Jirimaya 1:18 - Udél Dwata: Gna Kesfasad ne Lomi Kesfasad

¹⁸ Yó nmou béléem kemdaw ni, hol lómón ke uu yóm syudad alì mbegel, bala tók heheken ne tembaga bengen, là gbek le gembà du. Laen dù bè yó kem tau hol geta mogot yóm benwu Juda ne bè yó kem genlal le ne bè yó kem tau gel blóng ebéléu, duhen ke bè yóm kdéen tau bè Juda ke gembek kóm.

Jirimaya 1:18 Referans Kwoze

Isaya 50:7

Okóm yóm kehnê le dou, là kô gehsideken do, abay se gel tnóbóngen ou yóm Dwata hol dandónen geta gónóhu mogot. Tódô henbalahu yóm nmò le béléu. Tngónu là kô wen gónóhu myak,

Jirimaya 15:20

Lómó kmou kóm lómón ke uu yóm beng tenwél alì mbegel. Ke wen mit kóm sfatay là kô le gemmò béléem. Tendohe nô béléem mò kemlung kóm anì laen dù hemenem. Ou se yóm sana Dwata hol gónó mogot nim mudél ni.

Jirimaya 6:27

Ó Jirimaya, lómón ke uu yóm tau temwél hulung mélék du yóm hyu mò tenwélen. Tenwélem lu yó kem dou tau, hnénégem yóm mò kmò le.

Jirimaya 37:7

“Ni se udél Dwata yóm kul Dwata yó kem tau Israél, monen, Hol tulónem ke Sidikaya yóm tau hefni kóm béléu, mon ye mò du, Deng le nô bè lan ne yó kem sendalù Idyip tô tmóbóng kóm, okóm móyón le bud semfulék ebè benwu le.

Jirimaya 38:2

“Ni se udél yóm sana Dwata hol gónó mogot, monen, Ket tau tebel bè nim syudad Jirusalim ni angat matay. Wen se matay bè gida ne wen se matay lemnus ne wen se matay bè des. Okóm yó se tau hewà bè nim syudad ni ne heglaan bè yó kem sendalù Babilun, là kóen matay angat mowil.

Jirimaya 42:22

Yó gónóm mon, là kóen megewu nawa ye du yóm angat katay ye bè gida ne katay ye lemnus ne katay ye bè des ditu bè Idyip, yóm benwu gónó ye e dmendel mógów.” Là gomongen bè nili yóm tsaptér 43 ne 44. Yó tulónen bè tsaptér 43 yóm là kimón yó kem tau dù tebel bè Juda du yóm kmon Dwata du mò kul hol le henek bè Juda. Deng mom yó nmò le gotu le mógów ebè Idyip, nwit le Jirimaya ne Baruk. Yó gónó le mógów ebè Idyip, abay se likò le ke Nibukadnisar. Tikóng le kól bè Idyip, bud wen udél htugod Dwata ke Jirimaya mò tulónen kul, monen, “Yóm Nibukadnisar tendo knikò ye ni, mom du tau mò tóbóng lówóhu. Ou se bud hógów du ebè Idyip anì nan e gotu gnida yóm klamang Idyip. Gotu ntemen yóm gónô yó kem dwata kéng le ne gotu negefen lu ebè Babilun yó kem tau Idyip.” Yó tulónen bè tsaptér 44, yóm bud htugod Dwata ke Jirimaya ebè yóm kdéen dù tau Juda deng kól bè Idyip. Bud hegbel Dwata bè nawa le yóm but gónón gemlà yóm benwu Juda ne syudad Jirusalim lan le tmógó mambang mò dsù le ebè yó kem dwata kéng hentahu le ne lan le mtem insinsu ebélê le lem yóm kul gónô. Bud senged se nmò le ni kem tau ni bè yóm deng knô le bè Idyip, là kô kó le du. Ne yó gónó Dwata bud htugod ke Jirimaya anì eles tngón le yóm angat tey ktafaken kul efet le gotu matay yóm kdê le, dalang se yó kem ngà tolo sniwi le. Wen se bè yó kem tau là mimón yó angat matay bè gida ne wen se bélê le matay lemnus.

Jirimaya 34:3

Là kô gbekem hemlóy du, angat negefen uu. Angati mdà bè solu yóm tau hol geta yó nan e knukum uu bè yóm ktafaken kóm. Ominen megef kóm etu bè Babilun.’

Kun Snulat Jan 1:42

Ne omin Andru mit ke Simun ebè Jisas. Uni Jisas mton ke Simun, henmung monen mò du, “Uu se Simun, ngà yóm sotu Jan. Okóm yó bud tles boluyem, Sifas.” (Yóm boluy Sifas yó, senged lanen bè yóm boluy Pitér. Yó lanen, “botu.”)

Jirimaya 38:18

Okóm ke là heglaani bélê le, là kói gewà. Ne angat blay Dwata elem hólól yó kem sendalù bè Babilun nim syudad ni ne gotu ntem le.”

Deng Hegfan 3:12

Yóm tau gel matù bè yó kem sidek gel sut, angat nitu ebè yóm Gónô Dwata bè longit, ne là kóen bud skibol bè yó ne. Hol lómón ke deng baling sotu heheken. Ne snulatu béléen se yóm boluy Dwata, dalang se yóm boluy yóm benwu Dwata, yó se yóm lomi Jirusalim, yóm benwu angat tuntun Dwata gu bè longit. Ne snulatu béléen snéen yóm dou lomi boluy.

Jirimaya 1:17

Yó ne, Jirimaya, elesi htifes. Géhéli lemwót nam e tulón kul yóm kdê htulónu kóm. Béi abay hlikò bélê le. Ke likoi bélê le, bud tennuu he yóm klikoem yó ke mdai bè solu le, ne tey kebà nawahem.

Jirimaya 1:19

Angat natù le uu, okóm là kô gbek le kóm. Yakà tendohe nô béléem ne tendo kenlungu uu. Ou se yóm sana Dwata hol gónó mogot nim mudél ni.”

Jirimaya 15:10

Yó udél Jirimaya, monen, “Tey tau laen dù kligalen nim ou. Moen de, Yê, ke tehe hesutem ou lem nim benwu ni? Tey kekbê le dou yó kem tau bè klamangen benwu me. Là kóe deng mutóng filak se dou ne là se kóe deng hutóng. Okóm moen se ni du ke deng mom hnagi le ou yó kem tau?”

Jirimaya 26:24

Bè yóm kekfô le ke Jirimaya yó, wen sotu tau boluyen Ahikam ngà Syapan logi nô bè yó ne tey kfihen ke Jirimaya ne yó gónó le là hfatay ke Jirimaya yó kem mogot kukum. Là gomongen bè nili yóm tsaptér 27. Yó tulónen bè ni yóm udél Dwata ebè Sidikaya. Là olon du bè Sidikaya gónó Dwata e mudél, okóm gomong yóm limu kem benwu hmilol bè Juda. Wen yok hmò Dwata ke Jirimaya mò suen bè liholen, hningónen hyu ke gotu le heglaan bè Nibukadnisar anì angat le mowil. Hyu ke tódô henlós le mung bè Nibukadnisar efet kól bè yóm bud kun kogot yóm ngaen ne bud kun kogot yóm téméen. Okóm ke là heglaan le bè Nibukadnisar, angat le gotu matay. Matay le bè gida ne matay le lemnus ne matay le bè des. Eles hetgama Jirimaya kul hol bê le abay hmungol bè yó kem dumu tugod Dwata ne bè yó kem tau demwata yóm gel mon du mò kul hol bê le abay heglaan. Yóm tulón le yó mon Jirimaya, là kô htugod Dwata du kul. Là gomongen bè nili yóm tsaptér 28. Yó tulónen yóm kun tulón yóm tugod dwata kéng boluyen Hananiya. Monen, tek lewu halay duen angat kmò Dwata sónen yóm kfasang Nibukadnisar. Bè yóm kdaw yó kun, bud semfulék ebè Juda Jihuyakin yóm tehe negef le, mung du yóm kdéen tau deng tehe negef le ebè Babilun. Ne bè yóm bud kulék le yó kun, gotu bud nwit le snéen yóm kdéen kimu mebtes deng nwa yó kem sendalù Babilun lem yóm Gónô Dwata. Bè yóm igoen mudél Hananiya, tódô tenfoken yóm yok nô bè lihol Jirimaya hningónen yóm kegesón kogot Nibukadnisar yóm benwu Babilun. Okóm sotu kdaw stulón ke Hananiya Jirimaya. Tulón Jirimaya du yóm là kewóten bè Dwata yóm tulónen, ne yóm katay Hananiya lemwót bè yóm ktulónen kéng yó.

Jirimaya 20:11

Okóm yóm Dwata, tendo nô klohoku lómón ke sendalù lóbô. Là kô le gemmò béléen yó kem hohonu. Là kô le gemmò béléu. Angat tey sidek kyak le, abay se là gfuhen yó kem tô atul le etahu. Ne là kô klifót kem dumu tau du yóm tey kyak le yó.