Jirimaya 11:8 - Udél Dwata: Gna Kesfasad ne Lomi Kesfasad

⁸ Okóm yó kem fù ye, là kô kenmón le dou. Balù udì ke hnungol le ou. Mom hgel le kulu le, lolò le yóm óyô le mò sidek. Lemwót bè yóm là kimón le, yó gónóhu heglumfak du kul yóm kdê tafak deng nô lem yóm tehe senfasad me.’ ” Là gomongen bè nili yóm bérs 9 kól bè bérs 23. Yó tulónen bè ni kem bérs ni yóm kkogol le ke Dwata yó kem tau Israél ne yóm angat keglà Dwata kul dalang se yóm benwu le, lemwót bè yóm là kimón le du yóm deng tehe senfasad le Dwata. Yó udél Dwata ebè Jirimaya, monen, “Hol béi abay bud mni béléu bè yó kem tau yó. Béem bud nkik lu ne, abay se là bud hnungolu kul ke hkodu le béléu.” Yó nmò yó kem tau bè yóm kun benwu Jirimaya, deng mom nifis hnatay le Jirimaya ke wen udél Dwata bud tugoden. Okóm deng eles fasad Dwata yóm keklungen du ne yóm angat ktafaken yó kem tau tô hmatay du.

Jirimaya 11:8 Referans Kwoze

Jirimaya 7:24

Okóm yó kem tehe fù ye yó, là kô hnungol le dou ne là se kô kenmón le do. Deng mom yó nmò le yóm sidek lemwót bè yóm kgel kulu le ne yó kem sidek gel nô bè nawa le. Són moen temnù yóm ksidek nmò le, deng lana yóm hyu tehe tonu bélê le.

Jirimaya 7:26

Okóm balù sotu bélê ye ke wen hmungol kul duhen ke kemmón kul. Mom hgel ye kulu ye ne knogol ye o senta yóm kul kkogol do yó kem tehe fù ye.

Jirimaya 35:15

Són moen wen kem tugodu hógówu elem blóng ye anì hol tebel ye yó kem sidek gel nmò ye ne tenflok ye tmaba ebè yó kem dwata kéng anì menek klowil ye ta yóm tonok blayu kuy dalang se bè yó kem tehe fù ye. Okóm là kô hnungol ye dou ne là se kô nimón ye do.

Jirimaya 3:17

Bè yóm kdaw yó, yó angat boluy Jirusalim, Gónón Myón Kmamal Dwata. Ne angat le gotu stifun bè yó yóm kdéen but tau bè klamangen benwu mò gónó le hegfan du yóm kadat le dou. Là bud lolò le du ne yó kem sidek tehe gel nmò le lemwót bè yóm kgel kulu le.

Sikaraya 7:11

Yó kem tehe fù ye ekni, là kô hnungol le du yóm udélu ni. Tey kehgel le kulu le, mom nseng le klingu le anì là gungol le du.

Nihimaya 9:29

Deng eles hetgamahem kul, Dwata, yóm angat ktafakem kul ke là nimón le du yó kem hlauhem. Okóm lemwót bè yóm tey keheklabak le, deng mom nulé le yó kem hlauhem igò le temngón du lemwót bè yóm kimón le du gónó le mowil. Tey kem tau mgel kulu, deng mom knogol le uu, là kô dog hnungol le kóm.

Nihimaya 9:26

Okóm yó kem tauhem, Dwata, là kô dog nimón le kóm, deng mom kenbê le uu. Knogol le yóm hlauhem kul. Tódô hnatay le yó kem tugodem gel tô mit kul semfulék ebéléem. Ne deng mom nmò le yó kem alì kenbéem.

Jirimaya 31:32

Yóm senfasad me ni, là mkélen bè yóm tehe kesfasad me yó kem tehe fù le bè yóm tehe kalaku kul hewà gu bè Idyip. Yóm tey kbong nawahu kul bè yóm kdaw yó hol lómón yóm tau syehen, ewenem mom nulé le yóm deng senfasad me.

Jirimaya 32:23

Okóm bè yóm kkól yó kem tehe fù me na le e kwa yóm tonok ni là kô bud nimón le kóm, deng mom kenbê le yóm kóm hlau. Là kô nmò le du yó kem hloloem kul. Yó se gónóm heglumfak du kul nim tey hlayam le ni.

Jirimaya 38:20

Okóm yó balà Jirimaya ke Sidikaya, monen, “Là. Là kô blay le kóm yó kem sendalù Babilun elem hólól le ke nimónem yóm deng mon Dwata mò kóm. Ke nimónem, là kói matay ne angat hyu kógów klowilem.

Sikaraya 1:4

Bê ye abay dnalang kul kmò yó kem tehe fù ye ekni, balù udì ke hnungol le yóm gel tulón le kul yó kem tehe gel tugodu elem blóng le, yóm tehe kmon le du mò kul, ‘Ni se udélen ebélê ye yóm Dwata laen dù là gbeken du, monen, Knogol ye ne yó kem sidek gel nmò ye, hol tenflok ye ne.’ Okóm balù udì ke hnungol le o duhen ke nimón le o.

Jirimaya 7:13

Igò ye mò du yó kem salà monu yó koni, sónmou se dou tendo semsulit mudél ebélê ye, okóm là kô ye dog móyô hmungol. Deng tnabahu yu anì wen eles hetgamahu kuy, okóm là kô na ye e bnalà dou.

Jirimaya 35:17

Yó gónóm mon, ni se udél yóm Dwata laen dù là gbeken du, yóm Dwata yó kem tau Israél, monen, Lemwót bè yóm là kóyô ye hmungol dou ke tnabahu yu, tenbóhu eta yó kem tau bè Juda ne eta yó kem tau bè Jirusalim kdê yó kem hlayam deng eles bantaku kul.”