Isikél 2:6 - Udél Dwata: Gna Kesfasad ne Lomi Kesfasad

⁶ Béléem kóm, Tau Tonok, hol béi abay hlikò bélê le. Béem knikò yó kem dê gel udél le, baluen ke lómón ktelemen yó kem sual ne lómón kdesen ékét syufón. Béem abay knikò yóm gel ketngel le des, abay se hono le tau là mimón yóm kdê le.

Isikél 2:6 Referans Kwoze

Jirimaya 1:8

Béi abay hlikò bè yó kem tau, yakà tendohe nô béléem mò kemlung kóm. Ou se Dwata nim mudél ni.”

1 Pitér 3:14

Okóm baluen se ke wen hemsidek kuy lemwót bè yóm hyu gel nmò ye, wen kligal ye du myó. Bê ye hlikò, ne bê ye htafa nawa ye.

2 Timuti 1:7

Là kô yó du gónó Dwata bemlay du bélê te yóm Tulusen ke nit te likò. Okóm mò fen gel temgel kut, ne anì nô bélê te yóm kesbong nawa, ne anì wen kegbek te mafas nawa.

Kun Snulat Luk 10:19

Ngem, lemwót bè yóm kwalis deng blayu kuy,” monen, “là kô le bud lóbô bélê ye ne yó kem ulal, anien ke gdà ye lu, dalang se yó kem syufón. Ne balù sentenga se kun kgis yóm hohon tekuy Seitan, là kóen matù bélê ye.

Jirimaya 1:17

Yó ne, Jirimaya, elesi htifes. Géhéli lemwót nam e tulón kul yóm kdê htulónu kóm. Béi abay hlikò bélê le. Ke likoi bélê le, bud tennuu he yóm klikoem yó ke mdai bè solu le, ne tey kebà nawahem.

Matyu 10:28

Bê ye abay likò bè tau. Gbek le hmatay lówó ye, okóm yóm lóyóf ye, là kô gbek le hmatay du. Dwata dé hol tahu knikò ye, abay se gbeken hmatay lówó ye, ne gbeken se tmudà lóyóf ye elem lanaw ofi.

Mika 3:8

Okóm béléu dou, deng sù Dwata béléu yóm kun Tulus ne yóm kun kfasang. Ne hetngónen do yóm kukum tedeng ne benlayen o là klikò tmulón du bè yó kem tau Israél yó kem salà le.

Jirimaya 18:18

Ne yó udél yó kem tau, mon le, “Yake mebel tekuy lan anì teflok yóm gel tulón Jirimaya. Laen kô dù mu tekuy du yóm gel tulónen. Deng wen kut tau blóng ebè Dwata nô bélê tekuy ne wen se kem kut tau temngón ne wen se kem kut tugod ebè Dwata nô bè ni. Laen kô mu tekuy du yóm toloken tekuy ne ke hnauhen tekuy ne ke tô wen tulónen tekuy. Mò tekuy tulón gbak etahen, bê tekuy abay kenmón yó kem gel monen.”

Kul Nmò 4:29

Ne ni, Dwata, hol hnungolem yóm tey kifis le kum. Hol ten-gelem mi kem kóm tau, anì là likò me tmulón du yóm kóm tulón.

Hibru 11:27

Yóm tehe ktagak Musis yóm benwu Idyip, lemwót bè yóm kehtahuhen bè Dwata là kóen dog likò bè yóm tey kebut Faro du. Hol lómón ke deng eles tonen Dwata, yóm là ton mata tau du, ne yó se hol nimónen.

2 Bok Kem Tau Hol Geta 1:15

Ominen wen hógów Dwata gu bè longit mudél ebè Ilaydya, monen mò du, “Yó ne, mungi du, béi abay hlikò.” Tahu se, mung du Ilaydya mógów ebè yóm tau hol geta.

Flipay 1:28

Bê ye abay hlikò bè yó kem hmohon kuy, hol hgel ye nawa ye dé. Lemwót bè yóm là klikò ye, yó se gónó le dmilô du yóm klaen dù gmò le, ne yóm katù ye bélê le. Abay se monem lemwót bè Dwata yóm katù ye yó.

Ifisus 6:19

Ne hol gel utóm ye ou snéen bè yóm gel kni ye anì benlay Dwata ou khulung tmolok, ne anì laen dù klikou heglileb du bè kem tau yóm Tulón Hyu tehe gbuni bélê le.

Kul Nmò 4:19

Okóm bnalà Pitér ne Jan lu, mon le, “Bè kuy kmò kehedem du, mahi du hyu bè kton Dwata kum, ke nimón me yu duhen ke Dwata?

Kul Nmò 4:13

Ya tey ketnga yó kem tau hol geta mogot kukum yóm kton le laen dù klikò le Pitér ne Jan, ne yóm ketngón le du olo le kem tau hkawang, laen dù hennagì le. Bud gtulón bè nawa le yó kem lewu tau yó, lu se yóm tehe gel slomong ke Jisas.

Kun Snulat Luk 12:4

“Yu kem hol dou wè,” mon Jisas, “wen tulónu kuy. Bê ye abay likò bè tau. Gbek le hmatay lówó ye, okóm kogolen bè yó laen dù bud gmò le.

Jirimaya 6:28

Tódô kdê le gotu kmogol do kem tau hensidek le boluy kem dumu le. Tey mgel kulu le lómó kgelen bala tók, lelen mahil bélê le mit kem dumu le mò sidek.

Deng Hegfan 9:10

Ne bè yóm ikong le gónón nô alas le hemdes kem tau efet limu bulónen, ne yóm kdesen lómón ke ékét syufón.

Kun Snulat Luk 11:12

Duhen ke mni ngà onuk lenbotù, syufón kô blay ye du? Là kô yó du.