Kehewà 2:23 - Udél Dwata: Gna Kesfasad ne Lomi Kesfasad

²³ Deng hilu halayen miwes bè yó, matay yóm tau hol geta bè Idyip, okóm sana tolo tey keglayam le he yó kem tau Israél lan le alì hmesek kul. Tey ktaba le ebè Dwata, kóyô le ke wen tmóbóng kul. Yóm ktaba le yó, gefet ditu bè Dwata.

Kehewà 2:23 Referans Kwoze

Sulat Jim 5:4

Ngem yó kem sukéy tehe là hsut ye du bè yó kem tau mò nmò bélê ye, yó se yóm fen kmamo kuy bè Dwata. Hnungol ye dé yóm keslón le kuy yó kem tau mò nmò bélê ye. Deng gefet bè Dwata, yóm gónó mogot hol mfasang bè kdéen yóm ktaba le ebéléen.

Kul Nmò 7:30

Timbow deng fat folò halay Musis kegenen nô ditu bè Midyan, tódô wen hógów Dwata gu bè longit hegfan béléen, bede hlingu bè dilóf ofi, tódô lemtom lem yóm ngà koyu lefungu ditu bè yóm benwu là hyu menwu du, moni bè yóm Bulul Sinay.

Tekang Kbuten 16:11

Angat wen ngaem logi ne boluyem du Ismaél abay se deng gungol Dwata yóm kkikem lemwót bè yóm alì ksidek kegnómem du.

Isaya 19:20

Yó kem nmò le yó mò ilô yóm deng knóen bélê le yóm Dwata laen dù là gbeken du. Ke wen bè yó kem tau bè yó gel hen-gnok yó kem dumu tau ne ke mni le tóbóng bè Dwata, tódô wen tau hógów Dwata mò na a lemwà kul.

Kem Lingón 18:6

Okóm bè yóm alì ksidek kegnómu du, tmabahe ebè Dwata, htóbónge béléen. Tahu se, hnungolen ou bè yóm kun gónó nô. Gungolen yóm tey kehkoduhu béléen.

Kem Lingón 12:5

Yó balà Dwata kul, monen, “Deng tonu yóm alì klunog le yó kem tau laen dù gmò le. Deng gungolu dolong yó kem tau élél hnayam le. Duhen yó, lemwóte naw e lenwà lu, ni se yóm tendo hendeen le béléu.”

Nihimaya 9:9

Tonem se, Dwata, yóm tehe tey keglayam le bè Idyip yó kem tehe fù me ekni. Gungolem se yóm tey kni le tóbóng béléem bè yóm knô le bè Mohin Hulô.

Kehewà 4:19

Gu laan Musis là deng lemwót bè yó bè Midyan, yó mon Dwata mò du, “Béi abay hlikò mulék ebè Idyip. Yó kem tau tehe tô móló hmatay kóm, deng le matay.”

Tekang Kbuten 4:10

Omin Dwata bud mon du, “Tey, Kain, moen ni du ke nmoem nim tey sidek ni? Deng tonu litô twolihem dmanag bè tonok, lómón ke dawaten ou anì bnelesu.

Lista 20:16

Ne yó nmò me, tey kehkodu me bè Dwata anì tnóbóngen mi. Ne tahu se, gungolen yóm kehkodu me yó, yó gónón wen hógówen gu bè longit hwiten ebélê me mò malak kum hewà gu bè Idyip. Ne ni kmoen ni, deng me kól bè Kadis, yóm ngà benwu gkilil bè yóm benwu nogotem.

Kehewà 7:7

Bè yóm kdaw kestulón le bè Faro, deng wolu folò ne halay Musis ne fen wolu folò tlu kun halay Aron.

Isaya 5:7

Yó kem tau Israél lómón ke tonok gónó Dwata mò hulu, yóm Dwata laen dù là gbeken du. Ne yó kem tau semfu gu bè tehe Juda lómón ke lu yóm grép huluhen. Yó hendónen bélê le ke hyu nmò le okóm là. Mom yó nmò le deng le mom monok. Hendónen bélê le ke tedeng yóm kwit le kukum okóm là. Deng mom yó gungolen taba yó kem tau là tedeng kwit le kul. Là gomongen bè nili yóm bérs 8 kól bè 30. Lem ni kem bérs ni yó tulón Isaya yóm khilu dulék Dwata mon du, “Là megewu nawan gemlà kul.” Deng gotu listahen salà yó kem tau. Bérs 8-10 Yóm udélen ebè yó kem tau tendo hlamang tonok anì laen dù gónó le nô kem dumu. Bérs 11-17 Udélen ebè yó kem tau alì móyô mken ne minum okóm balù udì ke hendem le yó kem nmò Dwata. Bérs 18-19 Udélen ebè yó kem gel mò kéng ne hemlò ke Dwata yóm gel mon du, “Géhél htonem kum kun ke wen gbekem. Móyô me mton du ke wen atulem.” Bérs 20 Udélen ebè yó kem tau mon du, “sidek yóm hyu ne hyu yóm sidek.” Bérs 21 Udélen ebè yó kem tau hemdem du, tey le temngón. Bérs 22-23 Udélen ebè yó kem tau gel ma mò wa nawa, fen hewà le yó kem tau wen salaen ne fen tnafak le yó kem tau laen dù salà le. Lemwót bè yóm kdê salà le ni, gotu htaba Dwata yó kem dumu benwu mò na a gembà yóm benwuhen ne yó kem tauhen.

Kehewà 6:5

Ne ni, deng gungolu yóm alì ktaba le ebéléu yó kem tau Israél, yó kem tau alì hesek yó kem tau Idyip. Ne gtulón nawahu yóm tehe kesfasad me le Abraham, yó kem tehe fù le.

Kehewà 6:9

Tulón Musis yó kem tau Israél nim ni, okóm là kô dog hnungol le du abay se deng alì sidek kebà nawa le lemwót bè yóm alì keghesek le.

1 Samwél 12:8

Yóm tehe kógów le Jakub ne yó kem fes lówóhen ebè Idyip ekni, tey kehsidek le kul yó kem tau Idyip ne yó gónó le alì hkodu mni tóbóng bè Dwata ne yó gónó Dwata tehe hógów ke Musis lewu le Aron mò lemwà kul gu bè Idyip ne suen lu ta nim tonok ni.

Kem Lingón 102:1

Ó Dwata, hnungolem dou yóm hnihu, hnungolem dou yóm knihu tóbóng béléem.

Kmukum 4:3

Nim Sisira ni, wen syóm latu klitun bala tók gel niten bè gida ne botong lewu folò halayen kegenen alì hemsidek hmayam kul yó kem tau Israél. Omin le yó he bud hkodu bè Dwata yó kem tau Israél anì tnóbóngen lu.

1 Samwél 9:16

“Haya lómón ni uras, wen tau hógówu ebéléem lemwót bè tonok Bindyamin. Tenwélem hnolo ta kuluhen anì du mò malak yó kem tauhu Israél. Du angat lemwà kul lem tdok yó kem Flistin, yakà deng tonu du yóm alì keglayam le yó kem dou tau ne deng gungolu yóm kni le tóbóng béléu.”

Kem Lingón 102:2

Béem abay henbnos ou bè yóm kdawu glayam. Hgongi dou edini, géhél bnalaem ou ke tmabahe.