Jirimaya 23:8 - Udél Dwata: Gna Kesfasad ne Lomi Kesfasad

⁸ Mom yó angat mon le, ‘Smafà me ebè yóm Dwata laen dù tul katayen, yóm deng mit kul semfulék yó kem tau Israél ebè yóm kul benwu, gu le bè yóm benwu fi bwak ne gu bè yóm kdê dumu benwu deng tehe gónón e hegef kul.’ Omin le yó he henek bè yóm hol kul benwu.”

Jirimaya 23:8 Referans Kwoze

Isikél 34:13

Angat bud nwahu lu gu bè yó kem tólóng benwu gónó le nô ne gotu sentifunu lu ne bud nwitu lu semfulék ebè yóm hol kul benwu bè Israél. Hótóbu lu bè yó kem bulul bè Israél ne bè yó kem kilil él gónó le gel nô yó kem tau.

Sifanaya 3:20

Bè yóm kdaw yó, angat sentifunu yu ne bud nitu yu semfulék ebè yóm sana kuy benwu. Htótólu yu bè klamang benwu talak tonok ne ya tey kdóyón le kuy bè yóm bud khuléku du ebélê ye yóm tey kehyu klowil ye. Angat hol kuy mata se mton du nim ni. Ou se Dwata nim mudél ni.”

Isikél 37:25

Angat le nô bè benwu Israél, yóm benwu tehe gónó le nô yó kem tehe fù le, yóm benwu tehe blayu ke Jakub, yóm sotu tau tóbóng lówóhu. Laen kô dù sónen yóm knô le bè yó, dalang se yó kem ngà le kkólen bè yó kem angat lugod le elem hulin kdaw. Ne Dabid yóm tau tóbóng lówóhu, angat laen kô dù sónen yóm kegetahen bélê le.

Isikél 36:24

Ni se angat nmou, gotu bud sentifunu yu gu bè yó kem benwu deng gónóhu e semkla kuy ne nwitu yu semfulék ebè yóm hol kuy benwu.

Jirimaya 23:3

Okóm yó angat nmou bè yó kem dou tau, gotu bud sentifunu lu yó kem dù tebel bè yó kem benwu deng tehe gónóhu e semkla kul. Gotu bud nwitu lu semfulék ebè yóm tehe kul benwu ne angat tey bud kból le bè yó.

Isaya 14:1

Angat bud mulék kodu Dwata kul yó kem kun tau Israél. Angat bud néléken lu mò hol kun tau nfun. Angat bud huléken lu ebè yóm sana kul benwu ne wen se kem tólóng tau angat mung menwu bélê le bè yó.

Jirimaya 29:14

Tahu se, angat ton ye o,” mon Dwata. “Angat bud nwitu yu semfulék ebè yóm hol kuy benwu. Angat gotu sentifunu yu gu bè yó kem benwu deng gónów e semkla kuy, nwitu yu semfulék ebè yóm hol kuy benwu.”

Jirimaya 30:3

Abay se angat wen kdawen bud kehguléku klowil le yó kem dou tau bè Israél ne bè Juda. Bud nwitu lu semfulék eta yóm tonok tehe blayu yó kem tehe fù le ne angat kul yóm tonok ni bud le nô tahen. Ou se Dwata nim mudél ni.”

Jirimaya 30:10

Ó kem dou tau, hol bê ye abay hlikò. Kem tau Israél, hol bê ye abay htafa nawa ye. Yakà bud nitu kuy semfulék ebè benwu ye gu bè yó kem tey benwu mayuk. Yó kem ngà ye, tebel le ne yóm benwu gónó le e megef kul. Angat le semfulék yó kem tau Israél ne angat menek kbenwu le ne laen kô dù bud knikò le.

Jirimaya 31:8

Tahu se,” mon Dwata, “angat bud nwitu lu semfulék lemwót gu tebwak ne bud sentifunu lu lemwót ditu bè són tonok. Angat le bud mung se kul yó kem tau butô ne yó kem tau tugô. Dalang se yó kem libun tolo mlutut ne yó kem libun móyón kmuleng blutut le. Angat tey kwen le bè yóm bud kesfulék le.

Jirimaya 32:37

Angat bud nwitu lu semfulék yó kem dou tau gu bè yó kem benwu deng gónóhu e semkla kul lemwót bè yóm tey kebutu. Hol ebè nim syudad ni se gónóhu bud e mit kul. Tódô menek ne kbenwu le ne laen kô dù hemen le.

Juwél 3:7

Okóm angat gotu bud nwitu lu semfulék gu bè yó kem benwu deng gónó ye hembalù kul ne angat huléku eta ye yóm deng nmò ye bélê le.

Isikél 36:35

Ne bè yóm kdaw bud kwitu kuy semfulék, yó angat mon yó kem dumu tau hmilol kuy, ‘Yóm tonok deng gbayà ni, bud baling lómón yóm tehe hungul koyu boluyen Idin ekni. Yó kem syudaden tey tehe kegbà le ne tódô gbayà, okóm ni deng bud wen tauhen ne mbegel beng hilolen.’