Ifisus 5:15 - Udél Dwata: Gna Kesfasad ne Lomi Kesfasad

¹⁵ Duhen yó, hol gel tenngel ye kmò ye. Hol dnalang ye kmò yóm tau hulung hedem. Bê ye lolò kul kmò yó kem tau là hulungen hedem.

Ifisus 5:15 Referans Kwoze

Kulasi 4:5

Hol ye hfulung mò du yóm hyu bè yó kem tau là dengen hemtahu. Eles tnana ye ke wen lan ye mò du.

Sulat Jim 3:13

Wen kô bélê ye temngón ne hulung hedem? Són sem bè khulungen mit ktauhen gónóhen gfan ke tahu duhen, ne bè yóm kehyu kmoen, mung du yóm khulungen heglaan mlan bè ketngónen.

Flipay 1:27

Ne ni se yóm hol bong muhen bélê ye ke hol seklóón ebè yóm Tulón Hyu gbak ebè Krays yóm gel kmò ye anì yó, ke sute lem blóng ye duhen ke là, laen dù dumu gungolu gu bélê ye són yóm hol kbegel yóm kehtahu ye, ne yóm hol kessotu nawa ye hol mfi du yóm deng kehtahu ye lemwót bè yóm Tulón Hyu.

1 Kurin 14:20

Bè ni kem tulónu kuy ni koni, kem dumuhu setwoli, bê ye abay heskél yóm kuy kehedem bè knawa ngà. Yó dé dnalang ye bélê le yóm là khulung le matul mò du yóm sidek. Okóm bè yóm kmò kehedem ye du nim toloku kuy ni, yake kehedem tau tmuha dé kehedem ye du.

Kem Udél Hlalak Tehe Selumun 14:8

Yóm khulung tau milô hetngón du du yóm kun kmò kekdol, okóm yóm tau book, gsukat bè ksalà kehedemen.

1 Timuti 6:9

Okóm yóm tau són hendeenen ke wen hol kendengenen, ten-geeden hebtang knóen elem sindil, hlós gholot lem yóm kdê niwolen. Wen se niwolen gutahen, balù udì ke wen muhen du, ne mom wen gfaen du. Nim kdê gónón gbeteng ni kemteng du elem hatay laen kô dù tul sónen.

1 Pitér 1:22

Lemwót bè yóm deng kimón ye yóm ktahuhen, deng ye baling mólós ne, ne deng wen ne yóm tahu kesbong ye nawa. Hol hewót ye lem nawa ye yóm kesbong ye nawa yó.

Matyu 10:16

“Ngem,” mon Jisas, “bè nim khógówu kuy ni, lómón ke ubiha mógów elem blóng tu kem lóbô lem bnes boluyen wolf. Hol ye hfulung temgama, lómón yóm kul khulung temgama yó kem ulal. Ne hol hninggel ye knawa ye, lómón yóm kul klinggel knawa yó kem obun.

1 Tisalunika 5:15

Hol ten-gama ye anì laen dù malà du sidek ke wen sidek nmò le bélê ye. Yó dé hol nmò ye, henyu ye kmò ye ebè yó kem dumu ye deng hemtahu dalang se ebè kdéen tau.

Kun Snulat Luk 24:25

Ne bud mudél ebélê le Jisas, monen mò kul, “Tey kem tau là hulung hedem nim yu. Tey mima bélê ye hemtahu du kdê yó kem tehe gel tulón yó kem gna tugod Dwata ekni.”

Glasya 3:3

Bê ye mom hbakà dé. Yóm kbut kehtahu ye, tódô lemwót bè yóm Tulus Dwata. Okóm ni, ofo kuy mon du kô ke gbek ye hemdeng du lemwót bè yóm kuy kegbek? Là kô gbek ye du.

Job 2:10

Bnalà Job se, monen, “Kudél libun nungel. Bè yóm klawihen wen hyu blay Dwata kut tey kehmóyô te du. Moen se ke tô te tmalaw ke henwiten tu sidek?” Balù yóm deng tey kwen hlayam Job, ewenem laen kô dù udél sidek btang bè sumóngen.

Hibru 12:25

Duhen yó, hol tekuy temgama. Hol bê tekuy là hnungol ke mudél ebélê tekuy Dwata. Ngem yó dé kem tehe tau gnan ekni, tey kegtafak le lan le là hmungol yóm udél Dwata hlanen bè Musis ekni dini te tonok. Sélét mom tekuy ne là megtafaken ke knogol tekuy yóm mudél ebélê tekuy gu bè longit.

Matyu 27:24

Timbow ton Paylét yóm là kegbeken hewà ke Jisas, ne dilóen bè yó kem tey tau sbung bè yó wen tô sidek nmò le béléen ke là nmungen du yóm kul knóyô, yó gónón tódô ma él, ne noloben tdoken lem mata le, monen mò kul, “Laen dù dou du bè yóm khatay ye du nim tau ni. Tódô kuy nbô yóm kgamà litóen.”

Deng Hegfan 19:10

Botonge tódô hegluduk klohok tihen lanu tô dmóyón du, okóm mom yó monen mò do, “Bê. Béem nmò yó. Tódô senged kut fen gel tóbóng lówó Dwata. Dalang se yó kem dumuhem setwoli là mkó du nawa yóm ktahuhen tehe gel tolok Jisas kul. Olon Dwata dé hol dóyónem.” Yakà ktahuhen du yóm tehe tolok Jisas, yóm ktahuhen yó tehe gel htulón Dwata yó kem tugoden ekni.

Matyu 8:4

Mon Jisas mò du, “Hol béem abay tulón yóm deng nmou béléem ni. Tódói hekteng mógów ebè tum tau gel demsù ebè Dwata, nam e hetngel du lówóhem. Elesi se mit mò dsuem anì nmoem yóm sotu hlau Musis ekni mò gónó le milô du kem dumu tau yóm deng kkó yóm desem.”

Ifisus 5:33

Okóm gbak ebè yó kem tau syehen snéen. Ket logi, yake hol kenbong nawahen yóm kun tuha libun, lómón se yó nem kbong nawahen yóm kun knô. Ne yu kem libun, hol nadat ye yóm kuy tuha logi.

2 Samwél 24:10

Kogol yóm deng gotu kehlista Dabid boluy yó kem tau, gefet béléen yóm ksidek kegnómen du bè yóm nmoen yó, ne yó monen mò ke Dwata, “Ó Dwata, denge tey gemsalà béléem bè yóm deng nmou ni. Hol hnifótem ou bè nim tey ungel nmou ni.”

Kulasi 1:9

Yó gónóm mon, lemwót bè yóm kungol me du yóm kehtahu ye, là kóen skó yóm tendo gel kni me bélê ye bè Dwata. Yó gel hni me béléen anì hol hetngónen kuy yóm kun kóyô, hlanen bè yóm khulung hedem ne yóm khulung milô gel blayen tekuy yóm kun Tulus.

Glasya 3:1

Tey ye bakà, kem tau bè Glasya. Tau du de yóm deng gónó ye tawan? Igò me deng tehe hegtukul du bélê ye muhen yóm katay Jisas Krays bè kros.

Matyu 27:4

Mon Judas, “Tey kegsalau. Deng mom hekfóu yóm tau laen kô dù salaen anì hnatay le.” Bnalà le se, mon le, “Laen kô dù bud kum hentngón du ne yóm monem yó. Tódô kóm ne yó.”

Matyu 25:2

Limu bélê le yóm là hulungen hedem, ne limu se hulung hedem.

Kem Lingón 73:22

Tey là hyuhen tum kehedemu tu, lómón tóe knawa ógóf, laen dù tngónu. Là dog naw hentukul du yóm kóm kmò.

Kem Udél Hlalak Tehe Selumun 15:21

Yóm tau là hulungen hedem hligal du se kun yóm kbooken, okóm yóm tau hulung temnef hentedengen kmoen.

Ifisus 5:2

Yóm gel kmò ye bè kem dumu ye, hol hewót ye bè yóm kesbong nawa. Henkna ye bè Krays dé bè yóm kbong nawahen tekuy. Gloken tódô hamà yóm kun klowil bélê tekuy mò dsuen ebè Dwata. Yóm dsuen yó, hol lómón ke yóm boo alì minggel mbel ebè Dwata, ne tey gsengel nawahen du.