Isikél 3:27 - Udél Dwata: Gna Kesfasad ne Lomi Kesfasad

²⁷ Okóm ke bud wen htugodu kóm, bud hudélu uu anì tulónem kul yóm udélu ebélê le. Ominem yó bud mon du mò kul, ‘Ni se udélen ebélê ye yóm sana Dwata hol dandónen geta.’ Wen se bélê le angat hmungol kóm ne wen se bélê le angat kembê kóm, abay se kdê le hono tau là mimón do.” Là gomongen bè nili yóm tsaptér 4 kól bè tsaptér 16. Yó tulónen bè ni kem tsaptér ni: Hningón hmò Dwata ke Isikél yóm angat kundug le ebè Jirusalim yó kem sendalù Babilun ne yóm alì sidek kbitil yó kem tau lem Jirusalim. Eles htugod Dwata ke Isikél yóm angat ktafaken yóm kdê gónó le gel tmaba ebè yó kem dwata kéng yó kem tau Israél. Eles htugod Dwata ke Isikél yóm móyón kegesón yóm benwu Israél. Eles kehton Dwata du bè Isikél yóm ktaba le ebè dwata kéng lem yóm kun Gónô yó kem tau malak bè Israél. Eles hton Dwata ke Isikél yóm angat gotu khatay le yóm kdéen tau gel tmaba ebè dwata kéng bè Jirusalim, okóm hegna hnatay le yóm hitu folò kem tau malak bè kun Gónô Dwata. Bud tulónen yóm tódô kdó Dwata lem yóm kun dfél gónóhen gel nô bè Gónóen, mung du yóm tey keklóónen alì sminang ne nan na hlun nô ta yóm bak dól Gónóen. Kehton Dwata du ke Isikél yóm ktebelen yóm bak dól Gónóen, mung du yóm tey keklóónen alì sminang ne hlós eta yóm tikeb fi dmata kdaw bè lósól yóm Gónô Dwata. Kehton Dwata du ke Isikél yóm ktafaken yó kem tau malak bè Israél. Bud htonen du snéen yóm ktagaken yóm syudad Jirusalim, mung du yóm tey keklóónen alì sminang. Hningón hmò Dwata ke Isikél yóm angat kegef le kul etu bè Babilun yó kem tau Israél ne eles htulónen du yóm angat tey kélél le ken ne kélél le él bè yóm kdaw yó ne móyón glumfak le ne. Eles htugod Dwata ke Isikél yóm angat khatayen yó kem tau tmugod kéng, logi duhen libun. Eles htugod Dwata ke Isikél yóm angat khatayen yó kem tau malak bè Israél tendo gel tmaba ebè yó kem dwata kéng. Yóm kehlingón Dwata kul yó kem tau bè Jirusalim, hol lómón ke lefà deng mlób laen dù muhen. Yóm kehlingón Dwata kul yó kem tau lem Jirusalim, hol lómón ke libun mdà yehen, là gbek Dwata du ke là tnafaken kul.

Isikél 3:27 Referans Kwoze

Isikél 3:11

Ominem yó mógów ebè yó kem dumuhem deng negef ne monem mò kul, ‘Ni se udél yóm sana Dwata hol dandónen geta.’ Tulónem kul yóm udélu kihu ke hnungol le duhen ke là.”

Ifisus 6:19

Ne hol gel utóm ye ou snéen bè yóm gel kni ye anì benlay Dwata ou khulung tmolok, ne anì laen dù klikou heglileb du bè kem tau yóm Tulón Hyu tehe gbuni bélê le.

Kun Snulat Luk 21:15

Ou he bemlay kuy yóm khulung ye hedem, ne yóm kestulón là gbek hohon ye malà du, ne là kô gehkéng le du snéen.

Matyu 13:9

Omin Jisas bud mon du mò kul, “Yóm tau wen klinguhen, hol hmungol.”

Matyu 11:15

Yóm tau wen klinguhen, hol hmungol.”

Isikél 33:32

Bè kul kehedem kóm yó kem tau yó, lómón ke uu yóm tau mò hefligal kul, lómón yóm tau gel semngal yóm sngal sbong nawa ne huni yó kem gel nuni le. Olo le beyen hmungol kóm, okóm là kô nimón le du.

Isikél 33:22

Bè yóm kifu gu laanen là deng sut he, tódô gnómu yóm tey kfasang Dwata béléu, bud hudélen o anì yó bude gudél bè yóm kegdek yóm tau ni.

Isikél 3:26

Ne humewu uu anì là bud bnólówem kul ni kem tau là mimón do ni.

Isikél 3:9

Eles hgelu kuluhem lómón kgelen botu. Yó gónóm mon béi abay hlikò bélê le. Ne béem abay knikò yóm gel ketngel le des, abay se kdê le hono tau là mimón do.”

Isikél 2:5

Kihu ke hnungol le uu duhen ke là yó kem tau là mimón do yó, syan olo le temngón du deng wen tugodu deng kól lem blóng le.

Isikél 2:4

Hono kem tau mgel kulu. Okóm hógówu uu ebélê le nam e tulón kul, monem, ‘Ni se udélen ebélê ye yóm sana Dwata hol dandónen geta.’