Jirimaya 6:11 - Udél Dwata: Gna Kesfasad ne Lomi Kesfasad

¹¹ Yóm kebutem kul, Dwata bud gnómu snéen dou, là gbeku du ke là benkasu du bélê le.” Ne yó bud udél Dwata ebéléu, monen, “Gotu sulék kokem eta yó kem tau bè Jirusalim yóm tey kebutu kul, balù yó kem ngà le là mdengen bè lan, dalang se yó kem logi lomi lemnok tolo sbung, kkólen bè yó kem tau syehen ne yó kem tuha bélê le, gotu sulék kokem eta le.

Jirimaya 6:11 Referans Kwoze

Jirimaya 20:9

Okóm ke monu tódô klifótu ne Dwata ne laen dù bud tulónu mlan bè boluyen. Yó mò do yóm udélem bnosu lem hendemu, hol lómón ke ofi mken lem but blututu ne mken lem tiolu. Là bud gafasu du ne ke là tulónu du yóm htugodem dou.

Jirimaya 9:21

Deng kól lem gónô tekuy ne yóm hatay lanen tembó beng. Dalang se ebè gónô bong yó kem tau mogot benwu deng kól lemen hatay. Deng kól bè yó kem ngà tekuy, là bud le là mdengen bè yó kem lan. Ne yó kem logi lomi lemnok, là kô le bud gel stifun lem fedyan, abay se deng kól lem blóng le hatay.”

Mika 3:8

Okóm béléu dou, deng sù Dwata béléu yóm kun Tulus ne yóm kun kfasang. Ne hetngónen do yóm kukum tedeng ne benlayen o là klikò tmulón du bè yó kem tau Israél yó kem salà le.

Deng Hegfan 16:1

Ominu bud mungol yóm tey udél bong gu lem yóm Gónô Dwata, mudél ebè yó kem hitu hógów Dwata, monen, “Lemwót ye ne. Ne ye e kok te tonok yó kem hitu tukung gónón nô yóm tey lebut Dwata kem tau.”

Kul Nmò 18:5

Timbow gdek le Silas lewu le Timuti gu bè prubinsya Masdunya, són yó ne nmò Pol, són hetngón bè yó kem Ju yóm tulón nwiten, duhen Jisas se yóm Misaya.

Kul Nmò 17:16

Bè yóm igò Pol mangat ke Silas lewu le Timuti bè Atin, tey sidek kegnómen du, abay se tey dê tonen bè yóm benwu yó yó kem dwata kéng tódô lenbù nmò le.

Kul Nmò 4:20

Là kô gbek me temflok tmulón du yóm deng ton me ne yóm deng gungol me.”

Kun Snulat Luk 17:34

Tódô tulónu kuy ktahuhen,” mon Jisas, “ke kifu kkólen yóm Ngà Tau, ke wen lewu tau stungô, sotu nwiten, ne sotu tebelen.

Isikél 3:14

Nkayen o yóm Tulus Dwata, ominen mit do. Tey sidek kegnómu du yóm kwiten do yó lemwót bè yóm deng gungolu ne yóm tey khééten yóm hmoen do. Okóm yóm Dwata, tey mbegel kogoten do.

Jirimaya 18:21

Duhen ni Dwata, tódô bayaem lu lemnus yó kem ngà le. Tódô bayaem lu matay bè sudeng ne yó kem tau matul do ni. Yó kem yehen le, hboluhem lu laen dù ngà. Dalang se yó kem tuha bélê le, hnatayem lu bè yóm des tódô sut lem benwu. Ne yó kem lomi lemnok bélê le, hfatayem lu bè gida.

Jirimaya 7:20

Duhen ni, ni se udél yóm Dwata hol dandónen geta, monen, “Tódô koku eta nim benwu ni yóm tey lebutu. Koku eta yó kem dou tau ne eta yó kem ógóf le. Bud koku eta yó kem koyu ne eta yó kem hulu. Nim lebutu ni, hol lómón ke mkal dilóf ofi ne laen kô dù tau gembek hmatay du.”

Isaya 40:30

Balù yó kem logi lomi lemnok, gel gnóm le klunog le. Botong le gel masà lemwót bè alì ksidek kliteg le.

Jirimaya 15:6

Yu se yó kem tau deng kembê dou,” mon Dwata. “Deng knogol ye ou. Duhen ni, tayalu eta sigelu mò gemlà kuy. Denge tey tmakas ne hembala du yó kem sidek tendo gel nmò ye.

Jirimaya 15:17

Là kô deng namau du udasu bè yó kem dumu tau bè yóm gel kehligal le. Lemwót bè kimónu yóm hmoem dou, laen kô dù dumuhu balù sotu. Ne gele lembut bè yó kem sidek gel nmò le.

Isikél 3:3

Yó monen mò do, “Kenem yóm kdéen.” Yóm kkenu du, hol lómón kmihen tneb.

Jirimaya 9:20

Yó bud udél Jirimaya, monen, “Yu kem libun, hol hnungol ye yóm kun udél Dwata, hol henklingu ye yóm udélen ebélê ye. Tolok ye lu langag yó kem ngà ye libun ne bud tolok ye lu lemanu yó kem wè ye.