Jirimaya 10:12 - Udél Dwata: Gna Kesfasad ne Lomi Kesfasad

¹² Okóm ke Dwata kun, dlimunen yóm tonok mlan bè kfasangen ne mlan bè yóm khulungen hedem gónón hbegel du yóm tonok dlimunen yó. Ne bud mlan bè yóm ketngónen gónón mból yóm longit.

Jirimaya 10:12 Referans Kwoze

Tekang Kbuten 1:1

Bè yóm hol tekang kbuten, dlimun Dwata longit ne tonok.

Kem Udél Hlalak Tehe Selumun 3:19

Dwata se deng mò du yóm tonok lemwót bè kun khulung hedem ne bud lemwót bè kun khulung temnef gónón gemmò yó kem longit.

Isaya 40:22

Yó tehe mò du yóm benwu, tek són yóm Dwata myón kmamal senta tonok bè hol gónón geta sentu longit. Bè ktonen yó kem tau te tonok tey le lemnek, lómón ke gulom. Bè yóm tehe kmoen yóm longit, hol lómón ke hnal nes lenulun mò ketef yóm gónó le nô yó kem tau.

Kulasi 1:16

Yakà deng hedlimun Dwata du ke Krays yóm kentihen nô bè longit ne kentihen nô te tonok. Kentihen ton ne kentihen là ton mata du, gotu hedlimunen du, gomong lemen yóm kdéen tau mogot benwu ne yó kem benwu nogot le, kem tau wen knamal le ne kem tau wen kwalis le. Tódô kentihen, gotu hedlimun Dwata ke Krays mò kun.

Kun Snulat Jan 1:3

Ne hlan Dwata béléen yóm kedlimunen yóm kdéen. Tódô kentihen deng dlimun Dwata, gotu hlanen tahen.

Kem Lingón 24:2

Bè yóm tehe kedlimunen du yóm tonok, tódô suen ta yóm tey él nelem fi laan tonok. Hdaen lem mohin yó kem tud blungónen mò hembegel du.

Sikaraya 12:1

Yóm udél Dwata ni, gbak ebè yó kem tau Israél. “Ni se udél yóm Dwata mból longit ne mò tud blóngón tonok ne hlowil tau, monen,

Jirimaya 32:17

“Ó Dwata yóm hol dandónen geta, mlan bè yóm tey kfasangem nmoem longit ne tonok. Laen kô dù là gbekem du.

Jirimaya 10:13

Ke mudél Dwata gel lemugung gu bè longit, gel hlobunen gu ta kmawang. Gel heksilaen mung bè kulón ne wen lenos hwiten gu bè yóm gónón gel hemyu.

Isaya 49:8

Yó bud udél Dwata ebè yó kem kun tau, monen, “Ke deng kól yóm kdawu lemwà kuy, hegfanu bélê ye yóm tey nawahu kuy ne bnalau yóm alì kehkodu ye mni tóbóng béléu. Gel bnenteyu yu he ne nofinu yu. Hlanu bélê ye yóm fasadu yó kem tau bè klamangen benwu. Tódô ye bud mulék he ebè yóm benwu ye tehe gotu lebà.

Isaya 45:18

Yóm Dwata gónó tekuy mogot, du se dmimun yó kem longit seglafin. Tek sónen du yóm hol Dwata. Bud du se mò yóm tonok ne tey mbegel yóm kmoen du, là kóen mahil sidek. Yóm benwu nmoen yó, là kô henbalingen du benwu là hyu menwu du, okóm henbalingen benwu alì hyu menwu du. Du se yóm gel mon du, “Ou se yóm hol gónó mogot. Laen kô dù dumu dwata, són o.

Isaya 45:12

Ou se deng tehe dmimun du yóm klamangen benwu ne deng nmou yó kem tau nô tahen. Lemwót bè kfasangu gónóhu hnal yó kem longit seglafin. Ou se mogot du yóm kdaw ne yóm bulón ne yó kem blotik.

Isaya 44:24

Ou se yóm Dwata gónó ye mogot yóm lemwà kuy. Ou se yóm Dwata deng mò kuy. Ou yóm hol gónó ye mogot, yóm dmimun yóm kentihen. Tek són ou tehe hnal yó kem longit seglafin. Ne bè yóm tehe kedlimunu tonok, laen kô tmóbóng do.

Isaya 42:5

Bè yóm tehe kedlimun Dwata yó kem longit seglafin, hol lómón ke mból nes lenulun bè klamangen. Ne bud dlimunen tonok ne kdê yó kem nô tahen. Deng gotu hlowilen yóm kdéen tau nô tahen. Ne ni wen udélen ebè yóm tau tóbóng lówóhen, monen,

Kem Lingón 104:24

Ó Dwata, tey deng dê nmoem, ne teyi hulung mò kul yóm kdéen. Tódô tfeng klamangen benwu yó kem ógóf deng dlimunem.

Kem Lingón 33:6

Yóm tehe kedlimun Dwata yó kem longit seglafin, tódô lemwót bè udélen. Bud lemwót bè udélen snéen yóm tehe kedlimunen yóm kdaw ne bulón ne yó kem blotik.

Kem Udél Hlalak Tehe Selumun 30:4

Tau du de deng gu bè longit bè yóm gónó Dwata nô? Tau du de deng semtifun yóm lenos lem hólólen? Tau du de deng hmunges nes yóm él? Tau du de deng mò gónón gkilil yóm benwu? Tedu de boluyen ne boluy yóm ngaen logi? Tulón ye do ke tngón ye?

Kem Lingón 119:90

Yóm ktenebem bélê me gefet bè kdê bud lugod tau, yóm kbegelen lómón yóm tonok deng dlimunem.

Kem Lingón 78:69

Bè yó gónón hefdà yóm Gónóen alì geta, lómón kbegelen yóm tonok laen dù tul ksideken.

Kem Lingón 104:2

Hol lómón ke tendo legmotem yóm tey layagem. Ne yó kem longit seglafin, lómón ke ketefem yóm klamangen tonok.

Kem Lingón 93:1

Dwata se yóm hol dandónen geta mogot klamangen. Yó henged nes leseken, duhen yóm kegetahen ne yóm tey kekgisen. Tey mbegel kehdaen du yóm benwu, là kóen na a sliwo.

Tekang Kbuten 2:5

laen kô dù hulu tonem tahen yóm tonok duhen ke laen dù lem hulu lemsob tahen, abay se là deng hkulón Dwata du he, lelen laen deng tau mò hulu.

Isaya 37:16

“Ó Dwata yóm Dwata laen dù là gbeken du, yóm hol kum gónó mogot kem tau Israél, yóm myón bè yóm gónóm kmamal geta senta yó kem gel hógówem nô bè yó. Tek sónen uu yóm Dwata. Gotu knamalem yóm klamangen. Uu se tehe dmimun tonok ne longit.

Jirimaya 10:16

Yóm kun Dwata tehe Jakub, là kóen mkél bélê le. Du se mò du yóm kentihen. Deng néléken yó kem tau Israél mò hol kun tau nfun. Yó hol kun boluy, Dwata laen dù là gbeken du.

1 Tutul Israél 16:26

Yó kem dwata kul gónó e gel tmaba yó kem tau bè dumu benwu, hono dwata lennged. Okóm yóm Dwata tekuy, du se dmimun du yóm longit seglafin.

Kem Lingón 65:7

Balù yóm tey lungkul lewók mohin, botong gbekem henek du. Ne gbekem henek kul snéen yó kem tau alì sembeweg kbenwu.

Jirimaya 14:22

Laen kô dù bè yó kem dwata kéng ke gbeken hkulón. Balù longit, là kô gbeken du hkulón ete tonok. Són uu, Dwata, ken-gel nawa me yóm hol kum gónó mogot. Tek són uu gembek mò du ni kem hni me béléem ni. Nangat me yóm któbóngem kum.