Isaya 53:10 - Udél Dwata: Gna Kesfasad ne Lomi Kesfasad

¹⁰ Yó udél yóm Dwata hol gónó mogot, monen, “Tódô lemwót bè dou kóyô yóm keglayamen yó. Yóm katayen, yó se yóm hol dsù mò lanu hmifót salà. Kogol yóm katayen yó, angat tonen yó kem semfu gu béléen, duhen yó kem hemtahu du ne angat tahà klowilen. Ne mlan béléen gónón dohò yóm dou atul.

Isaya 53:10 Referans Kwoze

Sulat Pol Ebè Yó Kem Tau Hemtahu Bè Rom 8:32

Ke là nalihen du yóm hol tek sotu Ngaen, tódô hamaen klowilen bélê tekuy, sélét mom yó ne là blayen du tekuy yóm kdê deng tehe fasaden tekuy.

2 Kurin 5:21

Yóm Krays, laen kô bang salaen kun. Okóm lemwót bè yóm któbóng Dwata tekuy, yó gónón fen hbô du ke Krays yó kem salà tekuy. Lemwót bè yóm deng kessotu tekuy bè Krays, deng tekuy gomong ne bè yóm kun ktedeng Dwata.

Glasya 3:13

Okóm laen kô dù tau gembek lemolò du nim ni. Yó gónóm mon, deng tekuy mom megtafak du. Okóm ke Krays, du fen megtafak lanen msok tekuy bè yóm deng kegtafak tekuy yó. Abay se deng monen bè Sulat Dwata, yó monen, “Ke wen tau matay bè kros, yó se ilô yóm ktafak Dwata du.”

Sikaraya 13:7

Yó bud udél yóm Dwata laen dù là gbeken du, monen, “Yó ne, sudeng, hnatayem yóm tau semgyok yó kem dou ubiha, yóm tau hol fi béléu. Hnatayem yóm tau semgyok ubiha anì gotu le sekla yóm kdê ubiha le. Ne fen ou tmafak yó kem hanà lemnek.

Ifisus 1:5

Lemwót bè yóm kbong nawahen tekuy Dwata, deng kem tehe eles gegna ne kehedemen du yóm kngaen tekuy hlanen bè Jisas Krays. Tey kligalen bè yóm kngaen tekuy yó, hol lemwót bè kun kóyô yóm kmoen du.

Sulat Pol Ebè Yó Kem Tau Hemtahu Bè Rom 6:9

Tngón tekuy snéen yóm deng bud kehlowil Dwata ke Krays, là kóen bud matay ne. Laen bud gmoen béléen yóm hatay.

Isaya 53:12

Duhen yó, mon Dwata, angat tey kehegetahu du lem blóng yó kem tau alì tótól ne alì mfasang. Là kô nalihen du klowilen, deng gnómen yóm kul kegtafak yó kem tau mò sidek. Yóm katayen yó mò leyu lówó yóm kdéen tau gemsalà, lelen mni béléu anì hnifótu bélê le yó kem salà le.”

Deng Hegfan 1:18

Ou se yóm laen dù tul katayen. Denge tehe matay, okóm ni denge bud mowil, laen dù bud sónen ne yóm dou klowil. Ou se yóm wen kfasangen mogot hatay, dalang se yóm benwu gónó le nô yó kem tau deng matay, ou se yóm mogot du.

1 Pitér 2:24

Bè yóm tehe ktutuk le ke Krays bè yóm kros, deng nwiten ne yó kem salà tekuy, ne deng mom du tnafak bè salà tekuy. Yó gónón mò du yóm yó anì tnagak tekuy yó kem sidek gel nmò tekuy, ne anì hol nô bè nawa tekuy mò du yóm hyu. Du se yóm tehe alì glayam, ne yu se yóm fen hyu bè kililen.

Sulat Pol Ebè Yó Kem Tau Hemtahu Bè Rom 8:8

Yó gónóm mon, là kô gbeken hefligal ke Dwata yóm tau yó.

Kun Snulat Jan 12:24

Tódô tulónu kuy ktahuhen,” mon Jisas, “lómón yóm sbotù bnék halay, ke là nan gebeng elem tonok ne lembóg, là kóen na a tmowok, ne là se wen bunguhen, tódô sana keblotuen. Okóm ke deng lembóg, yó he kwen towoken, ne angat tey kbunguhen.

Matyu 3:17

Ne ominen wen mudél gu bè longit, monen, “Ni se hol dou Ngà tendo gónón nô nawahu. Tey kligalu béléen.”

Isaya 46:10

Deng eles tulónu kuy lemwót bè kbuten yóm angat sut hulin kdaw. Tehe yu ne ekni eles ktulónu du yóm sut yó. Deng tehe tulónu kuy sok dou atul, hol dohò se yó. Tódô nmou yóm kdê deng eles natulu.

Isaya 42:1

Yó udél Dwata, monen, “Ni sii yóm tau dou tóbóng lówó, yóm tau tendo ten-gelu. Du se néléku ne tey hyu nawahu ebéléen. Deng suu béléen yóm dou Tulus. Ne du mit yóm kukum tedeng bè ket benwu.

Hibru 9:14

Ke tehe wen ktueden yóm kul litô yó kem ógóf, milud he ktueden yóm kun litô Krays. Mlan bè kun tóbóng yóm Tulus Dwata laen dù tul katayen, yó gónó Krays tódô hamà du yóm kun klowil mò dsuen ebè Dwata, yóm dsù tódô ket du. Yóm litô dsuen yó, gbeken mkó du bélê tekuy yóm sidek gel hemblat tekuy lemwót bè yóm là kegtóbóngen tekuy yó kem dê tehe gel lolò tekuy. Ne ni kmoen ni, gbek tekuy mò du yóm hmò Dwata tekuy, yóm Dwata laen dù tul katayen.

Hibru 7:27

Là kóen na a mkél bè yó kem dumu tau tehe gel blóng le ebè Dwata. Ke bélê le kul, sal gel wen dsù le ket kdaw. Tanay gónó le gel demsù bè yóm kul salà, omin le tmodol demsù bè salà yó kem dumu tau. Okóm là ke Jisas kun. Tek suléken demsù, bede yó dsuen, kun lówó. Yóm kun kedsù yó, laen kô bud seefen.

Hibru 2:13

Ne wen bud monen, “Dwata se yóm hol snaligu.” Ne bud ni sii yóm sotu tehe monen, “Ni ou, Dwata, gotu le mung do yó kem ngà deng blayem do.”

Ifisus 5:2

Yóm gel kmò ye bè kem dumu ye, hol hewót ye bè yóm kesbong nawa. Henkna ye bè Krays dé bè yóm kbong nawahen tekuy. Gloken tódô hamà yóm kun klowil bélê tekuy mò dsuen ebè Dwata. Yóm dsuen yó, hol lómón ke yóm boo alì minggel mbel ebè Dwata, ne tey gsengel nawahen du.

Ifisus 1:9

Lemwót bè kun kóyô deng heglileben tekuy ne yóm tehe atul bunihen. Yóm atulen yó, deng eles hendemen yóm kehlanen du bè Krays.

Kun Snulat Luk 1:33

Du mò angat gónó le mogot yó kem tau semfu gu bè yóm tehe Jakub, ne laen kô dù sónen yóm kogoten tau.”

Matyu 17:5

Yóm igò Pitér tolo mudél, tódô lememek eta le yóm tey lobun sminang bukay, tódô gungol le yóm mudél gu lemen, monen, “Ni se hol dou Ngà, gónón nô nawahu. Tey kligalu béléen. Hol gel hnungol ye.”

Sifanaya 3:17

Yakà dengen nô bélê ye yóm sana kuy Dwata hol gónó mogot. Tey wen kfasangen lemwà kuy bè yó kem hohon ye. Tey angat kehligalen bélê ye. Lemwót bè kbong nawahen kuy, gotu kóhen bélê ye yóm dê knikò ye. Lemwót bè yóm tey kligalen bélê ye gónón tódô hewót semngal.

Mika 7:18

Laen kô dù dumu Dwata mkél kóm. Uu se yóm Dwata hmifót salà yó kem dù tauhem mowil. Sal gel wen sónen yóm kebutem tau, abay se yó hol nô bè nawahem yóm kkoduhem kul.

Danyél 9:24

Wen fat latu bud syóm folò halay klawi yóm buteng eles htólóng Dwata mò lanen tmóbóng yó kem dumuhem tau Israél kkólen bè yóm kun syudad. Yó nmoen, angat kóhen bè yó kem tau yóm tendo katù le du ne yóm tendo kmò le salà. Angat wen lanen mayad salà le. Ominen angat wen kukum tedeng suen lem blóng le ne laen tul sónen yóm klolò le du. Yóm kmoen du ni kem ni mò gónón dohò yóm deng htonen kóm ne yóm deng tehe gel htulónen yó kem tugoden. Lelen yó he angat bud hetfingen yóm kun Gónô mò gónóhen hol nô.

Isikél 37:25

Angat le nô bè benwu Israél, yóm benwu tehe gónó le nô yó kem tehe fù le, yóm benwu tehe blayu ke Jakub, yóm sotu tau tóbóng lówóhu. Laen kô dù sónen yóm knô le bè yó, dalang se yó kem ngà le kkólen bè yó kem angat lugod le elem hulin kdaw. Ne Dabid yóm tau tóbóng lówóhu, angat laen kô dù sónen yóm kegetahen bélê le.

Isikél 33:11

Okóm ni se udél yóm sana Dwata hol dandónen geta, monen mò kuy, ‘Yóm tulónu kuy ni, safau bélê ye hlanu bè yóm là katayu. Là kóe hligal du ke matay yóm sotu tau igoen tolo nô tahen yó kem salaen. Hyu nawaw ke tenfloken yóm kmoen sidek anì mowil. Ó kem tau Israél, tenflok ye ne yó kem sidek gel nmò ye. Moen de ke móyô ye kendel matay?’

Jirimaya 32:41

Angat tey kligalu mò du bélê le yóm hyu ne hol lemwót lem but blututu yóm bud khuluhu kul ta nim tonok ni.

Kem Lingón 149:4

Abay se yóm Dwata, tey hligal bè yó kem tauhen. Wen ofol blayen yó kem tau hulung heglaan, duhen yóm kehewaen kul.

Kem Lingón 147:11

Okóm tey hligal bè yó kem tau wen klikò le du, yó kem tau gentud nawa le yóm là konol yóm kbong nawahen kul.

Kem Lingón 89:29

Laen kô dù sónen yóm kogoten benwu, hol lómón yóm klaen dù són longit. Sal gel wen bè yó kem semfu gu béléen angat baling tau hol geta.

Kem Lingón 72:17

Yake laen dù kmifót du boluy yóm tau hol geta bélê me, ne anì laen dù tul sónen yóm któtólen, lómón yóm klaen dù tul són yóm nóng kdaw. Yóm kdéen dumu benwu, yake gotu le mni bè Dwata anì tnóbóngen lu, lómón yóm gel któbóngen yóm tau hol geta bélê me.

Kem Lingón 22:30

Yó kem tau hulin kdaw, gotu le mimón béléen. Bud tles tulón le se kul bè kem lugod le yóm deng nmò Dwata.

2 Tisalunika 1:11

Yó gónóm mon, tey gel kni me bélê ye bè Dwata. Yó hni me anì baling hol segtón yóm kuy kmò ebè yóm tehe kun kóyô Dwata bélê ye bè yóm tehe ktabahen kuy. Dwata he hol tmóbóng kuy lemwót bè kfasangen anì gmò ye yóm kehyu kmò gel nalu nawa ye, ne yóm hyu tô nmò ye lemwót bè yóm kehtahu ye.

Isaya 9:7

Angat sónmoen tendo temnù yóm kfasangen mogot tau ne angat senflósen menek yóm benwu nogoten. Du se mò tles Dabid bè yóm tehe kogoten benwu. Yóm kmò kogoten tau angat hlanen bè yóm tey kukum tedeng nwiten. Ni se angat kmoen lemwót bè kbuten kól bè hol sónen. Hol nô bè nawa Dwata mò du yóm kdéen ni yóm Dwata laen dù là gbeken du. Là gomongen bè nili yóm bérs 8 kól bè 21. Yó tulónen bè ni, yóm htulón Dwata ke Isaya bè yó kem tau Israél menwu fi bwak ne ebè yó kem tau Israél menwu lem syudad Samarya yóm yê yó kem syudad bè benwu le. Yó mon Isaya bè bérs 13, “Kogol yóm kdê tafak ni, ewenem sana là kehegsel yó kem tau ne là kô le mulék ebè yóm Dwata laen dù là gbeken du.” Mom yó udél yó kem dù tebel, mon le, “Deng tey kegbà nim benwu tekuy, okóm bud hol hbegel tekuy hemdà du mkay senta yóm gnahen.” Yó balà Dwata du yóm alì keheklabak le yó, duhen yóm bud kehwiten du elem blóng le yó kem benwu hohon le mò gemlà kul. Monen bè bérs 14-16, “Tek olo sendawen gemlà du Dwata yó kem gel malak bè Israél ne yó kem tugod Dwata gel mò kéng. Yakà yó kem malak bè Israél yóm mit kul meglà yó kem tau.”

Kem Lingón 89:36

Yó tehe fasadu du, tendo gel wen semfu gu béléen, ne tendo bnenteyu yóm kogot le benwu bè yóm igoen tolo wen kdaw.

Kem Lingón 72:7

Klawihen mowil, yake tendo temnù ktedengen yóm kogoten benwu, ne yake laen dù sónen yóm kehyu klowil yó kem tau knamalen, lómón yóm klaen dù són yóm bulón.

Kem Lingón 69:26

Yó gónóhu mon du mò kóm yóm yó, abay se bè yóm ktafakem yó kem kóm tau, kulel se kul kmò sidek bélê le yó kem hohon le. Tey sidek kestulón le kul yó kem tau deng hendesem yó.

Kem Lingón 21:4

Deng mni béléem anì hlowilem, ne tahu se, bnalaem yóm hnihen yó. Laen kô dù tul sónen yóm keblayem du klowil.

Kem Lingón 110:3

Bè yóm kdaw angat kwitem sgida, wen tey óyô le tmóbóng kóm yó kem tauhem. Yó kem ngà logi sendaluem alì mólós nes le, angat le sut béléem ket hlafus, hol lómón kmò le, lómón ke amù gel sut hlafus.

Kun Snulat Jan 1:29

Timbow hayahen bè yó, ton Jan Jisas mógów ebéléen. Bè yóm ktonen du, monen mò yó kem tau, “Ngem yó dé yóm Ngà Ubiha Dwata mò angat dsù Dwata mò mkó salà kdéen tau.

Isaya 54:3

Bud lebétem du yóm gu hilol kililen. Bud tódô nwa yó kem tauhem yóm kul tonok deng nô lem hólól yó kem tólóng tau. Yó kem syudad deng tehe tnagak le, tódô bud henok tau.

Isaya 61:9

Angat le tey tótól bè yó kem dumu benwu. Ket tau mton kul, tódô tngón le lu se yó kem dou tau tnóbóng.”

Kem Lingón 22:31

Balù yó kem tau là dengen sut he, angat wen tmulón du kul. Yó angat tulón le kul, mon le, “Deng lenwà Dwata ne yó kem kun tau.”

Isaya 49:4

Okóm dou, botong monu, “Tey kmou du yóm hmò Dwata do, okóm laen dù gónón e kól. Tódô hotuhu gelu, okóm laen dù gendengu.” Bede tey ksaligu yóm kfi Dwata yóm deng hmoen do. Angat wen ofol blayen dou bè yó kem gel nmou.

Kun Snulat Jan 13:32

Sok gfan yóm kegeta Dwata mlan bè yóm Ngà Tau, kendel bud hegfan Dwata snéen yóm kun kegeta yóm Ngà Tau.