Isaya 19:18 - Udél Dwata: Gna Kesfasad ne Lomi Kesfasad

¹⁸ Ke sok kól yóm kdaw yó yóm udél Hibru baling udél le bè yóm limu kem syudad bè Idyip. Yó kem tau bè yó ke mò le safà, tódô hlan le bè boluy yóm Dwata laen dù là gbeken du. Ne yó boluy le du yóm sotu bè yó kem syudad le “Syudad Kdaw.”

Isaya 19:18 Referans Kwoze

Sifanaya 3:9

“Bè yóm kdaw yó, tenlesu yóm ksumóng tau anì baling mólós ne anì tódô kdê le tmaba bè yóm dou boluy ne ssotu nawa le lemolò dou.

Sikaraya 2:11

Bè yóm kdaw kkólu, angat tey dê tólóng tau lemwót bè dumu benwu mung do ne baling le mò dou tau. Nóe lem blóng ye ne bè yó gónó ye temngón du yóm khógówen do yóm Dwata laen dù là gbeken du.

Isaya 19:21

Tódô hegfan Dwata bè yó kem tau Idyip du se hol tahu Dwata. Omin le yó he temngón ke Dwata ne tmaba le ebéléen. Demsù le ebéléen ne wen kem dumu blay le du. Ne wen yó kem tey fasad mget nmò le béléen ne gotu nmò le yó kem fasad le du yó.

Jirimaya 12:16

Ne ke hol lolò le yóm kul hentahu yó kem dou tau ne ke hol lemwót lem but blutut le ne ke hlan le bè dou boluy ke wen safà le, ke mon le, ‘Safau bè boluy yóm Dwata là matayen’ (lómón yóm tehe ktolok le yó kem dou tau, hsafà le lu bè boluy Baal) ke yó nmò le, baling le mò dou tau.

Isaya 19:19

Ke sok kól yóm kdaw yó, wen mò gónó le gel demsù ebè Dwata bè yó bè Idyip ne wen botu tmahà hdà le bè kilil yóm tonok Idyip mò ilô yóm deng kehtahu le bè Dwata.

Isaya 2:11

Bè yóm kdaw yó, angat tódô gesón yóm alì kehegmón tau ne yóm alì keheklabak le. Tek són sem Dwata yóm hol geta bè yóm kdaw yó.

Dwata 10:20

Hol knikò ye yóm sana kuy Dwata hol gónó mogot ne olon du gónó ye e tmaba. Hol ye hteneb mimón du ne olon bè boluyen gónó ye gel hlan du ke wen fasad ye.

Kem Lingón 68:31

Yó kem tau bè Idyip, hyu ke mit le kem tembaga alì mebtes mò basa le kóm. Yó kem tau Ityupya, hyu ke hol le heglaan béléem.

Nihimaya 10:29

gomong me bè yó kem tau gónó me gel galak bè yóm ksafà me bè Dwata. Ke nulé me yóm safà me ni, hol tnafak Dwata mi ne henmóyô me yóm tafak Dwata kum yó. Yó safà me ebè Dwata, bè yóm klawi me mowil là gbek me du ke là lolò me du yó kem deng Hlau Dwata kum, yó kem hlau tehe hlanen bè Musis yóm tau tóbóng lówóhen. Là gbek me du ke là nimón me du yó kem kdê hlauhen kum yóm sana kum Dwata hol gónó mogot. Là gbek me du snéen ke snonol me yó kem hlauhen kum ne yó kem hloloen kum.” Yó se yóm safà yó kem tau Israél bè yóm kimón le ke Dwata. Là gomongen bè nili yóm bérs 30 kól bè bérs 39. Yó tulónen yóm gotu klista le yóm kdê hlau Dwata kul mò hol nimón le. Là gomongen bè nili yóm tsaptér 11, Yó tulónen bè ni yóm kmò kélék le yó kem tau mò menwu bè Jirusalim ne yóm boluy yó kem tau deng nélék le yó. Lemwót bè yóm là hol bud kwen yó kem tau menwu bè Jirusalim, yó gónó le mélék kem tau mò gmónô lem yóm syudad yó mò fen tmóbóng mentey du bè yó kem hohon le. Yó tulónen bè tsaptér 12 yóm gotu klista le yó kem tau blóng ebè Dwata ne yó kem sfu Libay mung ke Sirubabél gna mulék ebè Jirusalim ne yóm nmò le bè Gónô Dwata bè yóm kkól le. Bud tulónen bè ni snéen yóm tey kehligal le bè yóm kehfun le du ebè Dwata yóm beng hmilol Jirusalim. Bè yóm kehligal le yó, wen lewu lumbuk tau semngal mógów ta yóm beng yó. Sotu lumbuk semngal mógów fi ebè kwanan ne sotu lumbuk semngal mógów fi ebè iwóng. Ngang le hligal semngal mógów efet le bud segeslong yóm kdê le ditu bè dolin. Yó tulónen bè tsaptér 13 yóm bud kulék Nihimaya ebè Babilun bè yóm tau hol geta bè Pérsya tehe gónón mò nmò. Ominen bud mulék ebè Jirusalim. Bè yóm bud kkólen bè Jirusalim, tey sidek kebuten abay se wen bè yó kem tau Israél là bud blay le du ebè Dwata yóm gesfoloen ne deng le mom hembalù bè kdaw kehegnô. Lel le mom myehen bè yó kem tólóng libun hmilol kul. Yó nmò Nihimaya, tey kudélen kul ne hmoen kul yóm deng hlolò Dwata kul. Tahu se, lolò le.

Tekang Kbuten 11:1

Yóm tehe yu ekni, tek sotu udél le yó kem tau bè klamangen benwu.

Isaya 14:1

Angat bud mulék kodu Dwata kul yó kem kun tau Israél. Angat bud néléken lu mò hol kun tau nfun. Angat bud huléken lu ebè yóm sana kul benwu ne wen se kem tólóng tau angat mung menwu bélê le bè yó.