Isaya 8:19 - Udél Dwata: Gna Kesfasad ne Lomi Kesfasad

¹⁹ Okóm angat mon yó kem dumu tau mò kuy, yake smólók ye bè yó kem tau mton bù ne bè yó kem tau demwata, yó kem gel mnuhul ne mengeg. Yó gónó le mon du yóm yó abay se hyu kun ke gel tekuy smólók bè yó kem tau deng matay mò tmóbóng yó kem tau tolo mowil.

Isaya 8:19 Referans Kwoze

1 Tutul Israél 10:13

Duhen yó, matay Sol lanen là mimón ke Dwata. Là kô nimónen du yóm hlau Dwata du, lelen mom mógów ebè yóm libun mton bù, snólóken béléen ke tedu tô nmoen,

2 Tutul Israél 33:6

Nim Manasi ni, balù ngaen botong gbeken hkekeb du bè Datal Hinom mò dsuen. Deng mom dmalang gel hmayam, ne hemgawang ne tmaba ebè tulus seitan ne ebè mton bù ne gbeken tódô temsob moluy. Yóm kdê nmoen yó, tey sidek kehebuten ke Dwata.

Kem Lingón 106:28

Omin yó kem fù tekuy, deng le mom mung tmaba ebè Baal bè Pyor, ne balù yóm deng dsù le ebè matay, sana kken le du.

Hlolò 19:31

Bê ye abay hmungol hlau bè yó kem tau gel tmaba bè lemogol. Ke nmò ye yóm yó, là buden mólós ktonu kuy. Ou se yóm sana kuy Dwata hol gónó mogot.

1 Samwél 28:8

Duhen yó, yó nmò Sol hlingu lemsek nes hkawang ne mógów ebè yóm libun mton bù bè yóm kifu yó, mung du yóm lewu kem tauhen. Bè yóm kkól le, yó monen bè yóm libun yó, “Móyóe stulón bè lóyóf yóm sotu tau deng matay. Yake tnabahem do lóyófen yóm tau bnoluyu anì stulóne du.”

Jirimaya 10:10

Okóm uu, Dwata yóm hol gónó mogot, tahuhi Dwata se kóm. Uu se yóm Dwata là matayen, uu se yóm laen dù tul són yóm kegetahen. Ke sok bangem lembut tódô megsinsig yóm klamangen tonok. Gotu le hebnos yó kem tau bè dumu benwu lemwót bè yóm kebutem.

2 Bok Kem Tau Hol Geta 1:3

Okóm wen hógów Dwata gu bè longit sut bè Ilaydya yóm tau lemwót bè Tisbi. Yó monen mò du, “Lemwóti ne senlongem yó kem tau hógów yóm tau hol geta bè Samarya, snólókem bélê le, ‘Moen de ke mógów ye ebè Baal-sibub yóm dwata kéng yó kem tau Ikrun, ne tô snólók ye béléen ke mowil yóm tau hol geta ye? Laen dù bud Dwata bè Israél ne kô?

2 Bok Kem Tau Hol Geta 23:24

Yó bud nmò Jusaya bè Jirusalim ne bè klamang Juda, gotu kóhen yóm kdéen tau mton bù, kem tau demwata, ne yó kem dwata lennged gel sù le lem gónô le ne yó kem dumu dwata lennged gónó le tmaba, gotu kóhen lu. Yó gónóhen mò du nim ni lanen mimón yóm hlau deng snulat lem yóm bok ton Hilkaya yóm tau blóng ebè Dwata lem Gónô Dwata.

1 Samwél 28:16

Okóm yó balà Samwél du, monen, “Moen se ke snólókem o ke deng tnagak Dwata uu ne ke deng baling hohonen uu?

2 Pitér 2:1

Yóm tehe yu ekni, gel wen se kem tau gel sut tódô tô lembù tmugod ke Dwata. Senged se ni kmoen ni, wen tau sut na a tmolok sekban lem blóng ye. Hono kéng yóm gel tolok le. Ke lolò ye, hensideken ktau ye. Sal henkéng le yóm gónó tekuy mogot igoen du yóm tehe msok kul gu lem hatay. Yó gónóm mon, angat tódô kento genlà Dwata lu yó kem tau yó.

1 Samwél 28:11

Ominen yó mon du yóm libun yó, “Lóyóf tau du se nóyô tnabahem?” Mon Sol se, “Tnabahem do lóyóf Samwél.”

1 Tisalunika 1:9

Gotu tulón le kum yóm tehe tey khódó ye kum ekni bè yóm tehe ksut me bélê ye dyó, ne yóm deng kkogol ye yó kem dwata kéng, ne yóm deng kimón ye ke Dwata yóm hol tahu Dwata, yóm Dwata laen tul katayen.

Kul Nmò 16:16

Sotu kdaw bè yó, yóm igò me tolo mógów ebè yóm gónó me gel stifun mni bè Dwata, geslong me yóm sotu ngà libun klifen, okóm wen lamaten. Tey filak gel guta yóm tau gónón geklifen, abay se wen kegbeken tmulón yóm angat sut elem haya lemwót bè yóm gel malak du.

Tekang Kbuten 41:24

Okóm yóm kanguy halay kafa yó, gotu hlo le yóm kanguy halay alì mfól bunguhen. Deng tulónu yó kem tau demwata ni kem knahu ni okóm laen dù bélê le gembek tmulón du dou lanen.”

Isaya 26:14

Deng le gotu matay ne yó kem tehe mogot kum yó, là kô le bud mowil. Là se bud le mowil yó kem lóyóf le, yakà deng tnafakem kul, deng gotu genlaem lu. Laen dù bud hemtulón kul nawa ne.

Isaya 30:2

Tódô le htóbóng bè Idyip, là dog le gna smólók béléu. Kóyô le ke Idyip fen mofin kul, yó gónó le smalig du yóm tau hol geta bè yó.

Isaya 45:11

Yóm Dwata laen dù belenen gónó le mogot yó kem tau Israél, du se eles matul yóm mò kmoen elem haya. Yó udélen, “Laen dù kwalis ye smólók do ke tedu kmou kul yó kem dou ngà, duhen ke yu tô tmulón du dou yóm hyu mò nmou bélê le.

Mika 5:12

Nmou són le yóm kdéen mton bù ne laen dù bud tau hemgawang gónó ye bud smólók.

Dwata 18:10

Yó sotu sidek gel nmò le, kóem hkekeb le yó kem ngà mò dsù le ebè kul dwata. Hol bê ye abay nmò kuy yóm yó. Hol bê ye abay nmò kuy yóm hemgawang ne yóm mimò ne mton bù. Bê ye abay tmaba ebè mogol.

1 Samwél 28:7

Ne yó mon Sol bè yó kem tóbóng lówóhen, “Mebel ye do libun mton bù anì mógówe ebéléen naw e smólók béléen ke tedu nmou.” Ne yó balà le du yó kem tóbóng lówóhen, mon le, “Wen sotu libun mton bù nô bè Indor.”