Kehewà 20:3 - Udél Dwata: Gna Kesfasad ne Lomi Kesfasad

³ Bê ye abay tmaba ebè yó kem dumu dwata lennged, són ou.

Kehewà 20:3 Referans Kwoze

Dwata 5:7

Bê ye abay tmaba ebè yó kem dumu dwata, són ebéléu.

Matyu 4:10

Bnalà Jisas se, monen, “Mdóhi bè ni, Seitan! Yakà deng monen du bè Sulat Dwata, ‘Béem tnilów Dwata yóm gónóm mogot ne són du hol nimónem.’ ”

Kem Lingón 81:9

Hol béen abay wen dwata lennged tnaba ye. Hol bê ye abay mtud bukol bè yó kem dwata kéng.

Isaya 46:9

Hentulón ye nawa yó kem deng tehe nmou ekni. Hol hentahu ye tek són ou yóm Dwata, laen dù mkél dou.

Dwata 6:5

Hol hewót ye bè nawa ye yóm kbong nawa ye ke Dwata, hotu ye nawa ye ebéléen ne hotu ye gel ye mimón du.Hol bê ye abay klifót yó kem hlau Dwata deng tulónu kuy kemdaw ni.

Jirimaya 25:6

Bê ye abay hebut ou ke mlan bè ktaba ye ebè yó kem dwata kéng ye anì là tnafaku kuy.’

Dwata 6:14

Hol bê ye abay tmaba ebè yó kem dumu dwata lennged, balù kihu bè yó kem dwata yó kem tólóng tau hmilol kuy.

Jirimaya 35:15

Són moen wen kem tugodu hógówu elem blóng ye anì hol tebel ye yó kem sidek gel nmò ye ne tenflok ye tmaba ebè yó kem dwata kéng anì menek klowil ye ta yóm tonok blayu kuy dalang se bè yó kem tehe fù ye. Okóm là kô hnungol ye dou ne là se kô nimón ye do.

1 Kurin 8:6

okóm bélê tekuy, tek sotu yóm Dwata duhen yóm Mà tekuy deng dmimun yóm kentihen, ne du se hol lolò tekuy. Ne tek sotu se yóm gónó tekuy mogot, duhen Jisas Krays. Deng hlan Dwata tahen yóm kedlimunen yóm kentihen, ne bud béléen se gónón lemwót yóm klowil tekuy.

Deng Hegfan 19:10

Botonge tódô hegluduk klohok tihen lanu tô dmóyón du, okóm mom yó monen mò do, “Bê. Béem nmò yó. Tódô senged kut fen gel tóbóng lówó Dwata. Dalang se yó kem dumuhem setwoli là mkó du nawa yóm ktahuhen tehe gel tolok Jisas kul. Olon Dwata dé hol dóyónem.” Yakà ktahuhen du yóm tehe tolok Jisas, yóm ktahuhen yó tehe gel htulón Dwata yó kem tugoden ekni.

Kulasi 2:18

Hol bê ye abay hnungol yó kem tau hegeta le knô le bélê ye, lemwót bè yó kem tódô gel hegfan bélê le kun. Lu se yó kem tau alì dmuil hlolò du kuy yóm keheglaan knô là tahuhen lan le gel tmaba ebè yó kem hógów Dwata nô bè longit. Yó kem tau yó, olo le beyen hegmón laen dù lem. Tódô lemwót bè kehedem tau te tonok yóm nmò le yó.

Flipay 3:19

Yó kem tau yó, angat le gógów elem lanaw ofi, abay se yóm kul knóyô lówó, hol lómón ke yó se dwata lolò le. Deng le mom hegmón du yóm nmò gónó myak. Són yó nô bè nawa le, són yóm nmò tau talak tonok.

Ifisus 5:5

Ni mò hol hendem ye. Yóm tau gel mò samuk ne yóm tau gel hemyak knô, là kóen gomong bè yó kem tau nogot Krays ne Dwata. Senged se yóm tau seglom, abay se yóm gel sen-glomen, yó se henged dwatahen.

Isaya 26:4

Hol snalig tekuy Dwata ne hol bê tekuy abay nmò sónen yóm ksalig tekuy du. Laen kô dù sónen snéen yóm kofinen tekuy.

Kehewà 15:11

Uu se yóm sana kum Dwata hol gónó mogot, dwata du de tô semnged kóm? Tau du de tô mkél kóm bè yóm tey klinggelen yóm kmoem, yóm klaen kô dù belenem? Tau du de tô gembek mò kul yó kem hentaw ton ne yó kem tey deng genbek nmoem?

Isaya 44:8

Hol bê ye abay hlikò, kem dou tau. Lemwót bè hol gnan kdaw efet yóm kmoen ni, eles gel tulónu kuy yóm angat sut. Deng hónô tngón ye se yóm monu ni ne yu se fen gemtanud du. Wen kô dumu dwata? Wen kô dumu dwata mfasang, yóm là deng tngónu du?”

Isaya 43:10

Okóm kuy, kem tau Israél, yu se mò tmanud dou. Deng néléku yu mò dou tóbóng lówó. Yó gónóhu mò du yóm yó anì tngón ye o ne hentahu ye o ne gtukul ye tek sónen ou yóm Dwata. Lemwót bè hol kbuten són ou se yóm Dwata laen kô dù tul sónen,

Kem Lingón 73:25

Laen dù dumu gónón nô nawahu bè longit, són uu. Senged se bè ni te tonok, laen dù dumu gónón nô nawahu, són uu.

Kem Lingón 29:2

Hol dóyón ye yóm tey kegetahen yóm kun boluy Dwata. Dóyón ye Dwata bè yóm tey keklóónen bè yóm klaen dù belenen.

Deng Hegfan 22:9

Okóm mom monen mò do, “Bê. Béem nmò yó. Senged kut mò fen tóbóng lówó Dwata, dalang se yó kem dumuhem setwoli gel tmugod ke Dwata, ne yó kem dumuhem gel mimón du yóm deng eles tulónen bè nim bok ni. Olon Dwata dé hol dóyónem.”

1 Kurin 8:4

Duhen yó, bè yóm snólók ye ke hyu mken du yóm ken deng dsù bè dwata kéng ke là, ni se balau du. Deng hónô tngón tekuy se là kóen tahu yóm dwata kéng, ne deng tngón tekuy snéen tek sotu se yóm hol tahu Dwata.

Kehewà 32:8

Deng sana tebel le yóm lan hlolou kul ne deng wen ngà safì tudu tenwél le gu bè blówón ne tmaba le ebéléen ne demsù le ebéléen. Yó mon le, mò dwata lennged le kun, yóm mit kul hewà gu bè Idyip.

Kehewà 34:14

Béen abay wen bélê ye tmaba ebè yó kem kul dwata abay se tey sidek kélés nawahu du ke wen dwata lennged gónó ye tmaba.

Isaya 42:8

Tek són ou yóm Dwata gónóm mogot. Là móyóe du ke wen dwata kéng gbót megdóyón béléu. Tey kekbéu du ke wen dwata lennged gomong megdóyón bè yóm dou nmò.

Jirimaya 7:9

Igò ye gel mnagaw ne monok ne mò samuk. Gel ye smafà kéng ne deng ye mom demsù ebè Baal ne deng ye mom tmaba ebè yó kem dwata là deng kuy hnikót tngón du.

Husiya 13:4

“Ou se yóm sana kuy Dwata hol gónó mogot, yóm deng tehe lemwà kuy gu bè Idyip yóm benwu tehe gónó ye ghesek. Laen dù dumu Dwata ye, tek sónen o. Laen dù dumu lemwà kuy, tek sónen o.

Kehewà 23:24

Hol bê ye abay mtud bukol bè kul dwata lennged ne hol bê ye abay gbót tmaba ebélê le ne hol bê ye abay lolò yóm kul gel hlolò bè yóm ktaba le ebélê le. Yó hmou kuy, gotu genbà ye yó kem dwata kéng gel nmò le ne gotu hnugón ye yó kem hehek botu gónó le gel tmaba ebélê le.

Kmukum 6:10

Deng tehe tulónu kuy ou se yóm sana kuy Dwata hol gónó mogot. Hol bê ye abay tmaba ebè yó kem kul dwata kéng yó kem tau Amurayt, yó kem tau tehe menwu ta nim tonok gónó ye nô ni. Okóm là kô hnungol ye do.’ ” Yó se udélen ebélê le yóm tugod Dwata.

1 Bok Kem Tau Hol Geta 11:4

Bè yóm deng ktuha Selumun, deng mom nwit yó kem yehenen tmaba ebè yó kem kul dwata kéng. Là hotuhen du nawan smalig bè yóm sana kun Dwata hol gónó mogot, lómón yóm deng tehe nmò maen Dabid.

Kem Lingón 81:10

Yakà ou du yóm sana kuy Dwata hol gónó mogot, yóm deng lemwà kuy gu bè benwu Idyip. Hol ye mnanga anì naw hol henken yu.

Danyél 3:18

Okóm baluen he ke là tnóbóngen kum, là kô me móyô hemtahu bè yóm kóm dwata duhen ke tô me tmaba ebè yóm lennged blówón deng hdaem.”