Isaya 64:7 - Udél Dwata: Gna Kesfasad ne Lomi Kesfasad

⁷ Laen dù tau tmaba ebéléem ne laen se dù tau htóbóng béléem. Dengi mom hebnos bélê me, deng tódô bayaem mi abay se lemwót bè salà me.

Isaya 64:7 Referans Kwoze

Isaya 59:16

Ya tey ketngahen abay se laen dù tau tonen mò tmóbóng yó kem tau gel nongò le, bà sotu. Yó gónóm mon, tódô lemwót bè kun kfasang gónón lemwà kul ne gónón gemmò bè yó kem hohon le.

Isaya 59:2

Yó gónón là hmungol kuy lemwót bè yó kem salà ye. Kaem salà ye se hemseng kuy ebè Dwata bè yóm kehloni ye ebéléen.

Isaya 54:8

Tehe knogolu yu lemwót bè yóm kebutu kuy, okóm olon likót. Okóm ni, htonu kuy yóm klaen dù sónen yóm kbong nawahu kuy.” Yó se udél yóm Dwata lemwà kuy.

Isaya 50:2

Moen de ke là kenmón le dou yó kem dou tau bè yóm tehe kógówu elem blóng le yóm naw e kehewà kul? Moen de ke là bnalà le dou bè yóm ktabahu kul? Ilóem laen dù kgisu kô lemwà kul? Balù yó hem mohin, gbeku tódô hekti du lemwót bè udélu. Ne yó kem él mlel, gbeku tódô hekti kul anì gotu matay yó kem utón él nô lemen, ne henbalingu benwu là hyu menwu du.

Isaya 27:5

Okóm ke tô le hofin béléu yó kem tau hmohon yó kem dou tau, yake na le gna mit sefyu béléu. Tahu se, yake na le gna mit sefyu béléu.”

Husiya 5:15

Ominu semfulék ebè yóm dou gónó nô ne tódô bayau lu efet dilô le yóm kegsalà le. Ke deng sidek keglayam le angat bud hnebel le o, ne bud le htóbóng béléu.”

Jirimaya 9:7

Duhen yó, ni se udél yóm Dwata laen dù là gbeken du, monen, “Lemwót bè yóm nmò le ni, gotu hnou lu, lómón yóm gel kehnò le bala tók anì mkó yóm kê faken. Laen dù dumu lanu hkó du yó kem salà le.

Isaya 59:4

Gel ye skukum, okóm là kô ndà ye du yóm kukum tedeng mom snalig ye yóm kéng anì gemmò ye. Tey mahil bélê ye mò du bè kem dumu tau yóm sidek gel natul ye.

Isaya 57:17

Tahu se, tehe lenbutu lu lemwót bè salà le ne bè yóm tey kesbì le ne yó se gónóhu tmafak kul ne tódô mayà kul. Bede tey mgel kulu le, tódô henlel le lemolò du yóm kul kóyô.

Isaya 1:15

Ke sok gel hdà ye hólól ye bè yóm gel kni ye ebéléu, là kô kenmónu kuy. Balù hilu dulék ye mni ebéléu, là kô naw e hnungol kuy, yakà hónô litô tau deng bnonok ye lem yóm hólól hdà ye.

Kem Lingón 14:4

Ofo kul mon du ke là gel ton Dwata du yóm sidek gel nmò le. Yó udél Dwata, monen, “Laen kô dù bélê le ke hulung hedem. Tódô le mowil lan le lemugi yó kem dou tau. Hol mou kun ne ke tô le gel mni ebéléu yó kem tau gel mò sidek yó.”

Kehewà 32:12

Kmoen se ke mon yó kem tau Idyip, yó gónóhem mit kul hewà gu bè Idyip yó kem tauhem anì nam e hnatay lu lem bulul ne anì gotu sulék genlaem lu? Tongem yó ne lembut, tenlesem hendemem, béem tô hegfà yó kem tauhem yóm gfà monem yó.

Kem Lingón 100:3

Hol bê tekuy abay klifót, yóm Dwata gónó tekuy mogot, du se yóm hol tahu Dwata. Tehe nifilen tekuy, du se hol mfun tekuy, ne tekuy se yó kem kun tau. Hol lómón ke tekuy yóm ubiha tendo gel sen-gyoken.

Isaya 45:9

Henkna ye bè yóm tau mifil kuleng tonok, gbek yóm kuleng kô semgil yóm tau mifil du? Laen kô dù gónón stólóng bè yó kem dumu kuleng. Gbek yóm kuleng tonok kô smólók yóm tau mifil du ke tedu nmoen? Duhen ke gbek yóm kuleng kô semlón yóm là khulung yóm tau mifil du?

Isaya 63:16

Uu se yóm hol kum mà. Yó kem tehe fù me Abraham ne Jakub, là bud tenngón le kum. Okóm uu se hol kum mà yóm gónó me mogot, yóm tehe gel lemwà kum.

Malakay 1:6

Yó udél yóm Dwata laen dù là gbeken du ebè yó kem tau gel blóng ebéléen, monen, “Hol gel nadaten maen yóm ngà ne yóm tóbóng lówó hol gel wen klikoen yóm amohen. Igoen ou mà ye, moen de ke là nadat ye dou? Igoen ou se gónó ye mogot, moen de ke laen dù klikò ye dou? Yu kem tau blóng ebéléu, yu se yóm deng hemgnok do.” Okóm mom yó mon ye mò dou, “Tedu de deng gónó me hemgnok kóm?”

Malakay 2:10

Là tek sotu du kô yóm Mà tekuy kem tau Juda? Là tek sotu du kô yóm Dwata tehe mifil tekuy? Na ke lómón yó, moen de ke deng mom nulé tekuy yóm deng senfasad tekuy? Moen de ke deng mom genbà tekuy yóm tehe kesfasad le Dwata yó kem tehe fù tekuy?