Isikél 47:1 - Udél Dwata: Gna Kesfasad ne Lomi Kesfasad

¹ Lemwót yóm tau hógów Dwata mit do yó, bud nwiten ou semfulék ebè bak dól yóm Gónô Dwata. Wen él tonu bè yó mlel laan yóm bak dól bè Gónô Dwata, bede mlel fi leged yóm bak dól yó ne hlós mlel etu fi dmata kdaw, loloen yóm gónón e smolu yóm Gónô Dwata. Niusen yóm gónó demsù, bede mlel fi legeden.

Isikél 47:1 Referans Kwoze

Deng Hegfan 22:1

Omin yóm hógów Dwata tmolok du do yóm tey él tikaw sminang mlel bè yó, yóm mon le, él hlowil tau. Tódô mlel lemwót gu bè yóm bangkù gónón myón kmamal Dwata lewu le yóm Ngà Ubiha,

Sikaraya 14:8

Bè yóm kdaw yó, wen él hlowil mlel lemwót gu bè Jirusalim. Yóm sóól yóm él yó mlel ebè Mohin Héét ne yóm sóólen mlel ebè Mohin Miditiranyan. Tódô senflósen mlel, baluen ke bulónen kinì duhen ke bulónen tnaw.

Juwél 3:18

Bè yóm kdaw yó, tódô hono lefà grép bè yó kem bulul lembang ne bè yó kem bulul lemnek, tódô hono safì mótób bè yó. Angat bud wen él mlel bè yó kem sbong deng kti bè Juda. Ne angat wen él tembul gu lem yóm kun Gónô Dwata, gotu hnéféen yóm Datal Koyu Akasya yóm datal mékéng tonoken.

Isaya 55:1

Yó udél Dwata, monen, “Ó kem tau meeng, géhél ye edini ne ni wen él mò ninum ye. Ó kem tau laen dù filak le, géhél ye edini ne ni wen mò ken ye. Géhél ye edini ne ni wen mò ninum ye. Là heblihu du kuy nim ni.

Jirimaya 2:13

“Yakà deng wen lewu salà nmò le béléu yó kem dou tau. Deng tebel le ou, yóm sfut él gónó le mowil ne deng wen sol nokol le nbeng le botu mò gónó le hemsù él, okóm deng mom molo yóm él sù le lemen.”

Kem Lingón 46:4

Ditu bè syudad Dwata, wen él mlel lemen, gel mit kligal lem yóm kun benwu. Bè yó se gónón nô yóm kun Gónô Dwata yóm Dwata hol dandónen geta bè kdéen.

Isikél 47:12

Tódô kdéen koyu mungu, angat le gotu mteg sfatà kilil yóm él yó. Là kô le mékéng yó kem doun le ne là kô le tbó. Tódô senflós le mungu yó kem koyu yó, tódô ket le bulón bud mungu, yakà tendo le méfê bè yóm él mlel lemwót gu bè Gónô Dwata. Yóm bungu le mò gel ken ne yóm doun le mò gel hkó des.” Là gomongen bè nili yóm bérs 13 kól bè bérs 23. Yó tulónen bè ni kem bérs ni yóm kmò keblóng Dwata du yóm klamang benwu Israél. Là gomongen bè nili yóm tsaptér 48. Yó tulónen bè yóm tsaptér ni yóm kmò kólól Dwata du bè sfolò lewu ból Israél yóm tonok bè benwu Israél, ne yóm kmoen boluy yó kem sfolò lewu bak tikeb yóm syudad Jirusalim, bede hewóten bè boluy yó kem sfolò lewu ngà Jakub.

Deng Hegfan 22:17

Yó udél yóm Tulus Dwata dalang se yóm libun yehen yóm Ngà Ubiha, mon le, “Géhél ye ne.” Ne yó kem tau mungol du, yake bud mon le kul, “Géhél ye ne.” Géhél le edini ne yó kem tau meeng na le e minum bè yóm él hlowil tau, yóm él là kô feng benli du. Yóm tau móyô, géhél minum ne.

Sikaraya 13:1

Yó udél yóm Dwata laen dù là gbeken du, monen, “Bè yóm kdaw yó, angat wen sfut él mò gónó le molob yó kem sfu Dabid ne yó kem dumu tau bè Jirusalim, anì hol mkó bélê le kdê yó kem salà le ne yó kem dumu là mólósen bélê le.

Isaya 30:25

Bè yóm kdaw kegbà ye yóm gónó le heklung yó kem hohon ye ne yóm khatay ye kul, wen él hetbul Dwata hlelen gu bè ket bulul geta ne gu bè ket bulul lemnek.

Isaya 2:3

Ne yó angat mon le, “Lemwót tekuy ne mneged ebè yóm bulul Dwata, hlós tekuy ebè Gónô yóm Dwata yó kem tau Israél. Angat toloken tekuy yóm kun kóyô bélê tekuy ne angat lolò tekuy yó kem lan hloloen tekuy. Abay se yóm kun tolok Dwata, bè Jirusalim gónón lemwót. Bè yó gónón gel mudél ebè yó kem kun tau, bè yóm bulul gel boluy le du Sayun.”

Isikél 47:2

Ominen bud lemwót yóm tau yó, nwiten ou e tekwang yóm beng Gónô Dwata, mlan me bè yóm bak tikeb fi bwak omin me lemibut etu bè yóm bak tikeb fi dmata kdaw. Bè yó bud tonu sfu yóm él mlel, mlan fi leged bè kilil yóm tikeb fi dmata kdaw.

Sikaraya 14:4

Bè yóm kdaw yó, angat mdà ta Bulul Ulib Dwata, yóm bulul fi dmata kdaw Jirusalim. Ne yóm Bulul Ulib yó, tódô meskang bè gónón sóól, baling datal lamang lenwóten fi dmata kdaw kól desdef. Yóm sóól yóm bulul yó tódô mili fi bwak ne yóm sóólen tódô mili fi leged.

Kem Lingón 46:5

Bè yóm syudad yó, yó se kun gónó nô Dwata, ne laen kô gembek gembà du yóm kun benwu. Hanà hlafus deng sana sut na a tmóbóng.

Kem Lingón 87:7

Bè yó kem gel kehligal le, angat le gotu semngal yóm kdéen tau. Yó utóm sngal le, mon le, “Bè Jirusalim gónón gu tembul yóm dou klowil.”