Isaya 53:3 - Udél Dwata: Gna Kesfasad ne Lomi Kesfasad

³ Mom yó kmò me du, henwog me ne kenbê me. Tódô henbalahen yóm tey sidek kehlayam me du. Laen kô dù tau móyô temngel ebéléen, là kô dog kenmón me du. Hol lómón kmò me ebéléen lómón ke tau laen dù muhen.

Isaya 53:3 Referans Kwoze

Matyu 26:67

Nbut le bè yó ne tendo hemsidek ke Jisas. Gotu sendulak le lem uyóhen, ne sensuntuk le, lel le semtfê du,

Isaya 53:10

Yó udél yóm Dwata hol gónó mogot, monen, “Tódô lemwót bè dou kóyô yóm keglayamen yó. Yóm katayen, yó se yóm hol dsù mò lanu hmifót salà. Kogol yóm katayen yó, angat tonen yó kem semfu gu béléen, duhen yó kem hemtahu du ne angat tahà klowilen. Ne mlan béléen gónón dohò yóm dou atul.

Isaya 49:7

Wen udél Dwata ebè yó kem tauhen Israél yóm Dwata laen dù belenen yóm lemwà kul. Abay se ni kem tauhen ni, hono tau kenhisik kem dumu tau ne gel knutó nawa le lu yó kem dumu benwu, deng le baling hesek bè yó kem tau mogot benwu. Yó udél Dwata ebélê le, monen, “Angat ton yó kem tau hol geta yóm kegewà ye. Bè yóm kton le kuy tódô le hteneng mdà, botong lan le hol madat kuy. Gotu ton le yu se kul yó kem ngà tau hol geta. Tey keheglaan le bélê ye, botong lan le madat kuy.” Hol tahu dohò nim ni, abay se deng nélék Dwata yóm mò tóbóng lówóhen. Yóm fmasad du kuy nim ni, duhen yóm Dwata yó kem tau Israél, yóm laen kô dù belenen. Là kóen bud mulék elem baken yóm deng fasaden yó.

Mark 14:34

ne monen mò kul, “Tey sidek gnóm yóm gleket béléu ni, là hol tô gbeku hembala du. Nô ye bè ni ne kuy, hol ye mingat.”

Isaya 53:4

Okóm yóm keglayam alì henbalahen yó ne yóm alì sidek kegnómen du yó, kut se funen. Ofo kut hemdem du yóm alì hlayamen yó ke tafak Dwata du.

Hibru 5:7

Bè yóm tolo knô Jisas te tonok ekni, tey khotuhen nawahen gel mni bè Dwata, mung du yóm tey kkiken ne yóm gel kosok lewoken, abay se gbek Dwata lemwà du bè yóm katayen. Lemwót bè yóm keheglaanen bè Dwata ne yóm hol óyóen mimón du, hnungol Dwata yóm knihen ebéléen.

Isaya 50:6

Tódô bayau kwangu bè yó kem tau mfes do. Tódô bayau snéen yóm kehnê le dou. Ne yóm kekdut le bngetu ne yóm kedfut le lem uyóhu, tódô bayau kul.

Hibru 4:15

Yóm gel blóng tekuy ebè Dwata yó, deng gotu tngónen yóm gónó tekuy gel lunog, ne tey kkoduhen tekuy. Abay se bè yóm tehe knóen te tonok, deng gnómen se kun yóm kdéen sindil lómón yóm tekuy, okóm là gemsalaen yó yóm kun.

Kun Snulat Luk 9:22

Ne yó bud tulón Jisas kul, monen, “Nan na hol glayam he yóm Ngà Tau. Angat senkbê yó kem tuha gónó tekuy gel galak, ne yó kem tau hol geta gel demsù ebè Dwata, dalang se yó kem tau gel tmolok hlau. Ngang le mò du efet ghatay le. Okóm angat bud hlowil Dwata bè yóm getluhen kdaw.”

Kun Snulat Luk 16:14

Wen se kem Farisi nô bè yó, yó kem tau són filak alì henlom nawa le. Tikóng gungol le nim mon Jisas ni, mom sendekà le.

Kun Snulat Luk 8:53

Deng mom henkéng le Jisas, abay se deng tódô ton le katayen yóm ngà yó.

Mark 15:19

Bud sensulit nfes le bè kuluhen, lel le semdulak du. Gotu le mtud bukol bè soluhen, hningón tô nmò le béléen yóm gel kadat le yóm tau hol geta.

Mark 9:12

Bnalà Jisas se lu, monen, “Tahu se yó, gna sut Ilaydya mò fen na a hemtifes yóm kdéen. Okóm monen bè Sulat Dwata, nan hol glayam he yóm Ngà Tau, ne angat senkbê le.

Kun Snulat Jan 11:35

Ne mosok lewok Jisas.

Kun Snulat Jan 8:48

Deng mom yó bud balà le ke Jisas, mon le, “Tahu se yóm gel mon me, tauhi lemwót bè Samarya se kóm, lelen wen busawem.”

Matyu 27:63

Mon le mò du, “Ó Sér, gtulón bè nawa me yóm tehe monen tum tau mò kéng tu yóm kegenen tolo mowil, ‘Bè getluhen kdaw, bud hlowil Dwata ou.’

Mika 5:1

Ó kem tau bè Jirusalim, gotu sentifun ye lu yó kem sendalù ye. Deng snibut le tekuy yó kem hohon tekuy. Wen tuged nogot le mò bogul le lem uyó yóm tau malak bè Israél.

Dwata 32:15

Yó kem tau Dwata, deng le gotu baling tau mdengen. Okóm deng mom kenbê le Dwata. Gotu le mabù, mo le mom hemnobò lan le alì mken. Deng knogol le Dwata, yóm tehe mifil kul. Kenbê le Dwata, yóm hol gembek lemwà kul.

Kun Snulat Luk 19:41

Ngang le Jisas mógów efet le móyón gdofì bè Jirusalim. Bè yóm ktonen yóm syudad bong yó, botong mosok lewoken,

Kem Lingón 69:29

Okóm béléu dou, Dwata, deng tey alì sidek kegnómu du. Bud bentikem ou, hol lenwaem ou.

Mark 10:33

“Ngem nim kógów tekuy ebè Jirusalim ni,” monen, “sok kuy kól ditu, angat eted le yóm Ngà Tau elem tdok yó kem geta bè yó kem gel demsù ebè Dwata ne yó kem tau gel tmolok hlau. Yó angat kukum le du, hatay. Ne angat blay le elem tdok yó kem tau sundu Ju du.

Mark 10:34

Tey angat kehlowon le du, ne lel le semdulak du, ne angat nfes le, ngangen efet hnatay le. Bede bè getluhen kdaw, angat bud mowil.”

Isaya 52:14

Tódô le neb yó kem tau bè yóm tehe kton le du, là hol dilô le du lówóhen ke lówó tau.

Kem Lingón 88:4

Hol lómón kmò le dou, lómón ke yóm tau deng matay, lómón ke yóm tau laen dù bud tmóbóng du.