Kehewà 14:22 - Udél Dwata: Gna Kesfasad ne Lomi Kesfasad

²² Ne yó kem tau Israél, tódô le kem mógów bè gónón mékéng tonok bè sólól yóm él yó. Ne yóm él tódô sbusung sfatà kilil le.

Kehewà 14:22 Referans Kwoze

Hibru 11:29

Bè yóm tehe klóy le gu bè Idyip yó kem tau Israél, lemwót bè yóm kehtahu le bè Dwata gónó le gemgifal du yóm Mohin Hulô, hol lómón ke tahu lan yóm lolò le. Okóm yóm kul klan lemen yó kem tau Idyip kemtes kul, deng le mom gotu lemneb lan Dwata bud hulék du yóm él sbusung.

Kem Lingón 66:6

Deng wen lan nmoen hlalak lem Mohin Hulô, omin le mifal du yó kem kun tau. Géhél ye dé, hol hnigal tekuy yóm Dwata gembek mò du nim ni.

Kem Lingón 78:13

Senkóhen bè gónón sóól yóm mohin anì gotu le mlan lemen, ne tódô segbusung eta yóm él lómón ke mdà beng.

Kehewà 15:19

Bè yóm kul kifal mohin yó kem tau Israél, tódô le mlan lemen bè gónón mékéng tonok. Okóm yóm kul tô kifal yó kem tau Idyip, bud hulék Dwata yóm él ne gotu lemneb yó kem kudà le ne yó kem klitun le ne yó kem tau mit kul.

Kehewà 14:29

Okóm kul yó kem tau Israél, deng le gotu mlan gu lem mohin bè gónón mékéng tonok, tódô sbusung sfatà kilil yóm tey él.

1 Kurin 10:1

Wen tô hegbelu bè nawa ye, kem dumuhu setwoli, lemwót bè yóm kul kmò yó kem tehe fù me nalak Musis ekni. Bè yóm tehe kógów le, gotu le hgolung bè yóm lobun hógów Dwata mò gónó le galak. Bè yóm kkól le bè yóm Mohin Hulô, gotu le se mifal du, ne laen se dù gfà le.

Nihimaya 9:11

Deng tehe tódô wen lan nmoem lem mohin mò lan yó kem tauhem ne deng nwitem lu lemen mlan le bè gónón mékéng tonok. Okóm yó kem tau kemtes kul, gotu henebem lu bè yóm tey mohin nelem. Gotu le lemneb, lómón kmò le lómón ke lemneb etlaan yóm botu bè yóm tey lewók mohin.

Kehewà 15:8

Bè yóm kyufem eta yóm mohin, tódô segbusung yóm él, lómón kmoen lómón ke mdà beng. Bè yó bè yóm gónón alì nelem mohin tódô baling mgel yóm él.

Sikaraya 2:5

Yakà ou du yóm ofi beng hmilol yóm syudad Jirusalim ne bud ou yóm klóón tendo nô lemen. Dwata se mon du nim ni.’ ”

Juswa 3:17

Lemwót yó kem tau fen mit yóm Slungan Fasad yóm Slungan yóm sana Dwata hol gónó mogot, fen le mdà hol bè gónón sóól Él Jurdan bè yóm gónón mékéng tonok. Ngang le mdà bè yó efet le deng gotu mius yóm kdéen tau Israél mlan le bè gónón mékéng tonok.

Juswa 4:22

hol tulón ye kul ni kem botu ni mò heftulón du bè nawa ye yóm tehe kifal ye yóm Él Jurdan, tódô ye mlan lemen bè gónón mékéng tonok.

1 Samwél 25:16

Bè ktahuhen, kifu ne kemdaw lómón ke lu yóm beng hmilol kum dalang se yó kem ubiha me.

2 Bok Kem Tau Hol Geta 2:8

Omin Ilaydya mlus yóm nesen lafin tofi ta, ominen lemulun du ne fesen bè yóm Él Jurdan. Tódô mesgólól yóm él yó, ne mlan le lemen bè gónón mékéng tonok yóm lewu le.

Kem Lingón 74:15

Uu se hesfut él ne hlel yó kem él mlel, ne bud uu se hekti yóm él mlel tehe là ktihen.

Kem Lingón 136:14

Ne hlanen lemen se yó kem tau Israél. Laen kô dù tul sónen yóm kbong nawahen tekuy là monolen.

Isaya 43:16

Yóm tehe yu ekni, nmò Dwata yóm lan lem mohin igò yóm él tódô temgulung.

Isaya 63:12

Nô se yóm Dwata alì mfasang, yóm alì dê tehe nmoen hlanen bè Musis? Botong gbeken semkó yóm mohin, hnayahen lan yó kem tauhen ditu tlem él. Yóm nmoen yó, htótólen boluyen ne laen dù sónen yóm któtólen yó. Nô se kun du yóm kmoen ni?” Bè yóm tehe kalak Dwata kul là kô le tlokob. Tey mbegel kdà le, hol lómón kdà yó kem kudà tabag.

Juswa 3:16

tódô teflok se lel yóm él yó ne tódô segbusung eta ditu fi leged yóm syudad boluyen Adam yóm syudad klohok Saritan. Bong yó dum lelen e mool ebè Mohin Héét, gotu kti ne gbek le mifal moni bè Jiriku yó kem tau Israél.

2 Bok Kem Tau Hol Geta 2:14

Fes Ilaysa bè él yóm nes Ilaydya yó koni, hgelen udélen, monen, “Nô se Dwata du, yóm kun Dwata gónó mogot Ilaydya?” Tikóng deng kfesen yóm él, ominen tódô mesgólól se yóm él, ne tódô mifal etu fatu Ilaysa mlan lem yóm gónón mékéng tonok.

Kem Lingón 106:9

Dóken mesgólól yóm Mohin Hulô. Tahu se, tódô gfan yóm tonok mékéng. Nalaken yó kem tau Israél mlan etlem sokol mohin, bè gónón mékeng tonok, hol lómón kékéng yóm tonok bè yóm benwu laen hol wen tauhen.

Kem Lingón 136:13

Hol dóyón tekuy Dwata, yóm semsólól yóm Mohin Hulô. Laen kô dù tul sónen yóm kbong nawahen tekuy là monolen.