Kehewà 23:21 - Udél Dwata: Gna Kesfasad ne Lomi Kesfasad

²¹ Hol hnungol ye yóm hógówu tukô gna kuy yó ne hol nimón ye. Hol bê ye abay tô natù, yakà dou boluy du yóm nwiten. Là kô hnifóten du yóm tau tô matù du.

Kehewà 23:21 Referans Kwoze

Kem Lingón 78:56

Baluen ke lómón yó deng nmoen bélê le, sana ktilów le du he yóm Dwata Hol Dandónen Geta. Sana là kimón le du, là móyô le mimón du yó kem hloloen kul.

Kem Lingón 78:40

Deng hilu dulék le ne là mimón ke Dwata bè yóm benwu laen hol wen tauhen, ne tendo heblat le nawahen bè yóm benwu laen hol wen tauhen.

Hibru 12:25

Duhen yó, hol tekuy temgama. Hol bê tekuy là hnungol ke mudél ebélê tekuy Dwata. Ngem yó dé kem tehe tau gnan ekni, tey kegtafak le lan le là hmungol yóm udél Dwata hlanen bè Musis ekni dini te tonok. Sélét mom tekuy ne là megtafaken ke knogol tekuy yóm mudél ebélê tekuy gu bè longit.

Kun Snulat Jan 10:38

Okóm ke nmou, yake hentahu ye, baluen ke là hentahu ye du yóm dou udél. Ke hentahu ye yóm gel nmou, kaem dilô ye yóm knô Mà béléu ne yóm knóu bè Mà.”

Kun Snulat Jan 10:30

Tódô me ssotu Mà.”

Juswa 24:19

Yó bud udél Juswa ebè yó kem tau, monen, “Ngunte nim yu ke gbek ye lemolò ke Dwata. Tódô tngón ye se, du se yóm Dwata laen dù belenen ne tey sidek kélés nawahen du ke wen dumu dwata tnaba ye. Ne ke kenbê ye, là kô nan e hnifót kuy.

Kehewà 3:14

Mon Dwata se, “Yó monem mò kul, ‘Ou se yóm sana Dwata laen kô dù buten ne laen se kô dù tul sónen.’ Hol tulónem kul ou se yóm sana Dwata, yóm hógów kóm ebélê le ni.

Kulasi 2:9

Bè yóm tehe kbalingen tau Krays, nô béléen yóm hol kun kmò Dwata.

Ifisus 4:30

Bê tekuy nmò gónón blat nawa yóm Tulus Dwata. Yó gónó Dwata hemnô du bélê tekuy yóm Tulusen mò ilô yóm kfunen tekuy, ne yóm kdohò yóm kehewaen tekuy elem hulin kdaw.

Dwata 18:19

Sal hlanen bè dou boluy yóm gel tulónen ne angat tnafaku yóm tau là mimón du.

Lista 14:11

Yó udél Dwata ebè Musis, monen, “Deng tódô senflós le kembê do ni kem tau ni. Tódô senflós le là smalig do igoen deng tey dê hentaw ton nmou lem blóng le.

Kun Snulat Jan 5:23

anì kdéen tau gotu madat yóm Ngaen lómón se yóm kadat le ke Maen. Yó se tau là madat du yóm Ngà, là se kô nadaten du yóm Maen, yóm hógów du.

Lista 14:35

Là buden mulék elem baken nim monen ni. Angat gotu dohò eta ye nim monen ni, yu kem tau gel mò sidek deng sensotu ye atul ye matù du. Yóm ket kuy na sotu angat ye gotu matay lem nim benwu laen hol wen tauhen ni. Yóm sana Dwata hol gónó mogot mon du nim ni.”

Kehewà 32:34

Lemwóti ne, nalakem yó kem tau ebè yóm benwu deng tulónu kóm. Hentulónem nawa wen hógówu gu bè longit mò tukô gna kóm. Okóm angat kól yóm kdawu tmafak kul ni kem tau ni lemwót bè yóm salà deng nmò le.”

Kehewà 6:3

Bè yóm tehe kehegfanu bè Abraham ne bè Isak ne bè Jakub, ou se yóm Dwata alì gembek. Okóm là kô deng hetngónu du kul he ke ou yóm sana Dwata hol gónó mogot.

Deng Hegfan 2:23

Tódô gotu hnatayu snéen yó kem tau gel lemolò du. Yó gónóhu mò du yóm yó anì tngón kdéen tau hemtahu béléu yóm klaen dù gebnos béléu, gotu tngónu yóm nô lem hendem le ne yóm dê tô hendeen le. Angat blayu kuy yóm mò balà yóm kuy deng gel nmò, yóm ket kuy na sotu.

Deng Hegfan 2:8

“Budi smulat do ebè yóm fen gel malak yó kem tau hemtahu bè Smirna, monem mò du, ni se udél yóm hol buten ne hol sónen, yóm deng tehe matay, okóm deng bud mowil.” Yó monen,

Deng Hegfan 1:8

Ni se udél Dwata, yóm gónó tekuy mogot, yóm laen dù là gbeken du, monen, “Ou se yóm hol buten ne bud ou se hol sónen.” Ni se udél yóm sana Dwata tenbut bè kbuten efet ni nem kmoen ni, ne du se yóm móyón bud sut.

Kem Lingón 2:12

bè yóm keheglaan ye béléen. Déke kendel msut lebuten, ngem kà tódô ye matay mekto. Tey kehligal le kul yó kem tau tendo gel hofin béléen.

Deng Hegfan 3:7

“Budi smulat do ebè yóm fen gel malak yó kem tau hemtahu bè Filadélfya, monem mò du, ni se udélen ebélê ye yóm laen dù belenen yóm kun kmò, yóm hono tahu yóm gel tulónen. Du se tles mogot du yóm kunsì tehe nogot yóm tehe fuen Dabid. Ke wen lenungkaen, là kô wen gembek bud tmikeb du. Ne ke wen tnikeben, là kô wen gembek bud lemungkà du.”

1 Jan 5:16

Ke ton ye yóm sotu dumu ye hemtahu deng btang elem salà, okóm ke sundu elem hatay laen dù sónen nefeten yóm salaen yó, hol utóm ye bè Dwata, ne blayen du yóm klowil laen dù sónen, syan ke là mefeten elem hatay laen dù sónen yóm salà nmoen yó. Okóm wen se yóm salà hol nefeten elem hatay laen dù sónen. Là monu du mò kuy hni ye bè Dwata yóm tau yó.

Hibru 3:16

Tau du de ni kem tau mon Dwata ni koni, yó kem tehe hmungol du yóm udélen, okóm là hdon le? Yó kem tau monen yó koni, yó sem kdéen tau tehe nalak Musis gu bè Idyip.

Matyu 17:5

Yóm igò Pitér tolo mudél, tódô lememek eta le yóm tey lobun sminang bukay, tódô gungol le yóm mudél gu lemen, monen, “Ni se hol dou Ngà, gónón nô nawahu. Tey kligalu béléen. Hol gel hnungol ye.”

Matyu 1:23

“Angat wen sawang libun tódô mlutut, ne mngà logi, ne boluy le du Imanyuwél (yó lanen yóm boluyen yó, tendo nô bélê tekuy Dwata).”

Jirimaya 23:6

Bè yóm angat kogoten benwu, angat le gotu gewà yó kem tau bè Juda ne laen kô dù hemen le yó kem tau Israél. Yó angat taba le du, ‘Yóm Dwata mit kut tedeng.’

Isaya 57:15

Ou se yóm Dwata hol geta yóm Dwata laen dù belenen yóm hlós mowil laen kô dù tul sónen. Nóe bè yóm hol gónón geta ne hol gónón mólós. Okóm bude nô bè yó kem tau heglaan le knô le ne gel hen-gsel le salà le anì bud huléku ebélê le yóm kgel nawa le do ne anì wen nefet nawa le elem hulin kdaw.

Isaya 45:6

Yó gónóhu mò du yóm ni anì yó, kdéen tau bè klamang benwu angat temngón du ou yóm hol gónó mogot. Laen kô dù dumu Dwata, són o.

Isaya 42:8

Tek són ou yóm Dwata gónóm mogot. Là móyóe du ke wen dwata kéng gbót megdóyón béléu. Tey kekbéu du ke wen dwata lennged gomong megdóyón bè yóm dou nmò.

Isaya 9:6

Yakà wen yóm ngà sut lem blóng tekuy, logi yóm ngà sut yó. Du se hol angat gónó tekuy kmulu. Ne yó angat taba tekuy du yóm alì hulung hmau, yóm Dwata laen dù là gbeken du, yóm Mà tekuy laen dù tul sónen, Ngà yóm Tau Hol Dandónen Geta mit kenek nawa.

Isaya 7:14

Duhen yó, Dwata ne tódô mò béléem ilô. Yó ilô nmoen, wen sotu sawang libun angat mlutut ne angat mngà logi ne angat boluyen du Imanyuwél.

Kem Lingón 83:18

anì tngón le tek sónen uu Dwata, ne tek sónen uu yóm Hol Dandónen Geta mogot klamangen benwu.

Kem Lingón 72:19

Hol bê tekuy lensón yóm kdóyón tekuy du, abay se tey minggel boluyen. Yake gfan bè klamangen benwu yóm tey klinggelen. Dwata he hol dmohò du nim ni!

Dwata 9:7

Bê ye abay klifót yóm tehe kehefebut ye ke Dwata yóm kuy Dwata hol gónó mogot, ditu bè yóm benwu laen hol wen tauhen. Tódô lenwóten bè yóm kdaw ktebel ye yóm benwu Idyip efet ye gefet dini, yó ne yóm tendo ksonol ye ke Dwata.

Kmukum 13:18

Ne yó balaen du yóm hógów Dwata yó, monen, “Moen du ke snólókem boluyu? Baluen ke tulónu kuy, là kô glileb ye du.”

Isaya 9:5

Angat gotu mlób bè ofi tlumfà yó kem sendalù tô gemlà kul yó. Ne yó kem nes le tódô tfeng litô, gotu mlób snéen.

Malakay 3:1

Yó balaen kul yóm Dwata laen dù là gbeken du, monen, “Ngem, angat wen hógówu elem blóng ye mò eles hemtifes yóm angat lanu. Ominen yó tódô mekto sut elem yóm kun Gónô yóm tendo nangat ye, duhen yóm Dwata hol gónó mogot. Yóm hógówu tendo gel nangat ye yó, dohò sut se kun mò hetngón du kuy yóm deng senfasad tekuy.”