Isaya 49:7 - Udél Dwata: Gna Kesfasad ne Lomi Kesfasad

⁷ Wen udél Dwata ebè yó kem tauhen Israél yóm Dwata laen dù belenen yóm lemwà kul. Abay se ni kem tauhen ni, hono tau kenhisik kem dumu tau ne gel knutó nawa le lu yó kem dumu benwu, deng le baling hesek bè yó kem tau mogot benwu. Yó udél Dwata ebélê le, monen, “Angat ton yó kem tau hol geta yóm kegewà ye. Bè yóm kton le kuy tódô le hteneng mdà, botong lan le hol madat kuy. Gotu ton le yu se kul yó kem ngà tau hol geta. Tey keheglaan le bélê ye, botong lan le madat kuy.” Hol tahu dohò nim ni, abay se deng nélék Dwata yóm mò tóbóng lówóhen. Yóm fmasad du kuy nim ni, duhen yóm Dwata yó kem tau Israél, yóm laen kô dù belenen. Là kóen bud mulék elem baken yóm deng fasaden yó.

Isaya 49:7 Referans Kwoze

Matyu 26:67

Nbut le bè yó ne tendo hemsidek ke Jisas. Gotu sendulak le lem uyóhen, ne sensuntuk le, lel le semtfê du,

1 Pitér 2:4

Hol ye hloni ebéléen dé. Du se yóm bemlay du kuy yóm klowil laen dù sónen. Hol lómón ke du yóm botu deng kenbê yó kem tau gel hemdà gónô, ofo kul ke botu laen dù muhen. Igoen du he yóm botu bong muhen deng nélék Dwata.

Isaya 53:3

Mom yó kmò me du, henwog me ne kenbê me. Tódô henbalahen yóm tey sidek kehlayam me du. Laen kô dù tau móyô temngel ebéléen, là kô dog kenmón me du. Hol lómón kmò me ebéléen lómón ke tau laen dù muhen.

Matyu 20:28

Yakà lómón ni du se yóm kun nmò yóm Ngà Tau. Là kô yó du nógówen edini ke fen na a hdatù lem blóng kem tau. Okóm yó nógówen mò na e tmóbóng kul. Angat hamaen yóm kun klowil mò msok yó kem tey dê tau gu lem hatay.”

Isaya 48:17

Ni se udél yóm Dwata laen dù belenen yóm lemwà tekuy kem tau Israél yóm gónó tekuy mogot, yó monen, “Ou se yóm Dwata gónó ye mogot. Teye móyô tô tmolok kuy yóm hol hyu bélê ye. Móyóe malak kuy bè yóm lan hyu mò lolò ye.

Isaya 49:23

Yó kmò yó kem tau hol geta mogot bè yó kem benwu yó, lómón ke hol ngà le yu. Ne yó kem libun boi yehen le, lómó kmò le ebélê ye lómón ke hol kuy yê. Tey keheglaan le ebélê ye ne tey kadat le kuy. Angat wen lan le hegfan du ebélê ye yóm kadat le kuy. Bè yóm kmò le ebélê ye yó, bè yó gónó ye temngón du ou se yóm Dwata gónó ye mogot. Laen dù tau sidek nawan ke nangaten yóm któbóngu du.

Isaya 49:1

Yu kem tau nô bè benwu mayuk, ni hol hnungol ye ou. Deng eles nélék Dwata ou gu laanu là deng sut. Yó hmoen dou mò tóbóng lówóhen.

Isaya 52:15

Okóm ni, tey kehtaw le du yó kem tau bè dumu benwu. Tódô le teneng yó kem tau hol geta bélê le, sidek ketnga le. Tódô ton le ne tngón le yóm tehe là deng hnikót tngón le du.”

Isaya 42:1

Yó udél Dwata, monen, “Ni sii yóm tau dou tóbóng lówó, yóm tau tendo ten-gelu. Du se néléku ne tey hyu nawahu ebéléen. Deng suu béléen yóm dou Tulus. Ne du mit yóm kukum tedeng bè ket benwu.

Kun Snulat Jan 19:15

Omin le gotu bud hetê, mon le, “Hfatayem. Hfatayem. Htutukem bè kros.” Mon Paylét se, “Htutuku bè kros kô yóm tau hol geta bélê ye?” Mon le se, “Laen kô dù tau hol geta bélê me són Sisar.”

Kun Snulat Luk 23:35

Tey dê tau mdà bè yó, yóm na a gbót temngel du. Yó nmò yó kem tuha gónó le galak yó kem Ju, senflowon le Jisas, mon le, “Deng gel lenowilen yó kem dumu tau, yake lenowilen yóm kun knô ke du se yóm Misaya, yóm deng nélék Dwata.”

Kun Snulat Luk 23:23

Tnódónem yó kem tau, mom lenwê le hetê, mon le, “Hfatayem. Htutukem bè kros.” Ngang le hetê efet tódô gmung Paylét bè yóm kul kóyô.

Isaya 60:10

Yó udél Dwata ebè Jirusalim, monen, “Angat wen kem tólóng tau fen bud hemgulék hemdà yóm beng hilolem. Ne yó kem kul tau hol geta, angat tnóbóng le u. Tey tehe kebutu kóm, yó se gónóhu tmafak kóm. Okóm ni ne, hegfanu béléem yóm tey kehyu nawahu ebéléem ne yóm tey kkoduhu kóm.

Isaya 60:3

Lemwót bè yóm keslinangem yó, yó gónó le hloni ebéléem yó kem dumu benwu. Gotu le hloni se kul yó kem tau hol geta mogot kul bè yóm kdaw bud kehgulék Dwata klowilem.

Isaya 50:6

Tódô bayau kwangu bè yó kem tau mfes do. Tódô bayau snéen yóm kehnê le dou. Ne yóm kekdut le bngetu ne yóm kedfut le lem uyóhu, tódô bayau kul.

Kem Lingón 68:31

Yó kem tau bè Idyip, hyu ke mit le kem tembaga alì mebtes mò basa le kóm. Yó kem tau Ityupya, hyu ke hol le heglaan béléem.

Deng Hegfan 11:15

Ominen mféw yóm ghitu yó kem hógów Dwata, sen-gengu se mungol yóm tey udél gu bè longit, mon le, “Deng hto ne yóm kul kdaw mogot klamangen benwu yóm Dwata gónó tekuy mogot ne yóm kun Misaya. Ne laen kô dù sónen yóm kkamalen yóm klamangen yóm kun Misaya yó.”

Deng Hegfan 3:7

“Budi smulat do ebè yóm fen gel malak yó kem tau hemtahu bè Filadélfya, monem mò du, ni se udélen ebélê ye yóm laen dù belenen yóm kun kmò, yóm hono tahu yóm gel tulónen. Du se tles mogot du yóm kunsì tehe nogot yóm tehe fuen Dabid. Ke wen lenungkaen, là kô wen gembek bud tmikeb du. Ne ke wen tnikeben, là kô wen gembek bud lemungkà du.”

Kun Snulat Jan 19:6

Timbow ton le Jisas yó kem tau hol geta bè yó kem gel demsù ebè Dwata ne yó kem tau gel mentey bè Gónô Dwata, gotu le hetê, mon le, “Htutukem bè kros dé. Htutukem bè kros.” Mon Paylét se, “Ke tnutuk ye bè kros, tódô yu mò du, laen dù dou du. Laen se dù salà tonu béléen ke mò gónóhu hmatay du.”

Kun Snulat Jan 18:40

Deng le mom gotu hetê yó kem tau, mon le, “Béem hewà yóm tau yó. Barabas dé hewaem.” (Nim Barabas ni, sotu tau gel mulé udin.)

Kun Snulat Luk 23:18

Tikóng deng gungol yó kem tau yóm udél Paylét yó, deng mom dalil le gotu hetê, yó mon le, “Tódô hfatayem nim tau ni. Yó dém Barabas bud hefewaem kum.”

Kun Snulat Luk 22:27

Bè kuy kehedem du,” mon Jisas, “tau du se yóm geta? Yóm tau tódô gel hetnù myón ne olohen tódô mken, duhen ke yóm tau fen gel hemken du? Tódô tngón ye,” monen, “yóm tau hol geta, tódô gel hetnù myón ne olohen tódô mken se kun. Olo nim dou knô lem blóng ye,” monen, “lómón ke ou yóm fen gel hemken.”

Isaya 60:16

Yó kem dumu benwu ne yó kem tau hol geta mogot kul, angat hol sen-gyok le uu hol lómón yóm libun gel sen-gyoken ngaen. Bè yó se gónóm temngón du ou se yóm Dwata hol lemwà kóm, yóm Dwata yó kem tau Israél yóm Dwata laen dù là gbeken du.

Kem Lingón 69:19

Deng gungolem yóm tey kehnê le dou ne yóm kehyak le dou. Laen kô dù adat le dou. Gotu tonem kdê hohonu.

1 Kurin 1:9

Tey gsalig yóm Dwata. Du se yóm tehe tmaba kuy anì hol ye sfulung ebè yóm Ngaen Jisas Krays, yóm gónó tekuy mogot.

Tekang Kbuten 27:29

Yó kem dumu but tau, baling le tóbóng lówóhem ne mtud le bukol bè soluhem. Uu gónó le kmulu yó kem dumuhem setwoli ne mtud le bukol bè soluhem yó kem dumu ngà yéem logi. Yó kem tau hemmulà kóm angat tnafak Dwata lu. Ne yó kem tau tmóbóng kóm bud tnóbóng Dwata lu.”

Dwata 7:9

Yó gónóm mon, hol sù ye lem hendem ye nim ni. Yóm sana kuy Dwata hol gónó mogot, tek sónen du Dwata ne là kóen monol nawahen. Là kô klifóten du yóm tehe senfasad ye ditu bè Bulul Sinay ne gel hegfanen bè yó kem tau kembong nawa du ne mimón yó kem kun hlau yóm kbong nawahen kul efet kól bè hilu libu bud lugod le.

Kem Lingón 47:9

Gotu le stifun yó kem dumu tau hol geta mogot benwu, mung le bélê tekuy kem kun tau Dwata, yóm Dwata tehe Abraham. Dwata se hol geta senta yóm kdê tau mogot benwu. Laen kô dù bud geta sentahen.

Isaya 14:1

Angat bud mulék kodu Dwata kul yó kem kun tau Israél. Angat bud néléken lu mò hol kun tau nfun. Angat bud huléken lu ebè yóm sana kul benwu ne wen se kem tólóng tau angat mung menwu bélê le bè yó.

Isaya 19:21

Tódô hegfan Dwata bè yó kem tau Idyip du se hol tahu Dwata. Omin le yó he temngón ke Dwata ne tmaba le ebéléen. Demsù le ebéléen ne wen kem dumu blay le du. Ne wen yó kem tey fasad mget nmò le béléen ne gotu nmò le yó kem fasad le du yó.

Isaya 19:23

Bè yóm kdaw yó, wen tey lan lamang nmò le lemwót gu bè benwu Idyip kól bè benwu Asirya. Yó kem tau bè yóm lewu benwu tehe sfohon yó, tódô le mógów seswì bè yóm lan yó. Ne slomong le se tmaba ebè Dwata.

Isaya 49:26

Yó angat nmou bè yó kem tau hemgnok kuy, tódô senfatayu lu honon lu. Tódô le sbonok honon lu. Lemwót bè yóm alì sidek kebut le là kô tngón le du yóm nmò le, lómón yó kem tau lengel là kô tngón le du yóm nmò le. Bè yóm kehewau yóm kdéen tau bè klamangen benwu gónó le temngón du ou yóm hol Dwata gónó mogot, yóm msok kuy ne yóm lemwà kuy. Angat tngón le ou se yóm Dwata yó kem tau Israél, yóm laen kô dù là gbeken du.”