Juswa 1:9 - Udél Dwata: Gna Kesfasad ne Lomi Kesfasad

⁹ Ni hol monu mò kóm, hol hotuhem gelem ne hol hfólem nawam. Béi abay hlikò ne béi abay htakas, yakà ou du yóm sana kóm Dwata hol gónó mogot ne tendohe nô béléem balù kihu gónóm e solu.”

Juswa 1:9 Referans Kwoze

Tekang Kbuten 28:15

Hol béem klifót, elese tendo nô béléem ne tendo kenlungu uu balù nô gónóm e solu ne angat bud nitu uu semfulék ebè nim benwu ni. Là kô bayau kóm. Angat gotu dnohou yóm kdê deng fasadu kóm.”

Kem Lingón 46:7

Nô bélê tekuy yóm Dwata laen dù là gbeken du, yóm Dwata hol gónó tekuy mogot. Du se yóm Dwata tehe Jakub, ne du se mò gónó tekuy e mlo.

Isaya 43:1

Yu kem tau Israél, ni udél yóm Dwata tehe mò kuy, monen, “Hol bê ye abay hlikò, angat lenwau yu. Deng tnabahu boluy ye, yu se yóm dou tau nfun.

Isaya 43:5

Hol bê ye abay hlikò, tendohe nô bélê ye. Angat bud huléku yó kem kuy dumu deng sekla ebè yóm hol kuy benwu. Bè yóm angat kulék le yó, wen se bélê le lemwót bè doli benwu ditu fi dmata kdaw ne doli benwu ditu fi desdef.

Kmukum 6:14

Omin Dwata mdók ke Gidyun, monen mò du, “Lemwóti ne, hotuhem gelem anì hewaem lu lem hólól yó kem tau Midyan yó kem tau Israél. Ou se nim hol mdók kóm ni.”

2 Samwél 13:28

Omin Absalum mon du bè yó kem tóbóng lówóhen, “Nangat ye ke deng alì lengel Amnon, ne ke wen ilô nmou bélê ye, hnatay ye. Bê ye abay hlikò, ou se mdók kuy. Hfól ye nawa ye, hnatay ye.”

Kul Nmò 4:19

Okóm bnalà Pitér ne Jan lu, mon le, “Bè kuy kmò kehedem du, mahi du hyu bè kton Dwata kum, ke nimón me yu duhen ke Dwata?

Dwata 31:28

Gotu sentifun ye lu edini yó kem tuha gónó ye gel galak ne yó kem genlal anì tulónu kul ni kem ni. Tnabahu longit ne tonok mò gemtanud yó kem tau Israél.

Juswa 1:10

Omin Juswa htaba yó kem tuha gónó le gel galak yó kem tau Israél, monen mò kul, “Hol ye mógów ebè klamang yóm kamfù tekuy anì tulón ye yó kem tau Israél eles le hemtifes ken, abay se tek tlu ni ne duen kifal tekuy du yóm él Jurdan ne kled tekuy du yóm tonok blay Dwata tekuy yóm sana kut Dwata hol gónó mogot.”

Juswa 1:17

Nimón me uu lómón yóm tehe kimón me ke Musis. Yó hem kóm sana Dwata hol gónó mogot tendo nô béléem lómón yóm tehe knóen bè Musis.

Juswa 8:1

Yó bud mon Dwata mò ke Juswa, “Gotu nwitem yóm kdê sendaluem na ye e nundug yóm syudad Ay. Béi abay hlikò ne béi abay htakas. Hegmou uu bè yóm tau geta bè yóm syudad yó ne suu lem hólólem yó kem tauhen ne yóm syudaden ne yóm tonoken.

Juswa 10:8

Bè yóm kewót le, yó mon Dwata mò ke Juswa, “Hol béi abay hlikò bélê le. Deng blayu lu elem hólólem. Bà sotu bélê le ke gembek kóm.”

2 Tutul Israél 15:7

Okóm ni, kem logi bè benwu Juda hol ye hbegel, ne hfól ye nawa ye, abay se wen ofol ye du yó kem nmò ye.”

Isaya 41:10

Hol bê ye abay hlikò, tendohe gel nô bélê ye. Ou se yóm kuy Dwata, laen kô dù knikò ye. Tendo gel benlayu yu kgis ne tendo tnóbóngu yu. Sónmou mofin kuy ne lenwau yu.

Tekang Kbuten 39:2

Bè yóm kbaling Jusif hesek bè Putifar tendo eles nô béléen Dwata, yó gónón hyu uléken bè ket yóm gel nmoen. Tódô nô bè yó bè gónô yóm tau Idyip amohen.

Tekang Kbuten 39:3

Tódô dilô yóm amohen yóm tendo knô Dwata bè Jusif ne yó gónón hyu uléken bè yóm ket gel nmoen bè yóm amohen.

Dwata 31:23

Omin Dwata bud mudél ebè Juswa yóm ngà Nun, monen mò du, “Eles hfólem nawam ne elesi htigel. Uu se mò fen bud tles malak kul yó kem tau Israél ebè yóm tonok fasadu kul ne ou se tendo nô béléem.”

Juswa 1:18

Ke wen bélê me hemda kóm ne là nimón le du yóm hmoem kul, tódô hnatay kmò du. Duhen yó, holi hgel kut ne hol hfólem nawam.”

Juswa 3:7

Yó udél Dwata ebè Juswa, monen, “Yóm nmou bélê ye kemdaw ni, mò gónó le madat kóm yó kem tau Israél mò tau malak kul. Ne bè yó gónó le dmilô du yóm knóu béléem lómón yóm tehe knóu bè Musis.

Juswa 6:27

Duhen yó, tódô senflós Dwata nô bè Juswa ne tódô lenngeben yóm klamang yóm benwu yó yóm tey któtól Juswa.

1 Samwél 10:7

Ke deng kól béléem ni kem ilô ni tódô nmoem yóm hyu béléem, yakà nóen béléem Dwata.

1 Tutul Israél 28:20

Yó bud udél Dabid ebè yóm ngaen Selumun, monen, “Hol hotuhem gelem, ne hfólem nawam, hol nmoem yóm hmò Dwata kóm. Béi abay hlikò, ne béi se abay htakas balù yóm tey kbong yóm hmò Dwata kóm. Abay se yóm Dwata yóm sana Dwata hol dou gónó mogot, tendo nô béléem. Là kô bayaen kóm, ne là se kô tnagaken kóm efet gotu gdengem yóm kdê wen muhen bè yóm ktaba ye ebè Dwata lem yóm Gónô Dwata hefdaem.

Isaya 8:12

“Hol béi gbót bè kul atul yó kem dumum tau ne béi likò du kóm yóm kul gel knikò.

Danyél 10:19

Yó bud monen mò do, “Béi abay hlikò, Danyél, yakà tey kbong nawahen kóm Dwata. Dwata he henek nawahem, hekgisi ne hgelem nawam.” Tahu se, yóm igoen mudél ebéléu yó, bud mulék kgisu ne monu mò du, “Yó ne Sér, henlósem yóm tulónem do, yakà deng hekgisem o.”

Hagay 2:4

Okóm ni, béen abay sidek kegnóm ye du. Tódô henlel ye mò nmò, yakà tendohe eles nô bélê ye.

Hagay 2:5

Bè yóm tehe kehewà yó kem fù ye gu bè Idyip, tehe fasadu kul yóm tendo eles knóu bélê le. Senged se nim kmoen ni, elese tendo gel nô bélê ye. Yó gónóm mon, hol bê ye abay hlikò. Là buden legen ne yóm angat ksinsigu longit ne tonok ne mohin.