Isaya 55:5 - Udél Dwata: Gna Kesfasad ne Lomi Kesfasad

⁵ Ne ni, bud yu angat tminok yó kem tólóng tau bè dumu benwu. Tehe là tngón le kuy, okóm ni ne tódô le kendel sut bélê ye anì gomong le bélê ye. Ou se yóm Dwata gónó ye mogot yu kem tau Israél yóm Dwata laen kô dù belenen. Angat gotu hdohou ni kem ni. Angat tey kadat le kuy yóm kdéen tau ne angat hegetahu yu.”

Isaya 55:5 Referans Kwoze

Isaya 60:9

Duhen yó se yó kem kafal lemwót gu bè doli benwu mayuk. Eted le lu ebè kul benwu yó kem tau Dwata. Wen kem blówón bukay ne kem tahu blówón nwit le mulék mò gónó le hegfan du yóm kadat le ke Dwata yóm Dwata yó kem tau Israél yóm Dwata laen kô dù belenen. Lemwót bè Dwata se gónó le madat kul yó kem kun tau yó kem tau bè kdéen benwu.

Isaya 60:5

Bè yóm ktonem du yóm ni angat tey kligalem, botongi gehkak. Ne yó kem kendengen bè yó kem benwu gónó le gu lemwót, gotu nwit le ebéléem. Wen se kem kendengen lemwót gu fatu mohin, gotu nwit le lu ebéléem.

Sikaraya 2:11

Bè yóm kdaw kkólu, angat tey dê tólóng tau lemwót bè dumu benwu mung do ne baling le mò dou tau. Nóe lem blóng ye ne bè yó gónó ye temngón du yóm khógówen do yóm Dwata laen dù là gbeken du.

Sulat Pol Ebè Yó Kem Tau Hemtahu Bè Rom 15:20

Bè yóm gel ktoloku yóm Tulón Hyu, yó hol sen-galuhu ke yó gónóhu tmolok bè yó kem tau là deng mungol du yóm boluy Krays. Là kóe tmolok bè yó kem benwu deng wen tmolok du.

Kul Nmò 5:31

Okóm ke Dwata kun, tey kehegetahen du, hyónen fi bè kwananen. Ne du deng nmò Dwata mò gónó tekuy galak, ne mò gónó tekuy gewà gu lem hatay. Ne hlan Dwata béléen snéen yóm kehlifóten salà tekuy kem tau Israél ke hegsel te.

Kul Nmò 3:13

Ni se nmò yóm Dwata gónó le hemtahu yó kem tehe fù tekuy ekni, le Abraham ne Isak ne Jakub. Hlanen bè Jisas yóm kmoen du, yóm tau tehe hógówen, yóm deng alì hegetahen ni kmoen ni. Okóm du se yóm deng eted ye elem tdok yó kem tau mogot kukum. Tey kesekbê ye du bè solu Paylét, igò Paylét tô móyô hefewà du.

Isaya 55:4

Deng tehe nmou Dabid mò tau malak kem dumuhen ne baling sotu tau hol geta mò malak yó kem tau bè dumu benwu. Mlan béléen gónóhu hegfan du bélê le yóm kfasangu.

Isaya 45:23

Sok wen gel fasadu hol dohò se yó, laen kô gembek temles du. Yóm fasadu kuy yó, là kóen bud mulék elem baku. Yó fasadu, angat kdéen tau gotu mtud bukol bè soluhu, mung du yóm safà le béléu anì són ou yóm gónó le mogot.

Kem Lingón 18:43

Deng lenwaem ou, Dwata, bè yó kem tau gel tmifù dou. Ne deng bud nmoem ou mò mogot kem benwu, ne deng le mogot béléu yó kem tau là deng dou hnikót tngón du.

Tekang Kbuten 49:10

Yóm tuged gel nogot yóm tau hol geta mò ilô yóm kfasangen mogot tau, là kóen lana bè kun ból Juda efet kól yóm sotu sfuhen hol mfun du mogot yóm klamangen. Bè yóm kkólen, gotu nimón yó kem tau bè klamangen benwu.

Kun Snulat Jan 17:1

Timbow deng kudél Jisas, ominen temngel ebè longit, monen, “Ó Mà, deng dohò ne yóm kdaw tehe oluhem etahu. Hol dóyónem yóm kóm Ngà anì bud dóyónen se uu kun.

Husiya 1:10

Okóm angat kól yóm kdawen bè yó kem tau Israél yó, angat tey kwen le lómón helek bè kilil mohin, là gbekem msó kul. Ominen bè yóm benwu tehe gónó Dwata mon du mò kul, ‘Là do tau du,’ bud bè yó se angat gónó Dwata mon du mò kul, ‘Yu se hol kun ngà yóm Dwata laen tul katayen.’

Isaya 52:15

Okóm ni, tey kehtaw le du yó kem tau bè dumu benwu. Tódô le teneng yó kem tau hol geta bélê le, sidek ketnga le. Tódô ton le ne tngón le yóm tehe là deng hnikót tngón le du.”

Isaya 49:6

Bud mon Dwata mò dou, “Uu yóm mò tóbóng lówóhu, ni wen tey bong sigangu tahem mkay senta yóm gnan. Là són du yóm bud kulék kegeta yó kem dù tau Israél yóm hmou kóm, okóm nmou uu layag bè yóm kdéen tau bè klamangen benwu anì wen lan le gewà.”

1 Pitér 1:11

Bè yóm kehnagì le du, hnebel le ke kilón yóm angat kmò Dwata du, ne yóm mò angat kmoen du. Hol ni sem kmoen ni yóm tehe hetngónen kul yóm Tulus Krays nô bélê le. Eles hetngónen kul yóm keglayam yóm Krays, ne yóm kehegeta Dwata du bè kogolen.

Hibru 5:5

Senged snéen ke Krays, là kô nan e ten-gna mon du, ou dé mò fen blóng tau ebè Dwata. Kaem tódô Dwata yóm fen mélék du, yó monen mò du, “Uu yóm hol Ngau. Deng duhen ni ne yóm kdawu hegfan du yóm hol kngau kóm.”

Ifisus 3:5

Tehe yu ekni, là kô tngón kem tau gnan du yóm bunihen yó. Okóm nim kmoen ni, deng hegfan Dwata bè yó kem aposol ne bè yó kem tau gel tugoden, hlanen bè Tulusen.

Kun Snulat Luk 24:26

Deng tehe eles tulón le yóm nan na keglayam yóm Misaya, omin Dwata yó he hegeta du.

Ifisus 2:11

Yu kem tau là Ju le, bê ye klifót yóm tehe kuy kmò ekni. Là kô ye semfu bè kem tau Ju se kuy, ne gel taba le kuy kem tau là tnulì. Tey kehegmón le du yóm deng ktulì le yó, igoen tek olon mlan te kulit kmò le du, là kóen mlan bè but blutut le.

2 Samwél 22:44

Deng lenwaem ou bè yó kem tau sidek udél le etahu, ne deng bud hulékem ou mò mogot benwu, ne deng le mogot béléu yó kem tau là deng do hnikót tngón du.

Isaya 45:14

Yó udél Dwata ebè yó kem tau Israél, monen, “Angat blayu kuy yó kem kendengen yó kem tau Idyip ne yó kem tau Sudan. Tódô le baling hesek bélê ye yó kem tau lembang tahà bè benwu Siba. Tódô le huli kuy, igò le kendina. Ne mtud le bukol bè solu ye, yó mon le, ‘Tahu Dwata yóm nô bélê ye, laen kô dù dumu dwata, són du.

Isaya 45:22

Beklil ye ebéléu dé anì lenwau yu, yu kem tau bè klamangen benwu. Tek són ou yóm Dwata, laen dù dumuhen.

Isaya 49:12

Tey mayuk gónó le gu lemwót. Lemwót le gu fi debwak ne fi desdef ne lemwót le gu bè benwu Aswan yó kem dumu, benwu hol fi leged.

Jirimaya 30:19

Yó kem tau angat bud nô lem Jirusalim, tey kesngal le dmóyón do, tey kehligal le mensag. Tey kehbólu kul yó kem dou tau, henbalingu lu sotu benwu tótól ne benwu nadat.