Kehewà 15:19 - Udél Dwata: Gna Kesfasad ne Lomi Kesfasad

¹⁹ Bè yóm kul kifal mohin yó kem tau Israél, tódô le mlan lemen bè gónón mékéng tonok. Okóm yóm kul tô kifal yó kem tau Idyip, bud hulék Dwata yóm él ne gotu lemneb yó kem kudà le ne yó kem klitun le ne yó kem tau mit kul.

Kehewà 15:19 Referans Kwoze

Hibru 11:29

Bè yóm tehe klóy le gu bè Idyip yó kem tau Israél, lemwót bè yóm kehtahu le bè Dwata gónó le gemgifal du yóm Mohin Hulô, hol lómón ke tahu lan yóm lolò le. Okóm yóm kul klan lemen yó kem tau Idyip kemtes kul, deng le mom gotu lemneb lan Dwata bud hulék du yóm él sbusung.

Kem Udél Hlalak Tehe Selumun 21:31

Baluen he ke deng eles hentifes yó kem kudà mò gel nit sfatay, okóm són Dwata gónón gel lemwót yóm kegmò.

Isaya 43:17

Hlanen elemen yó kem tey sendalù wen lemwót bè Idyip ne yó kem kudà le demyol klitun tók ne bè yó gónón gemlà kul. Gotu le lemneb lem mohin, balù sotu ke wen mowil bélê le. Lómó kmoen kul lómón ke hmatay nóng solok.

Juswa 4:23

Tulón ye kul yóm kmò kehekti Dwata du bélê ye yóm él yó efet ye deng gotu mifal yóm kdê ye hol lómón yóm tehe kehektihen du bélê ye yóm Mohin Hulô.