Isaya 41:10 - Udél Dwata: Gna Kesfasad ne Lomi Kesfasad

¹⁰ Hol bê ye abay hlikò, tendohe gel nô bélê ye. Ou se yóm kuy Dwata, laen kô dù knikò ye. Tendo gel benlayu yu kgis ne tendo tnóbóngu yu. Sónmou mofin kuy ne lenwau yu.

Isaya 41:10 Referans Kwoze

Juswa 1:9

Ni hol monu mò kóm, hol hotuhem gelem ne hol hfólem nawam. Béi abay hlikò ne béi abay htakas, yakà ou du yóm sana kóm Dwata hol gónó mogot ne tendohe nô béléem balù kihu gónóm e solu.”

Sulat Pol Ebè Yó Kem Tau Hemtahu Bè Rom 8:31

Tedu se kmon tekuy du ni kem deng monu ni koni? Yó hol gwa tekuy du yóm klaen dù gembek hemsidek tekuy ke deng gfi bélê tekuy Dwata.

Flipay 4:13

Laen dù là gbeku du lemwót bè yóm kfasang Krays béléu.

2 Kurin 12:9

Okóm mom monen mò do, “Wen gónóhu gel tmóbóng kóm anì gbekem hembala du. Kaem yóm gónóm lunog yó, bè yó se gónón gfan yóm hol kfasangu tmóbóng kóm.” Duhen yó, tey kligalu du yó kem gónóhu gel lunog, abay se là kóen mkó béléu yóm kfasang Krays gel tmóbóng dou.

Kem Lingón 27:1

Dwata se henged layagu, ne du se lemwà dou. Yó gónóm mon, laen dù bang knikou. Tendo kenlungen ou bè yó kem gfà, yó gónóhu là bud likò.

Kem Lingón 63:8

Mogote béléem, Dwata, ne tey mbegel se yóm kogotem dou, yó gónón laen dù hemenu.

2 Tutul Israél 20:17

Okóm là kô yu du mit kul sgida. Olo ye tódô htuhod mdà, tenngel ye yóm kegmò Dwata bélê le yó kem hohon ye. Ó kem tau bè Juda ne kem tau bè Jirusalim, Dwata se nô bélê ye. Hol bê ye abay hlikò, ne bê ye abay hunu nawa ye. Haya mógów ye etu, abay se nô bélê ye Dwata.”

Kem Lingón 145:14

Gotu tnóbóngen yó kem tau wen gfà le. Gotu bud hdaen yó kem tau deng btang.

Isaya 12:2

Dwata se yóm lemwà do. Són du se do snalig ne yó gónóhu là bud likò. Béléen hol gónón lemwót yóm kgisu ne yóm kligalu, hol du se yóm lemwà do.

Isaya 60:19

Bè yóm kdaw kehewau kóm yó, laen dù bud muhem du ne yóm nóng kdaw duhen ke nóng bulón. Abay se ou yóm gónóhem mogot mò layagem laen dù tul sónen. Yóm alì keslinangu, yó se tódô seflós mnóng ebéléem.

Sikaraya 13:9

Yóm dù mowil yó, angat lómó kmou kul lómón yóm tau tmógó tahu blówón ne blówón bukay bè ofi, gotu kóhen ke wen boolen. Omin le yó tmaba bè boluyu ne angat bnalau lu, monu, ‘Lu se yó kem dou tau’ ne yó mon le se kul, ‘Dwata se yóm sana kum Dwata hol gónó mogot.’ ”

Kem Lingón 37:24

Baluen ke tlokob le, là kô le masà, abay se deng eles nogoten lu.

Kem Lingón 29:11

Dwata se bemlay kul kgis yó kem tauhen. Du se bemlay kul kenek nawa.

Ifisus 3:16

Lemwót bè yóm tey kegbek Dwata tmóbóng tekuy, yó hol hnihu béléen anì tendo ten-gelen nawa ye hlanen bè kun kfasang yóm kun Tulus deng nô bélê ye.

2 Tutul Israél 32:8

Tey wen kem sendaluen, okóm olo le tau. Nô bélê tekuy yóm sana kut Dwata hol gónó mogot mò tmóbóng tekuy ne du fen sfatay bélê tekuy.” Nim udél Hisikaya ni, tey ketgelen nawa yó kem tau.

Sikaraya 10:12

Bud ten-gelu lu yó kem dou tau lemwót bè yóm ksalig le do ne ket nmò le sal hlan le bè dou boluy. Ou se Dwata yóm mudél ni.” Là gomongen bè nili yóm tsaptér 11. Yó eles htulón Dwata ke Sikaraya bè yóm tsaptér ni yóm angat keglaen yóm benwu Israél ne yó kem tau malak bè yó. Yó tulónen bè ni yóm kehmò Dwata du ke Sikaraya yóm nmò yóm tau hyu kesegyoken yó kem ubiha móyón hnatay le. Wen lewu tuged tau semgyok ubiha nô bè Sikaraya. Yó boluy yóm sotu, Nawa Dwata, hnigaden yóm kbong nawa Dwata yó kem tau Israél. Ne yóm sotu tuged boluyen Sesotu, hnigaden yóm kessotu yóm lewu kem benwu duhen Juda ne Israél. Okóm yó kem tau, deng mom kenbê le yóm tau hyu kesegyoken ubiha yó. Yóm nmò le yó, hnigaden yóm angat kekbê le ke Jisas Krays. Omin Dwata bud hmò du ke Sikaraya yóm kun nmò yóm tau alì sidek kesegyoken ubiha angat gdek lem blóng le elem hulin kdaw mò gemlà kul. Nim ni, là tagaden gotu dohò efet kól yóm tau bnoluy le Hohon Krays.

Isaya 43:5

Hol bê ye abay hlikò, tendohe nô bélê ye. Angat bud huléku yó kem kuy dumu deng sekla ebè yóm hol kuy benwu. Bè yóm angat kulék le yó, wen se bélê le lemwót bè doli benwu ditu fi dmata kdaw ne doli benwu ditu fi desdef.

Kem Lingón 46:11

Nô lem blóng tekuy yóm Dwata laen dù là gbeken du. Du se yóm Dwata tehe Jakub, ne du se gónó tekuy e mlo.

Isaya 49:8

Yó bud udél Dwata ebè yó kem kun tau, monen, “Ke deng kól yóm kdawu lemwà kuy, hegfanu bélê ye yóm tey nawahu kuy ne bnalau yóm alì kehkodu ye mni tóbóng béléu. Gel bnenteyu yu he ne nofinu yu. Hlanu bélê ye yóm fasadu yó kem tau bè klamangen benwu. Tódô ye bud mulék he ebè yóm benwu ye tehe gotu lebà.

Kem Lingón 37:17

Abay se angat kó Dwata bélê le yóm kgis le mebel klowil yó kem tau gel mò sidek. Okóm yó kem tau hyu kmò le, tendo nofin Dwata lu.

Isaya 44:2

Ou se yóm Dwata tehe mifil kuy. Tódô lemwót bè ksut ye yóm tendo któbóngu kuy. Hol bê ye abay hlikò, yakà yu du yóm tóbóng lówóhu. Yu se kem tau deng tehe néléku, kem tau kenbong nawahu.

Kem Lingón 144:11

Hol kenlungem o bè bak suk. Lenwaem o lem hólól yó kem hohonu. Hono kéng btang bè sumung le. Igò le se smafà ani tulón le yóm ktahuhen, okóm kéng le.

Kem Lingón 41:12

Lemwót bè yóm klaen dù sidek nmou, yó gónóm hlowil dou. Laen kô dù tul sónen yóm kehnóem do bè soluhem.

Kem Lingón 46:7

Nô bélê tekuy yóm Dwata laen dù là gbeken du, yóm Dwata hol gónó tekuy mogot. Du se yóm Dwata tehe Jakub, ne du se mò gónó tekuy e mlo.

Isaya 52:7

Tey minggel mton du yóm tau hógów le hulé bulul niten yóm tulón hyu. Yó lemen, duhen yóm tulón mit kenek nawa. Gotu heglalagen yóm deng kegmò le bè kem hohon le. Ne yó udélen ebè yó kem tau bè benwu Sayun, monen, “Yóm kuy Dwata, du se hol dandónen geta mogot klamangen.”

Tekang Kbuten 15:1

Kogolen bè yó, tódô hegfan bè Abram Dwata, ne gungol Abram yóm udél Dwata ebéléen, monen, “Ó Abram, hol béi abay hlikò. Tendo kenlungu uu anì laen dù tau hemsidek kóm ne angat wen tey ofol blayu kóm.”

Kem Lingón 65:5

Ó Dwata, yóm gel lemwà kum, gel bnalaem se yóm kni me béléem mlan bè yóm kehegmoem kum bè kem hohon me. Tey dê hentaw ton nmoem mò gónóm lemwà kum. Gotu snalig le uu yó kem tau bè klamangen benwu. Balù yó kem tau fatu mohin, snalig le uu snéen kul.

Kun Snulat Luk 1:30

Ne bud mudél ebéléen yóm hógów Dwata, monen, “Béi mom tô hlikò, Midi, abay se tey kehyu nawahen ebéléem Dwata.

Kem Lingón 147:12

Hol dóyón ye Dwata, yu kem tau bè Jirusalim. Hol dóyón ye Dwata se kuy, yu kem tau bè Bulul Sayun.

Kun Snulat Luk 1:13

Okóm yó mon yóm hógów Dwata mò du, “Béi hlikò, Sekariya. Deng gefet bè Dwata yóm gel knihem béléen. Angat mngà logi yóm tuha libunem. Yó angat boluyem du Jan.

Kem Lingón 99:4

Uu se yóm Hol Geta laen dù là gbeken du, henlom nawahem yóm tedeng, laen kô dù mtukul nfihem. Sal tedeng yóm gel nmoem bè Israél, ne sal tódô.

Kem Lingón 144:8

Hono kéng btang bè sumóng le. Igò le se smafà anì tulón le yóm ktahuhen, okóm kéng le.

Husiya 1:9

Ne yó mon Dwata mò ke Husiya, “Boluyem du Lo-ammi yóm ngà sut yó, abay se là do tau du yó kem tau Israél ne là se kô ou du yóm kul Dwata.

Tekang Kbuten 31:5

Bè yóm kkól le bè yó, yó mon Jakub mò kul, “Deng dilóu bè mà ye yóm là bud hol kgulit kmoen ebéléu, là mkélen bè yóm gnan. Okóm yóm Dwata tendo kun lolò mà eles tendo nô béléu.

Tekang Kbuten 49:24

Okóm yóm kun boho Jusif, eles tendo btul. Tendo kemgis gu lem abalen abay se monem lemwót bè kegbek yóm kun Dwata yóm maen Jakub, yóm eles tendo gel semgyok yó kem tau Israél, lelen gel mofin kul.

Kehewà 14:13

Bnalà Musis se, monen, “Bê ye abay hlikò. Hgel ye nawa ye dé. Tódô ton ye kemdaw ni yóm lan Dwata lemwà kuy. Yó kem tau Idyip kemtes tekuy yóó là kô bud ton ye kul ne.

Kehewà 20:20

Mon Musis se mò kul, “Bê ye abay hlikò. Yó gónó Dwata hegfan bélê ye nan e tnilów yu. Ne lemwót bè yóm klikò ye ke Dwata, yó gónón wen klikò ye mò salà.”

Isaya 50:9

Yóm Dwata hol dandónen geta gónóhu mogot, du se mfi dou. Ke du mfi dou, tau du de tô mon du wen salau? Yó kem tau tô kmamo dou, angat le tódô gotu lana se kul, lómón klana le, lómón yó kem nes nsék kaba.

Danyél 6:16

Yó gónóm mon, laen dù gmò yóm tau hol geta, tódô hekfóen Danyél ne bot le elem yóm sol gónó le kmukub yó kem liyun. Yó olo udél yóm tau hol geta ebéléen, monen, “Yó hem Dwata tendo nimónem fen lemwà kóm.”

Danyél 10:12

Ominen bud mon du mò dou, “Béi abay hlikò, Danyél. Tódô lenwóten bè yóm hol tanay kdaw keheglaanem knóem bè Dwata anì hulungi temnef, deng sana gungolen bè longit ne yóm hnihem. Ni nógówu edini naw e tulón kóm balaen yó kem hnihem yó.

Hagay 1:13

Omin Hagay tmulón du yó kem tau yóm bud udél Dwata ebélê le, yóm monen, “Elese tendo gel nô bélê ye. Ni se yóm hol fasadu kuy.”

Hagay 2:5

Bè yóm tehe kehewà yó kem fù ye gu bè Idyip, tehe fasadu kul yóm tendo eles knóu bélê le. Senged se nim kmoen ni, elese tendo gel nô bélê ye. Yó gónóm mon, hol bê ye abay hlikò. Là buden legen ne yóm angat ksinsigu longit ne tonok ne mohin.

Tekang Kbuten 26:24

Ne bè yóm kifu kkólen bè yó, bud hegfan béléen Dwata, monen mò du, “Ó Isak, ou se yóm kun Dwata yóm maem Abraham. Hol béi abay hlikò, elese tendo nô béléem. Angat tey któbóngu kóm ne hwenu bólem lemwót bè yóm tehe fasadu ke maem yóm tau tóbóng lówóhu.”

Kmukum 6:16

Bnalà Dwata se, monen, “Kaem gbekem hewà kul abay se ou tmóbóng kóm. Yóm klahilem gemlà kul hol lómón ke tek sotu tau gnidahem.”

2 Samwél 22:19

Bè yóm kdaw laen dù gmou, kulel se kul kundug do yó kem hohonu, okóm Dwata se hbegel dou.

Kem Lingón 18:36

Deng hlamangem yóm lan hloloem dou, yó gónów là tlidus.

Kem Lingón 33:12

Ya tey kehligal yó kem tau bè kihu benwu ke Dwata hol kul gónó mogot. Hligal le se kul yó kem tau nélék Dwata mò kun tau.

Isaya 35:4

Hol mon ye bè yó kem tau wen kensidek nawa le, “Hgel ye nawa ye dé, bê ye abay bud hlikò. Móyónen kól ne Dwata nan e lenwà yu ne gotu tnafaken yó kem hohon ye.”

Isaya 37:6

ominen hemwit udél se kun ebè Hisikaya, monen. “Ni se udél Dwata ebéléem. Hol béi abay hlikò bè yóm deng gungolem lemwót gu bè yó kem tau Asirya yó, yóm mon le là gbek Dwata lemwà kuy.

Sikaraya 10:6

Yó kem tau Juda, angat ten-gelu lu, ne lenwau yó kem tau Israél. Lemwót bè yóm kkoduhu kul, bud hen-guléku klowil le, hol lómón ke tehe là kenbéu kul. Yakà ou du yóm sana kul Dwata hol gónó mogot, angat bnalau yó kem hni le.