Isaya 10:13 - Udél Dwata: Gna Kesfasad ne Lomi Kesfasad

¹³ Yó bud udélen heklabak yóm tau hol geta bè yóm benwu Asirya, monen, “Tek són ou se mò du yóm kdéen ni. Teye kemgis yóm ou ne teye temngón ne teye hulung mò atul. Deng gotu gwahu ne yó kem dumu benwu, laen kô dù bud mdengen blóng le ne deng gotu dou kdéen. Deng gotu gwahu yó kem deng tô sentifun le mò lowil le. Lómón ke ou yóm safì tudu deng gotu ndau lu laan yó kem tau menwu bè yó.

Isaya 10:13 Referans Kwoze

Danyél 4:30

Yóm igoen temngel eta yóm syudaden, yó udélen, monen, “Ngem dé nim tey syudad Babilun ni, ke là se lemwóten bè yóm tey kegbeku, là kóen na a mdà mò gónóhu nô ne mò gónóhu hegfan yóm tey kegetahu.”

Dwata 8:17

Yó gónóm mon, hol bê ye abay hendem ke deng lemwót bè kfasang ye ne bè kgis ye yóm kwen kendengen ye.

Hbakuk 1:16

Omin le yó tmaba dwata bè yó kem huket le ne mtem le insinsu bélê le, yakà mon le du lemwót bè huket le kun yóm kwen kendengen le ne ktilob yóm gel ken le.

Amus 6:13

Tey kehligal ye bè yóm kled ye yóm benwu Lo-dibar. Yó udél ye heklabak, mon ye, “Balù Karnaim, botong gled me lemwót bè yóm tey kekgis me.”

Amus 5:27

Yó gónóm mon, angat hegefu yu mayuk etu bè benwu sentu Damaskus,” mon Dwata. Yó kun boluy, Dwata laen dù là gbeken du.

Isaya 10:8

Yó udélen heklabak, monen, “Ket tau malak yó kem sendaluu, tey kfasang le lómón ke tau le geta.

2 Bok Kem Tau Hol Geta 18:32

efet nwitu yu mayuk ebè yóm benwu angat gónó ye henek nô, benwu hol skél bè nim kuy benwu ni, benwu alì hmalay ne tmifas, alì wen mambangen ne grépen, benwu wen koyu uliben, ne wen tneben, benwu gónó ye mowil. Hol bê ye abay hnungol yóm ksukat Hisikaya kuy ke monen, ‘Angat lenwà Dwata tekuy.’

2 Bok Kem Tau Hol Geta 18:15

Gotu blay Hisikaya du yóm kdê blówón bukay bè Gónô Dwata ne yó kem blówón bukay nô bè yóm gónó le gel hemyu kimu legen bè gónô bongen.

2 Bok Kem Tau Hol Geta 18:11

Negef yóm tau hol geta bè Asirya yó kem tau Israél etu bè Asirya, suen lu bè yóm syudad boluyen Hala bè kilil Él Habor bè Gusan, ne wen se suen bè yó kem syudad bè Midya.

2 Bok Kem Tau Hol Geta 17:24

Yó nmò yóm tau hol geta bè Asirya, nwiten yó kem tau bè Babilun ne kem tau bè Kuta ne kem tau bè Hamat ne bè Sifarbim, suen lu bè Samarya ta yóm tonok yó kem tau Israél. Tódô nfun le yóm benwu Samarya, ne nô le bè yó kem syudad bè yó.

2 Bok Kem Tau Hol Geta 17:6

Bè yóm gesyómen halay mogot benwu Husiya, gled yóm tau hol geta bè Asirya yóm syudad Samarya, ne gotu negefen etu bè Asirya yó kem tau Israél. Suen lu bè Hala, moni bè kilil Él Habor bè Gusan. Lemwót yó kem dumu, suen lu lem blóng yó kem tau bè syudad Midya.

Hbakuk 2:6

Okóm angat kól yóm kdawen tey sidek udél le ebélê le yó kem tau tehe negef le yó, mon le mò kul, ‘Hatay ye kuy kem tau ma yóm sundu kul du. Hatay ye kuy kem tau wen kendengen ye lemwót bè kgaga ye yó kem tau mutóng bélê ye. Kegenen de tendo bud kmò ye du yóm yó?’

Kmukum 7:2

Yó mon Dwata mò ke Gidyun, yóm sana kul Dwata hol gónó mogot, “Tey alì gedlug kwen le yó kem tauhem mò mit sgida bè yó kem tau Midyan. Ke hlusu lu sgida yóm kdê le ne ke deng hegmou lu déke mom le heklabak, ofo kul ke lemwót bè kul kgis yóm kegmò le.

Kem Udél Hlalak Tehe Selumun 28:11

Yóm tau wen kendengenen bè kun kehedem du deng hulung hedem ne kun, okóm yóm tau élél hulung temnef yóm kmò tau ne dilóen yóm ktahuhen bè yóm tau wen kendengenen yó.

Danyél 4:27

Ó Nibukadnisar, ke yó dum hyu béléem, hol hnungolem ou. Hol tenflokem ne yóm kmoem sidek, tlesem du yóm nmò hyu. Knogolem ne yó kem salà gel nmoem, tlesem du yóm koduhem yó kem tau élél. Ke yó nmoem, déke hlós yóm kehyu klowilem.”

Hbakuk 1:11

Ke deng gotu genbà le yóm sotu benwu, omin le tódô miwes lómón kbel lenos són ktonem kul. Okóm hono kem tau mò sidek, nmò le dwata le yóm kgis le.”