Isaya 1:18 - Udél Dwata: Gna Kesfasad ne Lomi Kesfasad

¹⁸ Bud mon Dwata, “Hendeng tekuy ne yóm sentulón tekuy. Deng tódô hitem ktonu kuy lemwót bè yó kem salà ye, okóm angat nolobu yu anì baling ye hol mólós. Anien he ke lómón khitemen using kuleng yóm salà ye, bè yóm kolobu kuy hol lómón kbukay ye yóm snu.

Isaya 1:18 Referans Kwoze

Isaya 44:22

Yóm kkóhu du bélê ye yó kem salà ye hol lómón ke muku lobun kmou du. Bud ye semfulék ebéléu dé, ou se yóm lemwà kuy.

Deng Hegfan 7:14

Monu se, “Là, Sér, là kô tngónu du. Tulónem dou dé.” Ne monen se mò dou, “Lu se yó kem tau deng mlan lemen yóm tey hlayam bong te tonok, okóm là kô gtebel le du yóm klolò le ke Jisas. Deng nolob le ne yóm nes le bè kun litô yóm Ngà Ubiha, ne deng baling bukay ne.

Kem Lingón 51:7

Hol kóhem dou salau anì balinge mólós. Hol denyohem ou anì laen dù bud usingu, balù udì.

Sulat Pol Ebè Yó Kem Tau Hemtahu Bè Rom 5:20

Bè yóm tehe kehsulat Dwata du ke Musis yóm hlauhen, yó muhen mò fen hdilô du bè kem tau yóm salà le. Balù tennga kbongen yóm salà kem tau, mom milud he kbongen yóm kun tóbóng Dwata.

Kul Nmò 18:4

Tódô ket bè yóm Kdaw Kehegnô, gel mógów Pol ebè yóm gónó le gel stifun yó kem Ju, lelen gel mit kul stulón. Tô gel hdilóen yó kem Ju ne yó kem Grik bè yó yóm ktahu yóm gel tulónen.

1 Samwél 12:7

Ne ni, tódô ye henek mdà bè ni bè solu Dwata yóm igou heftulón du bè nawa ye yóm kdê deng gendeng Dwata bélê ye dalang se bè yó kem tehe fù ye ekni.

Kul Nmò 17:2

Sok gel kól bè yóm Kdaw Kehegnô, tódô gel mung bélê le Pol, lómón yóm sana kun gel adat. Tlu fedyanen tendo mung kul, ne gel stulón bélê le. Wen gel tulónen kul lemwót bè yóm Udél Dwata.

Jirimaya 2:5

Yó udélen ebélê ye, “Salà du de yóm tehe ton le béléu yó kem tehe fù ye? Tedu se ton le mò gónó le hlayuk béléu? Deng le mom tmaba ebè yó kem dwata lenbù nmò laen dù muhen. Ne yó uléken baling le tau laen dù mu se kul.

Kul Nmò 24:25

Bè yóm igò Pol mudél, wen gtóngen bè yóm kebtol nawa, ne bè yóm khulung mafas nawa, ne yóm angat kehdà Dwata kdéen tau bè soluhen. Botong likò Filik bè yóm kungolen du, tódô tenfloken kudél Pol, monen, “Nan geblà yó he. Tódô bud tinoku uu he ke wen urasu.”

Mika 6:2

Ne yu kem bulul ne begel tonok lemwót bè hol kbuten ne laen kô dù tul sónen, hnungol ye yóm tifù Dwata yó kem tauhen. Wen tey tifù Dwata kul yó kem kun tau Israél.

Isaya 50:8

abay se tey moni béléu Dwata, ne angat hdilóen yóm là ktahuhen yóm duón le do. Wen kô tau tô kmamo do? Slomong kuy mógów bè kukum sen anì tulónen bè yó yóm duónen kmamo do.

Isaya 55:7

Yó kem tau gel mò sidek, yake hol tnagak le ne yó kem sidek gel nmò le, yake hol tenles le ne kmò kehedem le. Yake hol le semfulék ebè Dwata yóm Dwata hol gónó mogot. Tey knoduhen kem tau ne mahil béléen hmifót salà.

Isikél 18:27

Ne sotuhen, ke tenflok yóm tau yóm kmoen sidek ne ke nimónen yó kem dou hlau ne ke nmoen yóm tedeng ne yóm hyu, angat gewà lem hatay yóm tau yó.

Isikél 33:16

Là bud snolou du béléen ne yó kem sidek deng gel nmoen, yakà deng tendo nmoen du yóm tedeng ne yóm hyu ne yó se gónón angat mowil.

Kem Lingón 51:9

Béem bud snolò ne yó kem salau. Gotu kóhem yóm kdéen sidek tonem béléu.

Isaya 1:23

Yó kem tau malak kóm hono tau kmogol ke Dwata, swè le bè yó kem tau mnagaw. Sal gel henmóyô le yóm filak gel blay le kul mò wa nawa le dalang se yó kem dumu gel blay le kul. Ke wen senkukum le, là kô nfi le kul yó kem ngà hikit ne là kô hnungol le du ke wen klamo yó kem libun bolu.