Isaya 14:2 - Udél Dwata: Gna Kesfasad ne Lomi Kesfasad

² Tey dê dumu benwu angat tmóbóng kul anì bud le gulék bè yóm benwu tehe blay Dwata kul. Ne bè yó, wen se kem dumu benwu angat baling ghesek bélê le. Ne angat tles negef yó kem tau Israél yó kem tau tehe megef kul. Ne angat tles nogot le yóm benwu tehe hemsidek kul.

Isaya 14:2 Referans Kwoze

Isaya 61:5

Yu kem dou tau, angat le mò nmò bélê ye yó kem tólóng tau lemwót bè dumu benwu. Fen sen-gyok le yó kem ógóf ye. Ne mò le hulu bélê ye bè yó kem tonok ye ne sen-gifà le yó kem bungu grép deng hulu ye.

Isaya 60:14

Yó kem ngà logi yó kem tau tehe hemgnok kóm, angat le mógów ebéléem na le e heglaan béléem, yó se mò lan le hol hegfan du yóm kadat le kóm. Kdê yó kem tau tehe kemhisik kóm, angat tey keheglaan le béléem. Yó angat boluy le kóm, ‘Syudad Dwata.’ Sotu bud kboluy le kóm, ‘Sayun, syudad yóm kul Dwata yó kem tau Israél yóm Dwata laen dù belenen.’

Jirimaya 30:16

Okóm bè yóm kdaw kwitu kuy semfulék yó, kdê yó kem tau gemlà kuy bud wen gemlà kul se kul. Kdê yó kem hohon ye bud wen se megef kul. Kdê yó kem tau muku kimu ye, bud wen se muku kimu bélê le. Kdê yó kem tau mundug kuy, bud wen se mundug kul.

Danyél 7:18

Okóm bè hol sónen, yó nmò yóm Hol Geta, gotu blayen ebè yó kem kun tau yóm klamangen yóm nogot le ne laen kô dù sónen yóm kogot le du.”

Isaya 49:23

Yó kmò yó kem tau hol geta mogot bè yó kem benwu yó, lómón ke hol ngà le yu. Ne yó kem libun boi yehen le, lómó kmò le ebélê ye lómón ke hol kuy yê. Tey keheglaan le ebélê ye ne tey kadat le kuy. Angat wen lan le hegfan du ebélê ye yóm kadat le kuy. Bè yóm kmò le ebélê ye yó, bè yó gónó ye temngón du ou se yóm Dwata gónó ye mogot. Laen dù tau sidek nawan ke nangaten yóm któbóngu du.

Deng Hegfan 3:9

Ngem, deng wen bélê ye nfun Seitan, duhen yó se kem tau snalig le yóm ktau le Ju. Okóm sundu dou tau du yó kem tau yó. Angat htudu lu bukol bè solu ye, yó se mò gónó le temngón du yóm kbong nawahu kuy.

Sulat Pol Ebè Yó Kem Tau Hemtahu Bè Rom 15:27

Tey kehligal le du snéen nim nmò le ni. Bè ktahuhen, bong knóón se yóm nmò le yó mò balà le yó kem Ju bè yóm deng kgomong le hemtahu bè Dwata. Bong knóón se ke wen kul blay yó kem tau là Ju le lemwót bè yóm kul gónó wen.

Kem Lingón 68:18

Bè yóm kegdekem ta bè yóm bulul geta yó, Dwata, tey kem tau negef nalakem mung kóm. Wen tey basa slong le kóm yó kem tau, balù yó kem tau deng matù kóm, sana kwen kul basa kóm. Duhen ni, deng nô lem blóng tekuy bè ni yóm sana kut Dwata hol gónó mogot.

Ifisus 4:8

Lómón yóm tehe monen bè Sulat Dwata, yóm monen, “Bè yóm tehe khawayen etta bè yóm gónón hol geta, gotu nwiten yó kem tey tau wen negefen. Ne bè yó kem kun tau, wen kenhulung blayen kul.”

Glasya 5:13

Bélê ye kuy, kem dumuhu setwoli, deng tnaba Dwata yu ebéléen anì là bud ye ghesek du ne yó kem hlau Musis. Okóm baluen ke là bud ye ghesek du, hol bê ye abay tódô nmung yóm sidek knóyô lówó ye. Yó dé tles nmò ye, tnóbóng ye kem dumu ye lemwót bè kesbong ye nawa.

2 Kurin 10:5

Dalang se yó kem tau hegmón hemkéng ke Dwata, gbek me malà kul anì laen dù gmò le. Bè yóm kbalà me kul yó, botong tenles le kehedem le, ne baling le tau mimón ke Krays.

Kun Snulat Luk 12:45

Là, ke yó mefet bè nawahen yóm tau mò nmò yó, ke mom monen, ‘A, léét he ni kkólen yóm gónóhu mogot.’ Ne nbuten mfes yó kem dumuhen mò nmò, kem logi ne kem libun. Ne fen hebsow mken ne hlengel minum se kun.

Isaya 31:8

Angat meglà bè gida yóm benwu Asirya hohon ye, okóm là lemwóten bè kgis tau. Angat le gotu mlóy gu bè gida yó kem sendalù Asirya. Ne yó kem lomi lemnok bélê le angat le gotu baling hesek.

Isaya 45:14

Yó udél Dwata ebè yó kem tau Israél, monen, “Angat blayu kuy yó kem kendengen yó kem tau Idyip ne yó kem tau Sudan. Tódô le baling hesek bélê ye yó kem tau lembang tahà bè benwu Siba. Tódô le huli kuy, igò le kendina. Ne mtud le bukol bè solu ye, yó mon le, ‘Tahu Dwata yóm nô bélê ye, laen kô dù dumu dwata, són du.

Isaya 49:22

Yó udélen ebè yó kem tauhen yóm Dwata hol dandónen geta gónó le mogot, monen, “Olohu kmobil yó kem dumu benwu anì tódô nwit le lu mulék elem blóng ye yó kem ngà ye.

Isaya 49:25

Yó bud udél Dwata, monen, “Okóm yó se angat dou nmò. Angat lenwau lem hólól yó kem sendalù yó kem knukub le. Gotu nwahu yó kem kimu deng negef yóm tau hol geta alì lóbô. Gotu senfatayu yó kem tau semfatay kuy ne lenwau yó kem ngà ye.

Isaya 54:3

Bud lebétem du yóm gu hilol kililen. Bud tódô nwa yó kem tauhem yóm kul tonok deng nô lem hólól yó kem tólóng tau. Yó kem syudad deng tehe tnagak le, tódô bud henok tau.

Juwél 3:8

Angat bud hbaluu yó kem ngà ye logi ne yó kem ngà ye libun ebè tu kem tau bè Juda anì bud senswa le lu etu bè kem tau bè Arabya yóm benwu alì mayuk. Ou se Dwata nim mudél ni.”

Ubadaya 1:17

“Okóm yóm Bulul Sayun angat baling benwu gónó le e mlo yó kem tau Israél deng gewà ne angat baling benwu laen kô du belenen. Angat le gotu bud semfulék yó kem dù tau Israél na le e bud nwa yó kem tehe kul nfun.

Sikaraya 2:9

Ngem, deng tayalu eta le yóm dou henmù mò tmafak kul ne yó kem kimu le angat negef yó kem hesek le. Ke deng dohò yóm ni, yó he ketngón ye du deng duhen yóm Dwata laen dù là gbeken du, yóm deng hógów do.”

Isaya 60:4

Ó Jirusalim, temngeli gu hilol dé anì tonem yóm kul nmò yó kem tauhem. Gotu le stifun anì bud le mulék ebéléem. Yó kem ngaem logi, angat le mulék ebéléem lemwót gu bè yó kem tey benwu mayuk. Ne yó kem ngaem libun, lómón ke ngà lemnek kwit le kul bè yóm kulék le.

Sikaraya 2:13

Yóm kkól Dwata bè ni gu bè yóm kun gónó nô hol mólós, hol bê le abay hebnes bè soluhen yóm kdéen tau.”