Jirimaya 42:2 - Udél Dwata: Gna Kesfasad ne Lomi Kesfasad

² Jirimaya yóm tau tugod Dwata. Yó mon le mò du, “Holi mni kum bè yóm sana kut Dwata hol gónó mogot. Tonem ni là kô tekuy hol bud wen. Là mkélen bè yóm gnan, tehe tey kwen tekuy.

Jirimaya 42:2 Referans Kwoze

Jirimaya 36:7

Ke deng gungol le yóm alì khééten yóm kebut Dwata kul, kaem knogol le yó kem sidek nmò le ne mni le seflifót bè Dwata.”

Sulat Jim 5:16

Yó gónóm mon, hol ye gel seflifót, ne hol ye gel stóbóng mni bè Dwata yóm kdê ye anì kó Dwata bélê ye ke wen tenduk ye. Yóm tau hyu kmoen, tey mtud yóm knihen bè Dwata.

Kul Nmò 8:24

Omin Simun mon du mò kul le Pitér ne Jan, “Hol hni ye se o bè Dwata anì là suten béléu yóm monem yó.”

Isaya 37:4

Deng hógów yóm tau hol geta bè Asirya yóm sotu geta bè yó kem genlalen anì nan e hennê yóm Dwata là matayen. Yake yó hem Dwata gónóhem mogot hol mungol du yóm kehnê le yó anì gotu tnafaken lu. Duhen ni, holi mni kut bè Dwata bè yó kem dù tau tebel bélê tekuy.”

Isaya 1:9

Ke là lemwóten bè Dwata yóm Dwata laen dù là gbeken du, deng gotu genbà le ne Jirusalim, balù udì ke wen dù tebel du hol lómón yóm tehe kegbà yó kem syudad Sodom ne Gomora.

1 Samwél 12:19

Yó udél le hkodu bè Samwél yóm kdê le, mon le, “Mnihi bélê me bè yóm sana kóm Dwata hol gónó mogot anì là matay me. Yakà deng mom bud tennù me yóm kdê salà me lan me mni bè Dwata tau hol geta mò malak kum.”

1 Samwél 7:8

Ne yó udél le hkodu bè Samwél, mon le, “Béem tenflok kut mni tóbóng bè yóm sana kut Dwata hol gónó mogot anì lenwaen tekuy lem tdok yó kem Flistin.”

Jirimaya 37:20

Duhen ni, uu se gónóhu mogot, hkoduhe béléem béem abay bud heblanggù ou ne ditu laan tonok bè gónô Junatan yóm tau gel smulat bè kukum. Ke bud heblangguem ou ditu angate matay ditu.”

Jirimaya 37:3

Sotu kdaw bè yó, yó nmò Sidikaya, wen lewu tau dóken ebè Jirimaya, duhen Jihukal yóm ngà Silimaya logi, lewu le Sifanaya yóm tau gel blóng le ebè Dwata ngà Maasiya logi. Hógówen lu etu bè Jirimaya anì mon le mò du, “Ó Jirimaya, holi mni kut bè Dwata yóm sana kut Dwata hol gónó mogot. Hnihem kut yóm kbenwu tekuy.”

1 Bok Kem Tau Hol Geta 13:6

Yó mon yóm tau hol geta bè yóm tau Dwata, “Ni hkoduhe béléem, mnihi do bè yóm sana kóm Dwata hol gónó mogot anì bud mulék hyu nim sigelu.” Tahu se, mni bè Dwata yóm tau Dwata yó, ne mulék hyu se yóm sigel yóm tau hol geta yó.

Dwata 28:62

Balù yóm deng tey kból ye ni kmoen ni, lómón kwen ye yó kem blotik bè longit, okóm bè yóm kdaw yó angat tek hilu dù mowil abay se là kô nimón ye ke Dwata yóm sana kuy Dwata hol gónó mogot.

Kehewà 8:28

Yó mon Faro, “Ke là kat ye hlayuk, hlusu yu anì na ye e demsù ebè yóm kuy Dwata hol gónó mogot bè yóm benwu laen hol wen tauhen. Holi mni béléu bè Dwata.”

Matyu 24:22

Okóm lemwót bè yóm kkodu Dwata kul yó kem tau deng néléken, yó gónón là hol hegen du yóm alì hlayam yó. Ke hegenen, bà sotu ke wen tau bud mowil te tonok.

Jirimaya 42:20

Deng tnondo ye ou bè yóm kdók ye dou mni bè yóm sana kut Dwata hol gónó mogot. Yó mon ye, ‘Hol tulónem kum yóm udél yóm sana kut Dwata hol gónó mogot anì nimón me.’

Isaya 1:15

Ke sok gel hdà ye hólól ye bè yóm gel kni ye ebéléu, là kô kenmónu kuy. Balù hilu dulék ye mni ebéléu, là kô naw e hnungol kuy, yakà hónô litô tau deng bnonok ye lem yóm hólól hdà ye.

1 Samwél 12:23

Ke béléu do, ke là henlelu du mni bélê ye bè Dwata, salau bè Dwata se yó ne là kóe móyô mò du yóm yó. Ne henlelu tmolok du kuy yóm lan hyu ne yóm lan tedeng mò lolò ye.

Dwata 4:27

Ke là mimón ye, angat gotu senkla Dwata yu ebè yó kem tólóng benwu ne là holen wen bélê ye bud mowil bè yó kem benwu gónó Dwata e mlo kuy.

Kehewà 9:28

Hol ye mni kum bè Dwata. Geblaen ni ne yóm tey leték ne nim tey bulók kulón ni. Ni fasadu kuy, hewótu yu ne là bud nalihu kuy bè ni ne.”

Jirimaya 15:11

Yó balà Dwata do, “Ó Jirimaya, ou se fen mofin kóm anì laen dù hemenem. Yó kem tau kembê kóm yó, angat le hkodu béléem anì uu fen mni béléu anì tnóbóngu lu ke kól yóm kdawen wen gfà le, yóm kdaw le hol glayam.

Jirimaya 38:14

Sotu kdaw bè yó, hangay Sidikaya Jirimaya yóm tau tugod Dwata, etu bè yóm getluhen bak tikeb bè Gónô Dwata. Bè yóm keston le yó mon yóm tau hol geta mò ke Jirimaya, “Wen snólóku béléem, hol tulónem dou yóm ktahuhen.”

Jirimaya 40:15

Kogolen bè yó, lemwót Juhanan lifut stulón ke Gidalaya anì du fen lifut hmatay ke Ismaél, monen mò ke Gidalaya, “Moen ke hnatayen uu? Tedu se tô kmò le du yó kem tau lomi semfulék ebè Juda ni ke tói lana lem blóng le? Igò tekuy là hol wen ke tô tekuy gotu lana.”

Amus 7:2

Bè yóm hton Dwata do yó, tonu yó kem tey tlangas mfól, gotu ken le yóm kdéen tmowok te tonok. Ominu mon du, “Ó Dwata hol dandónen geta, hkoduhe béléem, hol hnifótem mi yó kem tauhem. Ke hógówem yó kem tey tlangas wen yó, tedu se tô klowil me du? Igò me là bud hol wen.”

Dwata 28:63

Bè nim kmoen ni, tey kehyu nawa Dwata bè yóm bud kehguléken klowil ye ne bè yóm tey kehbólen kuy. Okóm lemwót bè yóm là kimón ye elem hulin kdaw, bud hyu se nawahen bè yóm angat ktafaken kuy ne bè yóm angat keglaen kuy. Angat gotu hlanahen yu ta yóm tonok móyón nfun ye ni.

Kem Lingón 119:170

Hol hnungolem do yóm knihu béléem, lenwaem o mlan bè yóm deng fasadem do.

Isaya 42:20

Yu kem tau Israél, deng tey dê ne ton ye nmou, okóm là kô kenmón ye du. Igoen se wen klingu ye, okóm là kô ye mungol.”

Jirimaya 2:27

Deng le gotu menmà bè yóm dwata lenbù nmò le bè koyu ne menyê le bè yóm sotuhen nmò le gu bè botu. Deng knogol le ou, okóm ke wen gfà le, bud le hkodu béléu anì lenwau lu.