Isaya 12:5 - Udél Dwata: Gna Kesfasad ne Lomi Kesfasad

⁵ Lemingón ye ebè Dwata lemwót bè yóm deng tey gendengen bélê ye. Hol heglalag ye bè klamangen benwu yóm tulón yó.

Isaya 12:5 Referans Kwoze

Kem Lingón 98:1

Semngal tekuy ebè Dwata yóm lomi sngal, yakà deng nmoen du yó kem tey hentaw ton. Mlan bè kfasangen ne kólósen yóm kgemoen bè yó kem hohonen.

Kehewà 15:1

Omin le lemingón ebè yóm sana kul Dwata hol gónó mogot le Musis ne yó kem tau Israél. Yó lingón le, “Lemingóne ebè Dwata lemwót bè yóm tey deng kegmoen bè yó kem hohon tekuy. Tudaen elem mohin yó kem kudà le mung du yó kem tau smakay kul.

Hbakuk 2:14

Okóm angat wen kdawen tódô kdéen tau talak tonok angat gotu temngón du yóm tey kun keklóón Dwata. Yóm ketngón le du yó, tódô lenngeben klamangen tonok lómón mohin, tódô lengeb él.

Isaya 40:9

Ó kem tau bè Jirusalim, mneged ye eta yó kem bulul, heglalag ye bè yó yóm tulón hyu. Yu kem tau bè Sayun, hol hgel ye dé yóm udél ye, heglalag ye yóm tulón hyu. Hol tulón ye, bê ye abay hlikò. Tulón ye bè tu kem benwu lemnek bè Juda, móyónen kól ne yóm Dwata le.

Kehewà 15:21

Omin Miryam lemingón bélê le, yó lingónen, “Lemingón tekuy ebè Dwata lemwót bè yóm tey deng kegmoen bè yó kem hohon tekuy. Tudaen elem él yó kem kudà le, mung du yó kem tau smakay kul.”

Deng Hegfan 15:3

Ne gotu le semngal. Sngal le yóm tehe kun sngal Musis, yóm sotu tóbóng lówó Dwata ekni. Bud yó snéen kun sngal yóm Ngà Ubiha. Yó sngal le, monen, “Ó Dwata, yóm gónó mogot bè klamangen, laen dù là gbekem du, ne tey kehtaw me du yóm gel nmoem. Uu se yóm hol geta mogot yóm klamangen, ne sal hyu yóm gel nmoem, hono tedeng.

Kem Lingón 105:2

Hol gel sngal tekuy yóm sngal dmóyón ke Dwata. Hol tulón tekuy bè kdéen tau yó kem tey kdê hentaw ton gel nmoen.

Kem Lingón 72:19

Hol bê tekuy lensón yóm kdóyón tekuy du, abay se tey minggel boluyen. Yake gfan bè klamangen benwu yóm tey klinggelen. Dwata he hol dmohò du nim ni!

Isaya 42:10

Semngal tekuy ebè Dwata dé yóm sngal lomi. Kdéen tau bè klamangen benwu, hol sngal tekuy yóm gónón megdóyón. Yu kem tau gel mit kafal, hol dóyón ye Dwata. Dalang se yó kem mowil lem mohin, gbót dóyón ye Dwata. Ne yó kem benwu mayuk, hol ye semngal ne kdéen tau menwu bélê ye.

Isaya 42:11

Yóm benwu laen hol wen tauhen, dalang se yó kem benwu lemnek nô lemen, hol dóyón ye Dwata. Hol dóyón ye Dwata, yu kem tau nô bè Kidar. Dalang se yó kem tau nô bè syudad Sila, hol ye hligal mensag gu ta yó kem bulul.

Isaya 44:23

Hol ye hligal mensag dé, yu kem longit seglafin. Ne yó kem tonok seglafin etlaan, mensag ye. Dalang se kuy kem bulul ne kdê yó kem koyu dlag, hol ye hligal mensag. Deng hegfan Dwata yóm kegetahen bè kehewaen yó kem kun tau Israél.

Malakay 1:11

“Okóm yó kem tólóng tau bè dumu benwu, tódô lenwóten bè yó kem benwu fi dmata kdaw kól bè yó kem benwu fi desdef, tey kadat le du yóm dou boluy. Tódô keten benwu wen gel hboo le ebéléu yóm alì tilob boohen ne dsù le ebéléu yóm dsù alì knóón béléu,” udél yóm Dwata laen dù là gbeken du.