Juswa 6:3 - Udél Dwata: Gna Kesfasad ne Lomi Kesfasad

³ Yó nmoem nwitem yóm kdê sendaluem, lenibut ye yóm syudad Jiriku. Nem dulék ye lemibut du bede ket sulék sendaw.

Juswa 6:3 Referans Kwoze

2 Kurin 4:7

Bélê me kum kem tau mit du nim Tulón Hyu ni, hol lómón ke kuleng tonok yóm klowil me, bede wen yóm alì mebtes nô lemen. Yó gónó Dwata hmingón du bè kuleng anì gfan yóm là kewóten bélê me yóm tey kfasangen yóm tulón nwit me, okóm tódô lemwót bè Dwata.

Lista 14:9

Bê ye mom natù Dwata dé ne bê ye abay knikò tu kem tau menwu ditu. Là kóen legen keglà tekuy kul tu kem tau tu abay se tendo eles nô bélê tekuy Dwata ne laen kô dù gónó le hofin se kul. Yó gónóm mon, hol bê ye abay hlikò.”

Juswa 6:7

Omin Juswa mudél ebè yó kem sendaluen, monen mò kul, “Lemwót tekuy ne, lenibut tekuy yóm syudad. Eles wen kem sendalù mò hol tukô gna fen mentey yóm Slungan Fasad.”

Juswa 6:14

Bè nim gewuhen kdaw ni, bud lenibut le sulék yóm syudad yó, omin le bud mulék ebè kamfù le. Nem kdaw le mò du nim ni.

Juswa 6:2

Okóm yó udél Dwata ebè Juswa, monen, “Deng blayu elem hólólem yóm syudad Jiriku ne yóm tau hol geta bè yó ne yó kem sendalù alì lóbô le.

Juswa 6:4

Eles mung kuy yó kem tau gel blóng ebéléu mit yóm Slungan Fasad. Hitu bélê le fen mógów tukô gna yóm Slungan Fasad yó, sket kul kmulóng féw. Bè yóm ghituhen kdaw yó nmò ye, hitu dulék ye mógów lemibut yóm syudad yó. Ne igò ye lemibut du, igò le mféw yó kem tau gel blóng ebéléu.

Juswa 6:11

Tahu se, sulék le mit du lemibut yóm syudad yó yóm Slungan Fasad, omin le semfulék ebè kamfù le ne bè yó gónó le tungô.