Kehewà 24:12 - Udél Dwata: Gna Kesfasad ne Lomi Kesfasad

¹² Sotu kdaw, yó bud mon Dwata mò ke Musis, “Budi mneged edini béléu ta bulul, nahem na legen bè ni. Bè yóm igoem nô bè ni wen lewu botu kufil blayu kóm, botu gónóhu deng smulat yó kem hlolou yó kem tau Israél.”

Kehewà 24:12 Referans Kwoze

Dwata 5:22

Ni se yóm sfolò kem hlau hlolò Dwata kuy bè yóm tehe kesbung ye bè bulul Sinay. Tódô mudél ebélê ye gu lem yóm dilóf ofi ne lobun mfól ne tey mfasang yóm kudélen yó. Ni se yóm hlau hloloen kuy, laen dù dumuhen. Ominen smulat du ta yóm lewu kem botu kufil yóm hlauhen yó ne oguhen dou.

Kehewà 31:18

Timbow deng kudél Dwata ebè Musis ditu ta tfusù yóm Bulul Sinay, ominen bemlay du ke Musis yóm lewu botu kufil gónóhen deng smulat yó kem sfolò hlauhen kul. Tódô Dwata smulat du yó kem hlau yó.

Hibru 9:4

Wen lemisa lenafin blówón nô lemen mò gónó le gel mtem ebè Dwata yóm alì minggel boohen boluyen insinsu. Ne wen slungan bong lenafin blówón nô lemen snéen. Yó boluy le du, slungan gónón nô yóm fasad Dwata. Wen sotu sobuy blówón nô lemen gónó le hemyu du yóm tehe ken le ekni boluyen mana. Ne sotu bud nô lemen, yóm tehe tuged Aron, yóm tuged tehe tódô dmoun. Ne bud nô lemen snéen yóm lewu botu kufil gónó Dwata tehe smulat du yó kem hlauhen kul.

2 Kurin 3:3

Nim sulat monu ni, mahil dmilô du ke Krays fen smulat du, ne olon heted du kum. Bede là kô lan tdok du, kaem Tulus Dwata mò du, yóm Dwata laen dù tul katayen. Ne là se kô snulaten du bè botu kufil, kaem lem hendem ye gónón smulat du.

Jirimaya 31:33

Okóm ke deng kól yóm kdawen, ni se yóm lomi senfasad me yó kem tau Israél. Angat suu lem nawa le yó kem hlolou kul ne snulatu lem hendem le. Angat bud ou se mò kul Dwata ne lu se mò dou tau.

2 Kurin 3:7

Bè yóm tehe kehsulat Dwata du ke Musis bè botu kufil yóm hlau gnan, tey keslinang lem uyó Musis, lemwót bè yóm kloni Dwata béléen. Balù yóm konol yóm keslinang lem uyó Musis, ewenem sana là kegbek le temngel ebéléen yó kem tau Israél, bà mon yóm tey keslinang lem uyóhen. Ke yó se kmoen bè yóm tehe keblay Dwata yóm hlau mit hatay,

Dwata 4:14

Bud bè yóm kdaw yó snéen kehtolok Dwata du dou bélê ye yó kem kun dumu hlau kuy ne yó kem kun hlolò kuy mò tendo nimón ye ke deng ye kól ta yóm tonok móyón hfunen kuy mò gónó ye angat henek nô.”

Kehewà 24:18

Omin Musis bud mneged ne tódô husek elem yóm lobun. Botong fat folò butengen nô ditu lemen. Là gomongen bè nili tsaptér 25 efet kól bè tsaptér 30. Hono hlolò Dwata ke Musis bè yóm tehe khuseken elem tum lobun ditu ta tfusù bulul gónó Dwata nô. Yó hlolò Dwata du, yóm kmò kehdà le du yóm kun Gónô ne mò kmò le du yó kem ngom nô lemen. Tulónen snéen yóm kul kmò knes yó kem tau gel blóng le ebè Dwata ne yóm kmò kehetfing le kul ebè Dwata.

Kehewà 24:15

Omin le Musis mneged eta yóm Bulul Sinay ne wen lobun lememek eta tfusuen.

Kehewà 24:2

Tek són uu, Musis, hloni ebéléu, là yó kem dumuhem. Ne yó kem dumu tau nô bè but bulul, hol bê le abay mneged.”

Matyu 5:19

Duhen yó, ke wen tau mulé du yó kem hlau yó, balù yó kem olo leneken, ne ke deng mom bud niten kem dumuhen tau mulé du, du se yóm hol glaan bè yó kem tau nogot Dwata bè longit. Okóm yóm tau mimón du yó kem hlau yó, ne lelen tmolok du bè yó kem dumun anì nimón le se kul, angat geta boluyen lem blóng yó kem tau nogot Dwata bè longit yóm tau yó.

Nihimaya 9:13

Ditu bè Bulul Sinay gónóm tehe mnaul ebélê le lemwót gu bè longit ne bè yó gónóm mudél ebélê le. Wen tey hlau tedeng blayem kul ne wen tey hyu hloloem kul.

Isra 7:10

Nim Isra monen ni, tódô hotuhen nawahen hemnagì du yó kem hlau Dwata, lelen mimón du ne gotu toloken yó kem tau Israél yóm kdê deng hlolò Dwata kul.

Kehewà 34:1

Yó mon Dwata mò ke Musis, “Budi mò lewu botu kufil lómón yóm gnan ne bud snulatu du yó kem udél tehe nô bè yóm gnan, yóm deng btuem.

Dwata 5:31

Okóm kóm, budi mulék ebéléu bè ni, naw na gotu tulón kóm yóm kdê hlauhu kul ne yó kem hlolou kul. Tolokem yóm kdéen tau Israél anì yó, nimón le sok le nô ta yóm tonok blayu kul.’ Tu se,” mon Musis, “yóm tehe udél Dwata ebéléu.

1 Bok Kem Tau Hol Geta 19:11

Yó mon Dwata mò du, “Hwai dé ne mdai bè soluhu ta bulul.” Ne igoen mdà bè yó Ilaydya, mius se Dwata, ne tódô sut se yóm tey lenos bong gónón mluy ne tbó yó kem botu. Okóm là kóen nô bè yóm lenos yó Dwata. Kogol yóm lenos, sut se yóm tey linol, okóm bud là nóen bè yóm linol yó Dwata.

Kehewà 19:3

Omin Musis mneged eta yóm bulul yó nan e senlong Dwata. Tnaba Dwata Musis gu ta yóm bulul yó, tulónen du yóm nóyô monen bè yó kem tau Israél, yó kem tau ból Jakub.

Kehewà 32:1

Timbow ton yó kem tau Israél yóm là géhél kosol Musis gu ta yóm bulul gotu le stifun klohok Aron, mon le mò du, “Là kô tngón me du ke tedu gefet bè Musis yóm tau mit tekuy hewà gu bè Idyip. Yó hyu ke moi bélê me yó kem dwata lennged mò malak tekuy.”

Nihimaya 9:14

Deng hetfingem bélê le yóm sotu kdaw mò kdaw le hegnô. Ne wen dumu hlauhem kul hlanem bè Musis yóm tau tóbóng lówóhem.

Kem Lingón 19:12

Laen kô dù tau ke dilóen yóm kun gónó là tedeng. Yó gónóm mon, tnóbóngem ou, Dwata, anì là gwiten dou yóm là tedengen bè yóm là dilóu du.