Jirimaya 11:4 - Udél Dwata: Gna Kesfasad ne Lomi Kesfasad

⁴ Yó tehe senfasad me yó kem tehe fù ye bè yóm kwitu kul hewà gu bè Idyip, yóm benwu gónó le ghesek,’ monu, ‘Ke nimón ye ou ne ke gotu lolò ye yóm kdê hlolou kuy, baling ye mò dou tau ne ou se mò Dwata ye.

Jirimaya 11:4 Referans Kwoze

Dwata 4:20

Okóm yu se yó kem tau deng hewaen gu bè Idyip, bè yóm benwu gónó ye alì glayam. Yó gónón hewà kuy, nmoen yu mò hol kun tau lómón yóm deng kfunen kuy kemdaw ni.

2 Kurin 6:16

Ne sotuhen, laen kô dù gónó le segmung yóm kun gónô Dwata ne yó kem dwata kéng. Kaem tekuy se yóm kun gónô gónóhen nô yóm Dwata laen dù tul katayen. Hol lómón yóm tehe mon Dwata ekni, yóm monen, “Angate tendo nô bélê le yó kem dou tau, ne hol lem blóng le gónóhu nô. Ne ou se baling hol kul Dwata, ne lu se baling hol dou tau.”

Sikaraya 8:8

Bud nwitu lu semfulék anì nô le bè ni bè Jirusalim. Lu se yó kem dou tau ne ou se kul Dwata. Là kóen na a monol yóm nawahu ebélê le ne angat hono tedeng yóm nmou bélê le.

Jirimaya 24:7

Angat wen nawa hyu blayu kul anì hol dilô le ou yóm sana kul Dwata hol gónó mogot. Angat bud lu se dou tau ne bud ou se kul Dwata, abay se hol lemwót bè nawa le yóm bud kesfulék le ebéléu.

1 Bok Kem Tau Hol Geta 8:51

yakà lu du yó kem kóm tau, kóm tau deng nfun, kem tau deng hewaem gu bè Idyip, yóm benwu gónó le alì glayam.

Sikaraya 13:9

Yóm dù mowil yó, angat lómó kmou kul lómón yóm tau tmógó tahu blówón ne blówón bukay bè ofi, gotu kóhen ke wen boolen. Omin le yó tmaba bè boluyu ne angat bnalau lu, monu, ‘Lu se yó kem dou tau’ ne yó mon le se kul, ‘Dwata se yóm sana kum Dwata hol gónó mogot.’ ”

Isikél 37:23

Là bud nmò le du yóm là mólósen ke tmaba le ebè yó kem dwata kéng ne ke nmò le yó kem dumu sidek tehe gel nmò le, yakà angat lenwau kul bè yóm gónó le gel teklé. Nolobu lu. Omin le yó he baling mò dou tau ne ou se mò kul Dwata.

Isikél 36:28

Ne angat ye nô bè Israél, yóm benwu tehe blayu yó kem tehe fù ye ekni. Angat ye baling mò dou tau ne ou se baling Dwata ye.

Jirimaya 30:22

Bè yóm kdaw yó, yu se mò dou tau ne ou se mò kuy Dwata.”

Jirimaya 26:13

Okóm ke hol kó ye yó kem sidek tendo gel nmò ye ne ke hol nimón ye yóm sana kuy Dwata hol gónó mogot, angat tenles Dwata hendemen bè yóm keglaen kuy.

Tekang Kbuten 17:8

Nim tonok hanà tolo gónóm milo ni, blayu kóm ne bè yó kem sfuhem. Nim klamangen benwu Kanan ni, yó kem sfuhem funen ne laen kô dù sónen yóm kfun le du. Ne bud ou se hol kul Dwata.”

Hibru 5:9

Tikóng deng gotu nmoen yóm hmò Maen du, yó gónó Dwata hlan du tahen yóm kegewà tekuy gu lem hatay. Kdéen tau mimón du, gotu blayen kul yóm klowil laen dù sónen.

Matyu 28:20

Ne yóm kdê deng hlauhu kuy, hol tolok ye kul anì hol nimón le se kul. Ne laen kô mtukul sónen yóm knóu bélê ye efet kól bè yóm hol són kdaw.”

Sikaraya 6:15

Bè yóm angat kehdà le yóm Gónô Dwata, tey dê tau lemwót bè benwu mayuk semtóbóng hemdà du. Ke deng dohò yóm ni, bè ni gónó ye temngón du yóm Dwata laen dù là gbeken du yóm hógów do ebélê ye. Ke hteneb ye mimón du yó kem hloloen kuy yóm sana kuy Dwata hol gónó mogot, angat gotu dohò ni kem ni.’ ”

Isikél 37:27

Tódóe nô lem blóng le. Ou se mò kul Dwata ne lu se mò dou tau.

Jirimaya 32:28

Yóm syudad ni blayu elem hólól yó kem sendalù Babilun, elem hólól Nibukadnisar yóm tau hol geta bè Babilun ne nleden.

1 Samwél 15:22

Ne yó balà Samwél du, monen, “Mahi du du yóm gónó Dwata hligal, yóm dsù hkekeb te ne yóm dumu dsù te kô, duhen ke bè yóm kimón te du? Kaem kimón ke Dwata yóm bong muhen senta yóm dsù hkekeb. Kaem yóm khungol te du, bong muhen senta yóm ubiha mabù dsù te ebéléen.

Kehewà 20:6

Okóm bè yó kem tau kembong nawa do ne mimón yó kem dou hlau, hegfanu bélê le yóm tey nawahu kul efet kól bè hilu libu bud lugod le.

Isaya 30:6

Ni se udél Dwata gbak ebè yó kem ógóf lóbô lem bnes bè yóm benwu fi leged là hyu menwu du, monen, “Yó kem tau hógów le mò na a mni tóbóng yó, mlan le bè yóm benwu gónó le nô yó kem ógóf lóbô, yóm gónó le nô yó kem liyun ne yó kem ulal malas ne yó kem swaga móyóng. Gotu lenulón le yó kem tey mebtes yó kem kudà ne yó kem kamél le, mò blay le bè Idyip yóm benwu là gbeken du tmóbóng kul.

Jirimaya 11:7

Bè yóm tehe kwitu kul hewà gu bè Idyip yó kem tehe fù ye, tendo eles gel hegbelu bè nawa le yóm kimón le do. Ne senged se bélê ye ni kmoen ni, tendo eles hegbelu bè nawa ye.

Jirimaya 38:20

Okóm yó balà Jirimaya ke Sidikaya, monen, “Là. Là kô blay le kóm yó kem sendalù Babilun elem hólól le ke nimónem yóm deng mon Dwata mò kóm. Ke nimónem, là kói matay ne angat hyu kógów klowilem.

Danyél 3:26

Omin Nibukadnisar tô hloni ebè bak tum tey ofi dmilóf mung du yóm tey ketgamahen, tmaba monen, “Ó Sadrak ne Misak ne Abidnigu kem tau tóbóng lówó yóm Dwata hol geta bè kdéen hewà ye edini.” Tahu se, hewà le gu lem ofi le Sadrak ne Misak ne Abidnigu.

Dwata 5:6

‘Ou se yóm sana kuy Dwata hol gónó mogot, yóm deng hewà kuy gu bè Idyip bè yóm benwu gónó ye ghesek.

2 Bok Kem Tau Hol Geta 18:6

Tey teneb bè Dwata, ne là kóen skó bè yóm kloloen du, ne gotu loloen yó kem kdê hlau tehe blay Dwata ke Musis.