmò yó kem tau Israél nô bè yó, mógów le ebè yó kem syudad bè klamang Juda ne Bindyamin ne Ifraim ne Manasi, gotu lenusok le yó kem hehek botu, ne nofok le yó kem hehek yóm dwata libun boluyen Asira bè yó kem benwu yó, ne gotu kó le yó kem gónó le gel tmaba ebè dwata kéng, dalang se yóm gónó le gel demsù ebélê le. Tikóng deng gotu deng kegbà le kul, omin le mulék ebè kul benwu yó kem tau Israél yó.

2 Bok Kem Tau Hol Geta 23:14

Gotu lenusoken yó kem hehek botu ilô yó kem dwata le bè yó, ne bud hofoken yó kem hehek yóm dwata libun boluyen Asira. Ominen gholu du yóm benwu yó mlan bè kbuléten bè yó yóm tiol yó kem tau deng matay.

Kmukum 6:25

Bè yóm kifu yó, yó bud mon Dwata mò ke Gidyun, “Nwahem yóm gewu safì tudu maem deng hitu halayen. Genbaem yóm gónó maem gel demsù ebè Baal ne nofokem yóm hehek ilô yóm dwata libun boluyen Asira mdà klohoken.

Kmukum 2:2

Ne yó deng kuy fasad do, béen wen senfasad ye bè yó kem tau menwu bè ni. Deng tehe dóku kuy hol genbà ye yó kem gónó le gel demsù ebè yó kem kul dwata lennged. Okóm là kô nimón ye du yóm deng hmou kuy yó.

Kmukum 6:26

Tles hdaem bè yó ta yóm bulul udì yóm gónô demsù ebè Dwata, yóm sana kóm Dwata hol gónó mogot. Hninggelem semsodò kul yó kem botuhen. Ominem demsù du tahen yóm safì tudu deng nwahem, hkekebem. Snukem du yóm hehek Asira deng nofokem.”

1 Bok Kem Tau Hol Geta 14:15

Angat gotu tnafak Dwata lu yó kem tau Israél, lómón kmoen kul lómón yóm teblow kohil bè lel él tolo mogot bè buten. Angat gotu kenduten lu yóm kdéen tau Israél ta yóm tonok hyu deng tehe blay Dwata yó kem tehe fù le, ne angat gotu senklahen lu sentu yóm Él Yufratis, yakà deng hebut le ke Dwata bè yóm ktaba le bè hehek yóm dwata libun boluyen Asira.

2 Tutul Israél 14:3

Gotu kóhen yó kem gónó demsù ebè yó kem dwata kéng, ne yó kem gónó le tmaba kul. Gotu hlusoken snéen yó kem hehek botu le, ne hofoken hehek yóm dwata libun boluyen Asira.

2 Tutul Israél 15:16

Balù yóm bé Asa boluyen Maaka, botong hdó Asa yóm tau hol geta, bè kboihen lanen hmò yóm dwata libun alì kenbê boluyen Asira. Gotu hofok Asa yóm dwata lennged yó, ne lenusoken, ne ntemen ditu bè Datal Kidron.

2 Tutul Israél 17:6

Tey khotuhen nawahen lemolò du yóm kun lan Dwata. Gotu genbaen yó kem gónó le tmaba ebè yó kem dwata kéng ne yó kem hehek yóm dwata libun boluyen Asira.

2 Tutul Israél 24:18

Yó atul le, tódô bayà le yóm Gónô Dwata, ne yóm Dwata yó kem tehe fù le, ne tmaba le ebè yóm hehek yóm dwata libun boluyen Asira ne bè yó kem dwata lennged. Bè yóm salà nmò le yó, tey kebut Dwata kul yó kem tau bè benwu Juda ne bè Jirusalim.

2 Tutul Israél 33:19

Yóm kni Manasi ebè Dwata ne yóm kbalà Dwata du, ne yóm kdê salà deng nmoen gu laanen là deng hegsel, ne yóm kehefdaen yó kem gónô tmaba ebè dwata kéng, ne yóm kehefdaen yóm hehek yóm dwata libun boluyen Asira, ne kdê yó kem dwata kéng tehe gónón e gel tmaba, deng gotu snulat bè Bok Yó Kem Tau Wen Hton Dwata Kul.

Mika 5:14

Angat hnugónu yóm dwata lennged libun bnoluy ye Asira sù ye lem benwu ye ne gotu genbau yó kem syudad gónóhen nô.

Lista 33:52

hol gotu lo ye lu yó kem tau nô bè yóm benwu yó. Gotu genbà ye yó kem dwata kéng gel nmò le bè botu ne bè yó kem dumu gel tenwél le. Gotu genbà ye snéen yó kem gónó le gel tmaba ebélê le.