Isaya 1:23 - Udél Dwata: Gna Kesfasad ne Lomi Kesfasad

²³ Yó kem tau malak kóm hono tau kmogol ke Dwata, swè le bè yó kem tau mnagaw. Sal gel henmóyô le yóm filak gel blay le kul mò wa nawa le dalang se yó kem dumu gel blay le kul. Ke wen senkukum le, là kô nfi le kul yó kem ngà hikit ne là kô hnungol le du ke wen klamo yó kem libun bolu.

Isaya 1:23 Referans Kwoze

Sikaraya 7:10

Bê ye abay hen-gnok yó kem libun bolu ne yó kem ngà hikit, dalang se yó kem tau milo elem blóng ye ne yó kem tau élél. Hol bê ye abay mò atul sidek ebè kem dumu ye.

Kun Snulat Luk 19:46

Ne monen mò kul, “Igò Dwata deng mon du bè Sulaten, ‘Yó muhen yóm dou Gónô mò gónó le gel mni ebéléu yó kem tau.’ Okóm kuy,” mon Jisas, “deng mom henbaling ye gónó le gel nô yó kem tau gel mnagaw.”

Malakay 3:5

Yó udél yóm Dwata laen dù là gbeken du, monen, “Angate sut elem blóng ye naw e knukum yu. Ne henmung tenksiu yó kem tau demwata ne yó kem tau mdà yehen ne yó kem tau tmifù kéng ne yó kem tau là tedeng ksukéy le yó kem tau mò nmò bélê le, ne yó kem tau hen-gnok le yó kem libun bolu ne yó kem ngà hikit ne yó kem tólóng tau menwu lem blóng ye. Tenksiu yó kem tau mò du yóm yó abay se hono tau laen dù klikò le dou,” udél yóm Dwata laen dù là gbeken du.

Mark 11:17

Ne wen toloken yó kem tau bè yó, monen, “Igò Dwata deng mon du bè Sulaten, ‘Yó muhen yóm dou Gónô mò gónó le gel mni ebéléu yó kem tau bè klamangen benwu.’ Okóm kuy,” mon Jisas, “deng mom nmò ye gónó le nô yó kem tau gel mnagaw.”

Matyu 21:13

Mon Jisas mò kul, “Igò Dwata deng mon du bè Sulaten, ‘Yó muhen yóm dou Gónô mò gónó le gel mni ebéléu yó kem tau.’ Okóm,” mon Jisas, “deng mom henbaling ye gónó le nô yó kem tau gel mnagaw.”

Mika 3:11

Yu kem tau gel malak, là kô ye kmukum ke là wen mò wa nawa ye. Yu kem tau gel blóng ebè Dwata, là kô ye tmolok udél Dwata ke là wen bayad le kuy. Yu kem tugod Dwata, laen dù tulón ye ke là bnayad le kuy, igò ye sem gel mon du són bè Dwata yóm gónó ye smalig. Gel mon ye, “Kaem nô bélê tekuy Dwata. Laen dù sidek sut bélê tekuy.”

Husiya 4:18

Yó gel nmò yó kem tau Israél, ke deng gotu deng kinum le, timu óyô le mebel libun mò snamuk le. Mom nóyô le yóm gónó le myak senta ke nadat tau lu.

Jirimaya 22:17

“Okóm kóm Jihuyakim, teyi seglom, geli tmulón kéng. Gel hnatayem yóm tau laen dù salaen ne gel hen-gnokem yó kem tau élél ne tey sidek kwitem kul yó kem tauhem.”

Isaya 33:15

Song gónó ye mowil kuy bè yóm ofi yó ke tedeng yóm gel kebkó ye ne ke tedeng yóm gel nmò ye. Béem nwit yóm kwen boluy ye mò smukat yó kem tau élél. Hol bê ye henmóyô ke wen tô blay le kuy mò wa nawa le. Hol bê ye abay mung bè yó kem tau matul monok, duhen ke wen dumu sidek natul le.

Kem Udél Hlalak Tehe Selumun 29:24

Yóm tau momung ne lemimeng yóm tau mnagaw igoen temngón du megtuled du, hensideken knóen.

Kem Udél Hlalak Tehe Selumun 17:23

Yóm tau gel mò sidek gel henmóyóen yóm kimu lifut blay le du anì nfihen yóm là tedengen.

2 Tutul Israél 36:14

Lelen yó he, lemwót yó kem geta bè yó kem gel blóng ebè Dwata dalang se yó kem tau, là kô le bud hteneb lemolò ke Dwata yóm kdê le. Deng mom lolò le yó kem sidek alì kenbê gel nmò yó kem tau hmilol kul bè yóm klolò le yóm kul dwata. Bè yóm kmò le du yóm yó, deng mom nmò le yóm là mólósen lem yóm Gónô Dwata bè Jirusalim yóm Gónô deng tehe hfólós Dwata mò kun.

Kun Snulat Luk 24:27

Ne gotu hetngón Jisas kul yóm gónón e temnef yóm tehe gel hsulat Dwata ekni gbak ebéléen, kewóten bè yóm tehe snulat Musis efet kól bè yóm kul snulat yó kem dumu tau tugod Dwata ekni.

Sulat Jim 1:27

Yóm tahu kehtahu hol kun henmóyô Dwata, yóm Mà tekuy, duhen yóm hol któbóng yó kem ngà hikit ne yó kem libun bolu bè yóm gónó le glayam. Ne ke gel tensuhen yó kem sidek gel nmò tau lem benwu.

Isaya 1:22

O Jirusalim, hol lómón ke tehehi blówón bukay. Okóm ni, laen dù bud muhem. Tehehi mkél bè yóm ninum alì mnóm. Okóm ni, lómón ke dengi baling ninum nbol él.

Isaya 30:1

Ni se deng udél Dwata, monen, “Deng le gotu golu elem hatay ne yó kem tau malak bè Juda lemwót bè yóm kkogol le do. Tódô lolò le yóm atul là lemwóten béléu. Sundu dou kóyô du yóm gel senkotuk le bè dumu benwu. Lemwót bè yóm nmò le yó tendo temnù yóm salà deng gel nmò le.

Isaya 65:2

Nbuten bè kbuten, denge gel eles htifes hemmóyô yó kem dou tau, okóm tey mgel kulu le, són nmò le yóm là tedengen, són lolò le yóm kul knóyô.

Jirimaya 32:32

Yó alì hebut dou yó kem salà yó kem tau bè Juda ne bè Israél dalang se yó kem tau bè Jirusalim, salà yó kem tau hol geta bélê le ne yó kem genlal le ne yó kem tau gel blóng ebéléu ne yó kem tugodu.

Husiya 5:10

Yó kem tau malak bè Juda, hol le mkél bè yó kem tau gel mili yóm ilô bè blóng tonok. Yó gónóm mon, koku eta le yóm lebutu kul lómón ksut yóm tey dunuk.

Amus 5:12

Abay se deng gotu tngónu yóm alì kwen yó kem salà ye ne gotu tngónu yó kem dumu sidek gel nmò ye. Gel hen-gnok ye yó kem tau tedeng kmò le, lel ye gel ma mò wa nawa ye ne gel henseng ye bè kukum yóm kul ktahu yó kem tau élél.

Mika 3:9

Ó kem tau malak bè Israél, ni mò hol hnungol ye. Deng mom kenbê ye yóm kukum tedeng ne henbaling ye sigol yóm tedeng.

Lista 22:7

Tahu se, yó kem genlal bè yó kem tau Muab ne yó kem genlal bè yó kem tau Midyan lemwót le etu bè Balaam. Hyu wen nwit le mò bayad le du ke henmulaen yó kem tau Israél. Bè yóm kkól le ditu, tulón le ke Balaam yóm tinok Balak.

1 Samwél 8:3

Okóm ni kem ngaen ni, là kô lolò le du yóm kun kmò kkukum mà le. Són hendem le ke gmuta le filak. Gel nwa le ke wen blay le kul mò wa nawa le ne là tedeng kkukum le.

Isaya 1:17

ne hol dnalang ye mò du yóm hyu. Hotu ye gel ye mit du yóm kukum tedeng. Tnóbóng ye yó kem tau gel ndà le elaan. Ne nfi ye yó kem ngà hikit anì guta le yóm kul ólól. Senged se yó kem libun bolu, hol nfi ye lu.”

Isaya 1:18

Bud mon Dwata, “Hendeng tekuy ne yóm sentulón tekuy. Deng tódô hitem ktonu kuy lemwót bè yó kem salà ye, okóm angat nolobu yu anì baling ye hol mólós. Anien he ke lómón khitemen using kuleng yóm salà ye, bè yóm kolobu kuy hol lómón kbukay ye yóm snu.

Isaya 28:14

Yu kem tau heklabak malak yó kem tau bè ni bè Jirusalim, hol hnungol ye yóm udél Dwata ebélê ye.