Kehewà 32:32 - Udél Dwata: Gna Kesfasad ne Lomi Kesfasad

³² Ke yóm hyu béléem hol hnifótem lu. Okóm ke là móyói hmifót kul, tódô kóhem yóm dou boluy deng snulatem bè yóm bok gónóhem smulat boluy yó kem tauhem.”

Kehewà 32:32 Referans Kwoze

Kem Lingón 69:28

Hol kóhem yóm boluy le bè yóm bok gónóm smulat boluy yó kem tau gmuta du yóm klowil laen dù sónen. Béem homong lista lu bè boluy yó kem kóm tau.

Deng Hegfan 21:27

Okóm là kóen gusek bè yó yóm là mólósen, duhen yóm tau gel mò yóm gónón hemyak knô, ne yóm tau gel mò kéng. Són olo gusek, són yó kem tau deng gsulat boluy le bè yóm bok lowil, duhen yóm kun bok yóm Ngà Ubiha.

Flipay 4:3

Ne uu snéen, Wè, yóm tau là monol nawahen tmóbóng dou, yake uu hol tmóbóng kul anì géhél le sefyu. Tey tehe khotu le nawa le tmóbóng do ekni bè yóm kehbólu yóm Tulón Hyu. Tehe le gel mung ke Klémén ne yó kem dumu gel tmóbóng dou. Yóm kul boluy deng gotu nô bè yóm bok Dwata, duhen yóm bok lowil.

Sulat Pol Ebè Yó Kem Tau Hemtahu Bè Rom 9:3

bè yó kem dou dumu Ju, yó kem tau hol dou litô. Sidek kegnómu du abay se là kô le hemtahu bè Krays. Ke yó dum gmò, mom hyu dé ke ou fen tnafak Dwata mò tles lówó le, ne ke ou fen glayuk bè Krays anì lu yóm gewà gu lem tafak.

Danyél 12:1

Yó bud udél yóm hógów Dwata mnes bukay, monen, “Bè yóm kdaw yó, angat msut lem blóng ye Maykél yóm geta bè yó kem hógów Dwata, mò mofin kuy kem tau Israél. Bè yóm kdaw yó, hol keglayam bong yóm angat glumfak yó kem tau Israél, keglayam là deng sulék gnóm tau du lemwót bè kbut benwu. Okóm bè yó kem kdaw yó, angat le gewà yó kem dumuhem Israél ke deng snulat lem yóm bok Dwata yóm kul boluy.

Deng Hegfan 3:5

Yó kem tau gel matù bè yó kem sidek gel sut, angat benlayu lu nes bukay, ne là kô kóhu du yóm kul boluy bè yóm bok lowil. Ne bè yó bè solu Mà ne yó kem gel hógówen gu bè longit gónóhu tmulón du yóm deng kfunu kul.

Kem Lingón 139:16

Deng eles tonem ou ne gu laanu là deng sut. Ne gu laanu là deng sut he, deng eles snulatem bè bokem yó kem deng oluhem etahu lemwót bè yóm kdaw ksutu efet kól bè yóm buteng angat katayu.

Kem Lingón 56:8

Deng gotu tngónem yóm kdê lenóngónu. Deng tngónem se ke deng hilu duléken mosok lewoku. Kaem deng listahem bè bokem.

Deng Hegfan 17:8

Yóm ógóf lóbô tonem yó, tehe mowil te tonok, okóm deng matay. Bede móyón bud sut ne ni lemwót gu lem yóm tey sol leyóng. Okóm bè yóm ksuten, angat tudà le elem lanaw ofi mò sónen. Angat tey kehtaw le du yó kem tau te tonok bè yóm kton le du. Hentaw le, abay se tehe mowil, ominen matay, ne ni bud sut. Yó kem tau hemtaw du yó, duhen yó se kem tau là gsulaten yóm kul boluy bè yóm bok lowil tehe snulat le gu laanen là deng wen benwu he.

Dwata 9:14

Béem tô henseng ou bè nim nmou bélê le ni abay se deng nô bè nawahu ne yóm keglau kul anì laen dù bud hemtulón kul nawa. Okóm kóm, nmou uu mò mà yóm sotu but tau alì genged ne alì mbegel senta le.’

Lista 14:19

Ne ni, Dwata, lemwót bè yóm là konol yóm tey kbong nawahem kum mnihe béléem, hol hnifótem bélê le salà le ni kem tau ni lómón se yóm deng tendo gel nmoem bélê le lemwót bè yóm tehe kehewà le gu bè Idyip efet nim kmoen ni.”

Kehewà 32:10

Ne ni béem henseng o, tey kebutu kul ne gotu genlau lu. Ne yó tles nmou angat tey kehbólu kóm ne yó kem angat semfu gu béléem. Nmou yu sotu bung tau alì mbegel.”

Kun Snulat Luk 23:34

Yóm igò le tmutuk ke Jisas, yó udélen, monen, “Hol hnifótem lu, Mà, abay se là tngón le du yóm nmò le.” Lemwót yó kem sendalù tmutuk ke Jisas yó, sensatù le nesen.

Amus 7:2

Bè yóm hton Dwata do yó, tonu yó kem tey tlangas mfól, gotu ken le yóm kdéen tmowok te tonok. Ominu mon du, “Ó Dwata hol dandónen geta, hkoduhe béléem, hol hnifótem mi yó kem tauhem. Ke hógówem yó kem tey tlangas wen yó, tedu se tô klowil me du? Igò me là bud hol wen.”

Deng Hegfan 22:19

Ne ke wen tau wen kóhen du ni kem eles tulónen bè nim bok ni, bud kó Dwata béléen snéen yóm kun ólól bè yóm koyu hlowil tau, ne kóhen snéen yóm gónóhen tô nô bè yóm syudad Dwata, yóm deng tulónen bè nim bok ni.

Kun Snulat Luk 10:20

Okóm,” monen, “bê ye mom kat alì hnigal se yóm deng kimón le kuy yó kem busaw. Yó dé hol hnigal ye, yóm boluy ye deng snulat Dwata bè longit.”

Lista 11:15

Ke seflós lómón ni tô hmoem do hol henkoduhu béléem, tódô hnatayem o ni ne anì là bud gnómu du yóm alì ksidek keblat yóm hbóem do.”

2 Samwél 18:33

Tódô gleket bè yóm tau hol geta yóm ksidek kegnómen du, tódô mógów elem yóm dfél nô ta yóm bak tikeb yóm syudad, ne hebtuen dlumuhen. Yó udélen, monen, “Ngau Absalum, Absalum, Absalum. Yake ou dé matay, béen uu Absalum, ngau.”

Malakay 3:16

Ominen yó, lemwót yó kem tau wen klikò le ke Dwata gotu le stulón, sentulón le yóm tey tóbóng Dwata kul. Ne yó nmò Dwata, hnungolen yóm sentulón le yó. Duhen yó, bè yó bè soluhen wen gónó le smulat du yóm boluy yó kem tau wen klikò le du, yó kem tau tendo nulón nawa le yóm kun boluy.

Malakay 3:17

Yó udél yóm Dwata laen dù là gbeken du, monen, “Lu se yó kem dou tau. Ke hto yóm butengu tmafak tau, lómón ke lu yó kem kimu legen alì mebtes htólóngu mò dou nfun. Là kô tnafaku kul mom knoduhu lu, lómón kkodu yóm mà yóm ngaen logi tendo gel mimón du.

Lista 11:25

Omin Dwata mnaul elaan mung bè lobun ne mudél ebè Musis. Wen nwahen bè yóm Tulusen deng tehe suen bè Musis ne bud suen bè yó kem hitu folò tau malak yó koni. Timbow gefet bélê le yóm kehtulus Dwata kul yó, tódô gotu tulón le yó kem udél htugod Dwata kul lómón yóm kul gel nmò yó kem tugod Dwata, bede tek són yó kmò le du.