Isaya 1:21 - Udél Dwata: Gna Kesfasad ne Lomi Kesfasad

²¹ Tehe yu ekni tey le teneb lemolò ke Dwata yó kem tau menwu bè Jirusalim. Okóm là ne ni, deng tey dê dwata kéng lolò le, hol le mkél bè yóm libun hdóyón. Yó kem tau tehe menwu bè yó hono kem tau tedeng knawa le. Okóm ni, són tau monok tebel du.

Isaya 1:21 Referans Kwoze

Deng Hegfan 11:8

Ne yóm lówó le, tódô tebelen bè yóm lan bong bè syudad Jirusalim. Yó se yóm syudad gónó le tehe tmutuk bè kros yóm gónó le mogot. Wen gel boluy le du yóm syudad yó, duhen Sodom ne Idyip. Yóm boluy yó, wen hnigaden.

Deng Hegfan 11:2

Okóm béem homong bentes yóm gu hilolen, abay se deng tódô gbayà bè yó kem tau là Ju le. Ne bè yó bè Jirusalim, yóm kun syudad Dwata, tlu halay sóól kegen le angat mò gida.

Hibru 12:22

Okóm bélê tekuy, tey tólóng yóm kehloni tekuy ebè Dwata nim kmoen ni. Laen dù bang gónó tekuy likò. Lómón ke deng tekuy hloni ebè yóm bulul Sayun, ne yóm hol benwu bong gónóhen nô Dwata, yóm Dwata laen dù tul katayen. Yóm benwu yó, yó se yóm Jirusalim bè longit, gónóhen hol nô yó kem hilu libu hógów Dwata.

Kul Nmò 7:52

Tulón ye do kun,” mon Stéfén, “ke wen sotu tehe tugod Dwata là deng tehe hensidek kem tehe fù tekuy du ekni. Sal tehe gel hnatay le yó kem tau hógów Dwata, yó kem tau tehe gel tmulón yóm angat ksut yóm tau tedeng hógów Dwata. Ne deng sut se yóm hógów Dwata yó, duhen tu sem le eted ye elem tdok yó kem tau mogot kukum. Yu se yóm fen le hbonok du.

Kun Snulat Luk 13:34

Yu kem tau menwu bè Jirusalim, sal gel hnatay ye yó kem tau tugod Dwata, ne gel hnatay sentudà ye botu yó kem gel hógów Dwata ebélê ye. Deng hilu duléku ne tô móyô sembung kuy, lómón tô kmou kuy, lómón yóm mlon gel kenleken elaan hafaken yó kem ngaen, okóm là kô ye dog móyô.

Sikaraya 8:3

Ne ni bud udél Dwata, monen, Angate semfulék ebè Bulul Sayun, angate nô bè Jirusalim. Ominen yó angat taba le yóm Jirusalim, Syudad Teneb. Ne yó angat taba le yóm kun bulul yóm Dwata laen dù là gbeken du, Bulul Dwata.

Husiya 11:12

Yó udél Dwata, monen, “Deng le tódô gotu slibut do yó kem tau Israél gel mò kéng béléu ne gel smukat do. Ne yó kem tau bè Juda tolo lel le he matù do, yóm Dwata alì mólós ne teneb bélê le.” Là gomongen bè nili yóm tsaptér 12. Yó tulónen bè yóm tsaptér ni yóm bud kbólów. Yóm heftulón Husiya bè nawa le yóm tehe nmò yóm tehe fù le Jakub ekni, hulung smukat se kun. Okóm yóm Jakub, kóyóen ke hol tngónen Dwata ne ke nuyag Dwata. Yó nmoen, heglaan bè Dwata ne hotuhen nawahen mimón du. Kóyô Husiya bè yó kem tau Israél ke hol lolò le yóm tehe nmò yóm tehe fù le Jakub, yóm keheglaanen knóen bè Dwata ne yóm khotuhen nawahen mimón du. Dwata malak ne kemlung yó kem tau Israel efet kól bè kdê lugod le, bede yó balà le du yóm là kimón ne kegsalà ne yóm katù le du.

Isaya 5:7

Yó kem tau Israél lómón ke tonok gónó Dwata mò hulu, yóm Dwata laen dù là gbeken du. Ne yó kem tau semfu gu bè tehe Juda lómón ke lu yóm grép huluhen. Yó hendónen bélê le ke hyu nmò le okóm là. Mom yó nmò le deng le mom monok. Hendónen bélê le ke tedeng yóm kwit le kukum okóm là. Deng mom yó gungolen taba yó kem tau là tedeng kwit le kul. Là gomongen bè nili yóm bérs 8 kól bè 30. Lem ni kem bérs ni yó tulón Isaya yóm khilu dulék Dwata mon du, “Là megewu nawan gemlà kul.” Deng gotu listahen salà yó kem tau. Bérs 8-10 Yóm udélen ebè yó kem tau tendo hlamang tonok anì laen dù gónó le nô kem dumu. Bérs 11-17 Udélen ebè yó kem tau alì móyô mken ne minum okóm balù udì ke hendem le yó kem nmò Dwata. Bérs 18-19 Udélen ebè yó kem gel mò kéng ne hemlò ke Dwata yóm gel mon du, “Géhél htonem kum kun ke wen gbekem. Móyô me mton du ke wen atulem.” Bérs 20 Udélen ebè yó kem tau mon du, “sidek yóm hyu ne hyu yóm sidek.” Bérs 21 Udélen ebè yó kem tau hemdem du, tey le temngón. Bérs 22-23 Udélen ebè yó kem tau gel ma mò wa nawa, fen hewà le yó kem tau wen salaen ne fen tnafak le yó kem tau laen dù salà le. Lemwót bè yóm kdê salà le ni, gotu htaba Dwata yó kem dumu benwu mò na a gembà yóm benwuhen ne yó kem tauhen.

Kem Lingón 48:8

Deng gel gungol me se ktiloben yóm syudad yó, okóm ni deng tódô kum mata se mton du, yóm kun syudad yóm Dwata laen dù là gbeken du. Kun syudad yóm Dwata tekuy. Laen dù tul sónen yóm klaen dù hemenen yóm syudad yó.

Kem Lingón 48:1

Tey geta yóm Dwata, knóón hol sendóyón bè yóm kun syudad yóm Dwata tekuy ta yóm kun bulul.

Kem Lingón 46:4

Ditu bè syudad Dwata, wen él mlel lemen, gel mit kligal lem yóm kun benwu. Bè yó se gónón nô yóm kun Gónô Dwata yóm Dwata hol dandónen geta bè kdéen.

2 Tutul Israél 19:9

Yó hol hloloen kul, monen, “Ni se mò hol nmò ye. Bè yóm gel kkukum ye, hol knikò ye Dwata, ne hol nimón ye bè kdê yó kem gel nmò ye.

Deng Hegfan 17:1

Ominen mógów ebéléu yóm sotu hógów Dwata tehe mogot tukung, monen mò do, “Mungi do, toloku kóm yóm kmò ktafak Dwata du yóm libun hdóyón alì tótól, duhen yóm tey syudad bong deng tehe hdà le moni bè yó kem tey dê él mlel.

Isaya 1:22

O Jirusalim, hol lómón ke tehehi blówón bukay. Okóm ni, laen dù bud muhem. Tehehi mkél bè yóm ninum alì mnóm. Okóm ni, lómón ke dengi baling ninum nbol él.

Isaya 59:3

Tau ye mò kéng se kuy, gel ye hemsidek kem dumu tau ne tau ye monok.

Isaya 59:14

Mom henseng me yóm kukum tedeng. Là kóen gehloni ebélê me yóm tedeng. Là bud gungolem du bè yó kem tau gel bemtad lem fedyan ne yóm ktahuhen. Laen kô bud tonem bè yó yóm tau laen dù kéngen.

Isaya 59:15

Laen kô bud tonem ke wen tau lemolò du yóm ktahuhen. Ke tói hlayuk bè yó kem sidek, mom henayam le uu yó kem tau gel mò sidek.” Deng gotu ton Dwata yó kem sidek deng nmò le yó ne tey sidek kegnómen du abay se là tedengen yóm kukum nwit le.

Husiya 2:5

Abay se yóm yê le, libun hdóyón deng tódô mlutut hkawang, laen kô dog yaken. Yó tehe gel monen, ‘Mebele kem logi hemdóyón do, hbaluu knóu bélê le mò lanu bè kkenu ne bè kinumu, ne bè knesu yó kem nes mfól ne nes bukay mebtes ne mò lanu bè hnolo ulib.’

Hbakuk 1:4

Là buden mget yóm udin me ne laen dù bud muhen. Là bud tonem du ne yóm kukum tedeng. Laen dù bud gmò yó kem tau mit du yóm tedeng, bà mon yóm tey kekgis yó kem tau mò sidek. Yó gónóm mon, là tedengen yóm kkukum le.

Isaya 26:10

Balù yóm tey kganag nawahem bè yó kem tau sidek nmò le, ewenem là kô na le e dnalang du yóm tedeng. Balù bè yóm benwu yó kem tau tedeng nmò le, sana kmò le sidek. Là kô le móyô kemmón du yóm kegetahem.