Isaya 59:1 - Udél Dwata: Gna Kesfasad ne Lomi Kesfasad

¹ Ofo kuy mon du ke yó gónó Dwata là lemwà kuy abay se là bud gbeken du ne. Ne yó gónón là hmungol du yóm gel kehtóbóng ye béléen abay se deng bokong. Là kô yó du.

Isaya 59:1 Referans Kwoze

Jirimaya 32:17

“Ó Dwata yóm hol dandónen geta, mlan bè yóm tey kfasangem nmoem longit ne tonok. Laen kô dù là gbekem du.

Isaya 50:2

Moen de ke là kenmón le dou yó kem dou tau bè yóm tehe kógówu elem blóng le yóm naw e kehewà kul? Moen de ke là bnalà le dou bè yóm ktabahu kul? Ilóem laen dù kgisu kô lemwà kul? Balù yó hem mohin, gbeku tódô hekti du lemwót bè udélu. Ne yó kem él mlel, gbeku tódô hekti kul anì gotu matay yó kem utón él nô lemen, ne henbalingu benwu là hyu menwu du.

Lista 11:23

Ne yó balà Dwata du yóm udél Musis yó, monen, “Wen kô yóm là gbeku du? Móyón tonem ne ke tahu duhen ke là ni kem monu ni.”

Isaya 65:24

Baluen ke tolo lel le mni ebéléu, deng eles gegna ne yóm kbalau kul.

Hibru 7:25

Duhen yó, ke hlan tekuy béléen yóm kehloni tekuy ebè Dwata, nô kihu kdaw tekuy tô mò du, hol là gbeken du ke là lenwaen tekuy gu lem hatay. Lemwót bè yóm kun là katay, yó gónón là skó yóm knihen tóbóng bè Dwata bélê tekuy.

Matyu 13:15

Abay se là móyô le dmalang ni kem tau ni, deng mom nseng le klingu le, deng le mom hidong. Ke bê le nmò yó dum yó, dilô le yóm gel ton le ne glileb le lanen yóm gel gungol le. Ngangen ne efet le mimón béléu,’ mon Dwata, ‘ne gotu hnifótu yó kem salà le.’

Tekang Kbuten 18:14

Laen kô dù là gbek Dwata du. Halay hulihen he bud kesfuléku edini ne deng mngà logi ne Sara, hol lómón yóm deng monu koni.”

Isaya 58:9

Ke mni ye ebéléu, gel bnalau yu. Ke tnaba ye ou, tnimulu yu. Hyu ke nmò ye sónen yóm kehegnok ye kem dumu ye ne yóm khisik ye kul ne yóm ksidek kbak ye ebélê le.

Isaya 6:10

Omin Dwata bud mon du mò do, “Yó kem tau alì mgel kulu le yó, henbalingem lu tau là hulungen hedem. Hol hbokongem lu, hol hbutóem lu anì là getnef le du lanen yóm ton le ne yóm gungol le. Abay se ke getnef le, déke beklil le ebéléu na le e hkó béléu salà le.”

Isaya 63:1

“Tau du se yóm tau kól gu bè syudad Busra bè benwu Idom? Tey alì tilob yóm nes hulô leseken. Tódô mógów hekteng, tódô dilóem béléen yóm tey kfasangen ne yóm tey kgisen. Tau du de tu?” Yóm mógów yó, duhen Dwata yóm hol gónó mogot. Tey wen kfasangen lemwà yó kem tauhen. Yó nógówen nan e tulón yóm deng kegmoen bè yó kem hohonen.

Jirimaya 14:9

Moen de ke laen dù gmoem, lómón yóm sendalù là gbeken du tmóbóng? Uu se hol nô bélê me, Dwata, ne mi se yó kem kóm tau. Hol béem abay tódô bayà mi.”

Mika 2:7

Ó kem tau Israél, yó kô udél ye? Gbek Dwata hembala du kô yóm nmò ye yó? Ke yó dum tedeng yóm tendo gel nmò ye, kaem hyu bélê ye yóm udélu ni.

1 Samwél 4:3

Tikóng le mulék ebè kamfù le yó kem dù sendalù Israél, yó mon yó kem tau malak kul, “Moen du ke là hegmò Dwata tekuy bè yó kem Flistin kemdaw ni? Yake nwa tekuy bè Silu yóm Slungan Fasad anì mung bélê tekuy Dwata ne lenwaen tekuy lem hólól yó kem hohon tekuy.”

1 Samwél 8:18

Ne bè yóm kdaw yó, angat tey sidek kehkodu ye bè Dwata lemwót bè yóm deng nmoen bélê ye nim tau hol geta deng hni ye ni. Okóm là kô bnalà Dwata kuy bè yóm kdaw yó.”

Kem Lingón 94:9

Dwata yóm mò klingu ye. Bokong kô kun? Bud nmoen se mata ye. Butô kô kun?

Isaya 50:1

Yó udél Dwata, monen, “Bè kuy kehedem du, deng kenbéu yu yó kem dou tau, hol lómón yóm logi kenbéen tuha libunen? Ke lómón yó se yóm dou nmò, nô se yóm klatas deng fenmahu bè kbéu kuy yu kem dou tau? Laen duen. Kmò kehedem ye du, deng hbaluu yu kô anì nit le yu ebè benwu mayuk, hol lómón yóm tau hbaluen yó kem ngaen anì baling le hesek? Là kô yó du lewóten yóm kegef le kuy ebè benwu mayuk. Yó lewóten, duhen yóm salà ye. Yó gónóhu hdó kuy lemwót bè yóm là kimón ye yóm hlauhu.