Isaya 61:8 - Udél Dwata: Gna Kesfasad ne Lomi Kesfasad

⁸ Yó udél Dwata, monen, “Hol nóyóu yóm kukum tedeng ne alì kenbéu yóm tau gel hemgnok kem dumuhen ne yóm gel mulé udin. Angat dohò keblayu kul ofol yó kem dou tau. Ne wen senfasad me, yóm fasad laen kô dù sónen.

Isaya 61:8 Referans Kwoze

Kem Lingón 11:7

Yakà tey tedeng kmoen yóm Dwata, ne hol nóyóen yó kem nmò tedeng. Yó kem tau mò du yóm tedeng, angat ton le lem uyó Dwata.

Jirimaya 9:24

Ke wen tau móyô megsalù, yó dé salù le yóm ketngón le dou ne yóm ketnef le yóm dou kmò. Salù le ou dé yóm Dwata tedeng kkukumen ne tedeng kmoen. Ne yóm kbong nawahu tau là kóen monol. Ni kem ni koni gónóhu hligal. Ou se Dwata nim mudél ni.”

Jirimaya 32:40

Angat wen senfasad me yóm fasad laen dù tul sónen. Fasadu kul yóm tendo keblayu kul yóm hyu. Suu bè nawa le yóm tendo klikò le dou ne là kô bud tebel le do.

Isaya 55:3

Ni hnungol ye ou kem dou tau, géhél ye edini béléu. Géhél ye ne anì wen klowil ye. Wen fasad nmou bélê ye, yóm fasad laen dù sónen. Yó fasadu kuy ni, blayu kuy yóm tóbóng tehe fasadu ke Dabid.

Kem Lingón 37:28

Yakà tey hyu nawa Dwata du yóm tedeng. Là kô bayaen kul yó kem tau teneb béléen ne laen dù sónen yóm tendo kofinen kul. Okóm yóm kul lugod yó kem tau gel mò sidek, angat hdó le lu ta yóm tonok yó.

Tekang Kbuten 17:7

Nim fasadu kóm ni ne yó kem angat sfuhem,” mon Dwata, “là kóen bud mulék elem baku, hol fasad laen kô dù tul sónen. Yó fasadu kóm, ou se hol kóm Dwata ne bud ou se hol kul Dwata yó kem angat sfuhem.

Kem Udél Hlalak Tehe Selumun 8:20

Yóm dou kmò klan sal mlan bè ktedengen ne sal hlanu bè yóm là keskihuhen.

Kem Lingón 99:4

Uu se yóm Hol Geta laen dù là gbeken du, henlom nawahem yóm tedeng, laen kô dù mtukul nfihem. Sal tedeng yóm gel nmoem bè Israél, ne sal tódô.

Kem Udél Hlalak Tehe Selumun 3:6

Balù nô kihu nmoem nam na gel setngón ke Dwata ne du he malak kóm bè yóm lan tedeng.

Kem Lingón 45:7

Tey bong nawahem du yóm tedeng, ne fen nutó nawahem yóm sidek. Yó gónóm mon, Dwata yóm hol kóm Dwata, deng hegetahen uu senta yó kem dumuhem mlan bè yóm deng ketwélen kóm yóm hnolo mit kligal.

Kem Lingón 33:5

Tey hyu nawa Dwata du yóm nmò tedeng. Là kóen monol yóm kbong nawahen tau, tódô lengeben klamang benwu yóm nawahen yó.

2 Samwél 23:5

Deng nélék Dwata yóm dou fes lówó. Yakà deng wen fasaden do, yóm fasad laen dù sónen, fasad mdengen, lelen wen hgeten. Tendo knudung Dwata o anì laen dù hemenu, ne anì wen gónón e kól yó kem nmou.

2 Tisalunika 3:5

Yó hem gónó tekuy mogot hol hetngón du kuy yóm tey kbong nawahen kuy Dwata, ne hetngónen kuy snéen yóm khulung hbala lemwót bè Krays.

Kem Lingón 50:5

Yó udélen, monen, “Sentifun ye lu ebéléu yó kem dou tau là monol nawa le mimón do, yó kem tau deng dumuhu sfasad mlan bè kedsù le.”

Kem Lingón 32:8

Deng mon Dwata mò dou, “Toloku kóm he yóm lan mò loloem. Ne wen mò hlolou kóm, ne tendo wen hlauhu kóm.

Matyu 23:13

Bud mudél Jisas, monen, “Angat tey tafak ye yu kem tau tmolok hlau ne yu kem Farisi, yu kem tau gel hemtedeng knô. Lómón ke deng mom kendadu ye yóm bak dól bè yóm kogot Dwata tau. Là se kô ye dog gusek kuy, ne deng mom henseng ye yó kem tau móyô mung.

Kem Lingón 62:10

Béem tô nalu nawa ke tói mdengen ke mlan bè kgagahem duhen ke mlan bè knagawem. Ke temnù kendengenem, béem alì hsù du nawam.

Kem Lingón 105:10

Bud fasaden ke Jakub mò lolò le. Yóm kesfasad laen kô dù tul sónen bè yó kem tau Israél.

Isaya 28:17

Yó henged btes mò hemtedeng du yóm nmou bè yó, duhen yóm ktedeng kogot le kukum yó kem tauhen ne yóm klaen dù kéng le.” Là gomongen bè nili yóm bérs 18 kól bè 29. Yó tulónen bè ni kem bérs ni yóm tulón Isaya gbak ebè yó kem kmamal bè Jirusalim. Lemwóten bè yóm kmò le kéng ne ksukat le, angat mekto kkól Dwata lem blóng le mung du yóm tey kebuten, hol lómón yóm deng nmoen bè yó kem hohon le. Okóm bè yóm kógówen ni, monen bè bérs 21, “Angat kól mò yóm hentaw ton là deng hnikót ton ye du. Angat kól mò gemlà yó kem kun tau.” Là gomongen bè nili yóm tsaptér 29. Bud htulón Dwata ke Isaya ebè yó kem tau bè Jirusalim yóm kdohò ktafaken kul, abay se deng du yóm hmohon kul. Deng lenibuten Jirusalim nan e nundug lu. Ke deng kundugen kul, ominen kendel bud mundug yó kem hohon le. Bè bérs 13-16, yó udél Dwata gbak ebè yó kem kun tau, monen, “Ni kem tau ni, mon le tauhu lu. Gel mon le tey nadat le ou, okóm olon són bè udél le, tey mayuk béléu yó dum nawa le. Angat dohò genlau lu yó kem tau gel bemnos atul béléu, yó kem tau gel bnos le yó kem sidek gel nmò le. Yó hendem ye, ‘Là kô tonen tekuy Dwata, là kem tngónen du he.’ Tey alì keheklabak ye nim yu! Igò sem Dwata yóm gel mifil ne du se yóm alì geta senta ye.” Dohò yóm keglà le ni kem tau lómón ni, ne angat dohò snéen yóm keglà yó kem hohon le.

Isaya 30:18

Baluen he ke yó nmò ye, yóm Dwata sana tolo kangaten du yóm kesfulék ye anì hegfanen bélê ye yóm kkoduhen kuy. Deng eles nô bè nawahen ne yóm tey kkoduhen kuy abay se yóm Dwata là gbeken du ke là nmoen du yóm hyu. Hligal le kul yó kem tau smalig bè Dwata.

Isaya 54:10

Anien ke gotu stunal yó kem bulul, okóm yóm kbong nawahu kuy, laen kô dù sónen. Ne laen dù sónen snéen yóm kenek nawa ye, yó se yóm fasadu kuy.” Ni se udél Dwata, yóm alì kembong nawa kuy.

Malakay 1:13

Yó gel mon ye, ‘Tey mgel bélê me lemolò du yóm dê hlolò Dwata ni,’ ne deng ye meklit lemolò yóm dou hlau,” udél yóm Dwata laen dù là gbeken du. “Ngem, deng mom dsù ye ebéléu yóm ógóf hennagaw ne ógóf tugô ne ógóf wen desen. Henmóyóu kô yóm ógóf lómónen yó? Là kô naw e henmóyô du,” mon Dwata.

Isikél 34:25

Angat wen senfasad me yó kem dou tau, duhen yóm kenek kbenwu le. Ne yó kem ógóf lóbô lem bnes nô ta yóm tonok le, gotu lohu lu mayuk ani yó gbek le tódô tungô lem dlag yó kem dou tau, laen kô dù bud knikò le.