Ifisus 5:5 - Udél Dwata: Gna Kesfasad ne Lomi Kesfasad

⁵ Ni mò hol hendem ye. Yóm tau gel mò samuk ne yóm tau gel hemyak knô, là kóen gomong bè yó kem tau nogot Krays ne Dwata. Senged se yóm tau seglom, abay se yóm gel sen-glomen, yó se henged dwatahen.

Ifisus 5:5 Referans Kwoze

Glasya 5:21

Yó mò kul, gel le mófô. Ne tey gel kehlengel le, segdófón honohen lu. Bong dê he dumuhen gel nmò le lómón ni kem ni. Bud nulitu bélê ye yóm deng tehe eles tulónu kuy. Yó kem tau gel mò du ni kem ni, là kô le na a gmung bè yóm tau nogot Dwata.

Deng Hegfan 22:15

Okóm là kô le gusek bè yó kul yó kem tau ssamuk honon lu, yó kem tau alì smalig bè imò, yó kem tau smamuk, yó kem tau monok, ne yó kem tau hemtahu bè dwata kéng, ne yó kem tau gel mò kéng, mlan bè udél le ne mlan bè nmò le.

Kulasi 3:5

Yó gónóm mon, gotu kó ye ne yóm kdéen sidek knóyô lówó ye. Béen abay wen bélê ye mò samuk, ne yó kem dumu nmò gónó hemyak knô. Hol kenbê ye yóm knawa mò du yó kem yó. Kó ye snéen yóm nawa seglom, abay se yóm gel sen-glom ye yó, deng duhen yó se dwata ye.

Ifisus 5:3

Lemwót bè yóm deng kbaling ye kun tau Dwata, là kóen hyu ke mò ye samuk, duhen ke nmò ye yó kem dumu nmò gónó hemyak knô, duhen ke seglom ye. Balù olo bè kestulón du yó kem yó, bê tekuy abay gbót du.

Deng Hegfan 21:8

Okóm yó kem tau likò lemolò do, ne yó kem tau là hemtahu le béléu, yó kem tau ssamuk honon lu, ne yó kem tau monok, ne yó kem tau mò samuk, ne yó kem tau smalig bè imò, ne yó kem tau hemtahu bè dwata kéng, ne kdéen tau mò kéng, angat le gógów elem lanaw ofi yóm kdê le, yóm ofi wen kbudahen tendo seflós dmilóf. Yóm lanaw ofi yó, yó se yóm mon le gewuhen dulék matay tau.”

Glasya 5:19

Tey dilô yó kem tau ke són yóm kul knóyô gónó le gel galak. Sal le gel mò samuk, ne là mólós kehedem le, ne dê nmò le yóm gónó le hemyak knô.

Hibru 13:4

Ke sok deng syehen yóm tau, hol nadat tekuy sen yóm kul kesyehen yó, bê abay kneyek lu. Ne ke deng wen yehen tekuy, hol bê tekuy abay ndà. Tnafak Dwata yóm tau smamuk ne yóm tau ndaen yehenen.

1 Timuti 6:10

Abay se bè yóm alì kbong nawahen yóm filak, yó se lewót gónón gemmò du yóm dê kay sidek. Bè yóm alì kusol le du kem dumu tau, deng mom gkogol le yóm deng hentahu le. Yó mò kul, deng mom sidek khuli sel le.

1 Timuti 6:17

Hol hgefetem ebè yó kem tau wen kendengen le, bê le abay hton salù, ne bê le gentud nawa yóm kendengen le, abay se là tngón le du ke gfu. Dwata dé gentud nawa le, yakà béléen du gónón lemwót yóm kdéen, ne sal gel mtungan yóm blayen tekuy mò gónó tekuy hligal.

Kehewà 20:17

Hol bê ye abay nófô gónô kedumu ye. Bê ye abay nófô yehenen duhen ke kem heseken duhen ke kem safien duhen ke kem kudaen duhen ke yó kem dumu nfunen.” Yó se yóm sfolò hlolò Dwata yó kem tauhen.

Juswa 7:21

Bè yóm tehe kegbà me yóm syudad Jiriku wen sotu tey nes tilob tonu lemwót bè Babilun. Bud wen tonu dô lewu kilu blówón bukay ne sekleng tahu blówónen, wen dô sóól kilu keblaten. Bè yóm ktonu du tey óyóu du, ne tódô nwahu. Ne ditu gónóhu lembeng du lem toldahu, hol fi laan yóm blówón bukay.”

Kul Nmò 8:21

Laen kô dù kóm du yóm kum nmò ni, abay se là tedeng kton Dwata du yóm kehedemem.

Kul Nmò 20:32

Ni ne,” monen, “tódô hogotu yu bè Dwata, du he hol semgyok kuy. Hogotu kuy yóm Udél Dwata mò gónó ye temngón du yóm tey nawahen kuy, yó se hembegel kehtahu ye. Ne bè yóm udélen yó gónó ye gmuta du yó kem tóbóng angat blay Dwata bè kdê yó kem kun tau.

Kulasi 1:13

Deng lenwà Dwata tu gu lem yóm deng nogot Seitan, ne deng nilihen tu elem yóm kun nogot yóm Ngaen hol gónóhen nô nawahen.