Isaya 30:7 - Udél Dwata: Gna Kesfasad ne Lomi Kesfasad

⁷ Yóm tóbóng lemwót bè Idyip yó laen dù muhen. Yó gónóm mon, nibahu Idyip ‘Swaga Là Lóbóen.’ ”

Isaya 30:7 Referans Kwoze

Isaya 2:22

Yó gónóm mon, bê tekuy abay smalig bè tau, mahil le matay se kul. Laen dù mu te smalig kul. Là gomongen bè nili yóm tsaptér 3. Yó htulón Dwata ke Isaya yóm angat ktafak Dwata yó kem tau bè benwu Juda. Yó monen bè bérs 8, “Angat gbà Juda ne Jirusalim lemwót bè yóm alì kehnê le ke Dwata ne yóm là kimón le du. Tey le móyô mò salà mkél bè yó kem tau bè Sodom. Bà udì ke olò wen yak le. Tey angat ksideken yóm angat kól bélê le. Yóm gel kmò le sidek mit kul meglà.” Bè yóm keglà Dwata kul yó, yó udél Dwata ebè yó kem gel mimón du, monen, “Wen ofol knóón blayu kuy.” Okóm yó udélen ebè yó kem gel mò sidek, “Dohò ye meglà. Yu snéen gemwa du yóm kuy ofol. Deng ye móyón megtafak ne.” Yó kem tau tanay gónó Dwata hegnóm du yóm ktafaken kul, duhen yó kem tau gel malak bè yó kem benwu le, abay se deng mom lu yóm wen gónó le ma lemwót bè yóm kehegnok le yó kem tau élél. Yó todol gónó Dwata bud hegnóm du, duhen bè yó kem libun hton dóyón gel lemsek yó kem nes gónó le gel gbóy yó kem logi. Yóm alì sidek ktafak Dwata kul yó duhen yóm gotu kegef le kul ebè Babilun. Laen kô dù bud tebel bélê le són yóm yak le. Ne yó kem logi bè yóm syudad Jirusalim yó, gotu le matay bè gida. Là gomongen bè nili yóm tsaptér 4. Htulón Dwata ke Isaya yóm angat kól, monen bè bérs 1, “Bè yóm kdaw yó là holen dê yó kem logi tebel. Hitu libun semgled du bè yóm ket sotu logi ne yó mon le, ‘Bayaem mi myehen kóm! Tódô mi mebel mò kmò kken me ne knes me. Okóm hyu ke gel tnaba le mi mlan bè yóm kóm boluy anì là gel henlò le kum kem libun là myehen.’ ” Okóm yó sotu bud htulón Dwata ke Isaya yóm bud kehguléken klowil yó kem tau, kogol yóm kegbaen yóm benwu Juda ne Jirusalim ne khegefen yó kem tau. Yó monen bè bérs 3—5, “Tu kem kdê boluy deng snulat le, tu se yó kem tau tolo mowil kdeng yóm kegbà Jirusalim, gotu le baling tau mólós. Gotu nolob Dwata yóm kehdóyón yó kem libun bè Jirusalim. Gotu hólósen yó kem tau bè Jirusalim bè yóm gónó le là gulit. Ne kenlung Dwata Jirusalim ne gomong yó kem tau nô bè yó.”

Husiya 5:13

Bè yóm kton kem tau Israél du yóm alì kwen des le ne ton yó kem tau bè Juda yóm alì kwen halì le, lemwót Israél mógów ebè benwu Asirya ebè yóm tau hol geta bè yó tô htóbóng béléen. Okóm laen se bang tóbóngen mò bulungen kul.

Lanu Jirimaya 3:26

Yó gónóm mon, tey hyu ke tódô tekuy henek, nangat tekuy yóm kegewà lemwót béléen.

Isaya 7:4

Yó tulónem du, monem, Elesi hol temgama ne hol henekem nawahem. Hol béi abay hlikò ne hol béem hesbeweg kehedemem. Laen dù knikoem du yóm kul kebut le Risin ne yó kem tau Sirya mung du yó, dalang se ke Pika. Yóm kul kebut yó hol lómón ke dù kebel yóm lewu snuk ofi, là bud le dmilóf.

Kehewà 14:13

Bnalà Musis se, monen, “Bê ye abay hlikò. Hgel ye nawa ye dé. Tódô ton ye kemdaw ni yóm lan Dwata lemwà kuy. Yó kem tau Idyip kemtes tekuy yóó là kô bud ton ye kul ne.

Jirimaya 37:7

“Ni se udél Dwata yóm kul Dwata yó kem tau Israél, monen, Hol tulónem ke Sidikaya yóm tau hefni kóm béléu, mon ye mò du, Deng le nô bè lan ne yó kem sendalù Idyip tô tmóbóng kóm, okóm móyón le bud semfulék ebè benwu le.

Isaya 30:15

Wen udélen ebè yó kem tauhen yóm Dwata hol dandónen geta, yóm Dwata yó kem tau Israél yóm laen kô dù belenen. Yó monen mò kul, “Bud ye mulék ebéléu. Ke tódô ye henek béléu ne ke hol ye smalig béléu, wen kgis ye ne laen kô dù bud knikò ye.” Okóm mom là dog ye móyô mimón du yóm udél Dwata yó.

Isaya 28:12

Yó tô blay Dwata kuy, yóm benwu gónó ye henek nô ne yóm udél hemyu nawa ye. Okóm là kô ye móyô hmungol du.

Kem Lingón 87:4

Yó mon Dwata, “Bè yóm klistahu yó kem benwu mimón dou, angat homongu Idyip ne Babilun. Bud homongu Flistya ne Tayal, balù yóm klayuk Ityupya, deng le gotu baling tau bè Jirusalim.”

Kem Lingón 89:10

Uu se tehe hmatay du yóm blol bong nô lem mohin boluyen Rahab. Lemwót bè yóm tey kegbekem, yó gónón laen dù gmò le béléem yó kem hohonem.

Isaya 10:3

Tedu se kmò ye du du bè yóm angat ktafak Dwata kuy? Tedu tô kmò ye du du yóm kwen glumfak bong angat hwiten ebélê ye lemwót bè dumu benwu mayuk? Gónó ye e tô mlóy mni tóbóng du? Gónó ye e tô bemnos du du yóm tey kendengen ye?

Isaya 30:5

Tey kegsel yó kem tau Juda bè yóm deng ksalig le yóm benwu laen dù genléd nawam du. Hendón le ke dohò yóm któbóng le kul, okóm là.”

Isaya 36:9

Balù yó hem tau genlal hol glaan bélê me, là kô ye gemmò béléen. Yó kô tô nangat ye ke henwit le yu sendalù smakay kudà yó kem tau bè Idyip, mung du yó kem klitun gel dyol kudà le bè gida? Neet he.

Kem Udél Hlalak Tehe Selumun 25:19

Yóm ksidek smalig yóm tau là gsalig du bè yóm kwen hlayam lómón se yó yóm ksideken yóm ngihi temduk duhen ke yóm ti deng tugô.