Ifisus 3:9 - Udél Dwata: Gna Kesfasad ne Lomi Kesfasad

⁹ Bud sigangen tahu snéen yóm kmò kwit Dwata du yóm tehe atul bunihen ekni. Deng tehe bunihen nim ni lemwót bè hol kbuten, yó se kun kmò kehlan du Dwata, yóm tehe dmimun yóm kentihen.

Ifisus 3:9 Referans Kwoze

Kulasi 1:26

yóm tulón tehe bunihen bè yó kem kdéen tau gnan ekni, okóm deng hegfanen ni kmoen ni bè yó kem kun tau.

Matyu 13:35

Ni se deng gónón dohò yóm udél yóm sotu tau tugod Dwata ekni, yóm monen, “Angat gel hningónu yó kem gel tulónu kul. Angat tulónu kul yó kem tehe là deng tngón le du lemwót bè hol kbut benwu.”

2 Timuti 1:9

Deng lenwà Dwata tu gu lem hatay, ne tnabahen tu anì baling te kun tau. Sundu ke bè yóm hyu deng nmò te gónón lemwà kut, kaem tódô lemwót bè yóm kun kóyô tmóbóng kut. Yóm któbóngen kut yó, hlanen bè Krays Jisas gu laanen là deng dmimun du nim benwu ni.

Kulasi 3:3

Abay se hol lómón ke deng tekuy gomong matay bè yóm tehe katay Krays, ne wen lomi klowil tekuy là dengen gfan he nô ditu bè Krays, bè hol gónóhen nô Dwata.

Matyu 28:19

Yó gónóm mon, mógów ye do ebè kdéen but tau bè klamangen benwu anì baling le tau lemolò do. Bnabtays ye lu hlan ye bè boluy Dwata, yóm Mà tekuy, ne bè boluy yóm Ngaen ne bè boluy yóm Tulusen.

Isaya 44:24

Ou se yóm Dwata gónó ye mogot yóm lemwà kuy. Ou se yóm Dwata deng mò kuy. Ou yóm hol gónó ye mogot, yóm dmimun yóm kentihen. Tek són ou tehe hnal yó kem longit seglafin. Ne bè yóm tehe kedlimunu tonok, laen kô tmóbóng do.

Kem Lingón 33:6

Yóm tehe kedlimun Dwata yó kem longit seglafin, tódô lemwót bè udélen. Bud lemwót bè udélen snéen yóm tehe kedlimunen yóm kdaw ne bulón ne yó kem blotik.

Deng Hegfan 4:11

“Tek són u yóm kum gónó mogot, yóm kum Dwata. Uu se yóm knóón bang sendóyón lemwót bè kegetahem ne lemwót bè kfasangem. Yakà uu du yóm deng dmimun yóm kentihen, ne tódô lemwót bè kóm kóyô yóm kedlimunem kul, ne yóm kehlowilem kul.”

Taytus 1:2

Yó hol nefeten nim kehtahu tekuy ni, duhen yóm klowil laen dù sónen tendo hendón te. Nim klowil ni, tehe deng fasad Dwata tekuy hnikót là deng dlimunen du he yóm benwu, ne laen kô kéngen yóm Dwata fmasad du yó.

1 Timuti 3:16

Laen kô dù tau gembek hemkéng du yóm tey kehyuhen yóm deng hegfan Dwata bélê tekuy, yóm deng hentahu tekuy. Tehe tódô hbaling tau yóm Ngà Dwata, ne yóm Tulus Dwata fen hdilô du bè kem tau. Gotu ton yó kem hógów Dwata nô bè longit. Ne sentbong yó kem tau bè klamangen benwu, ne wen se bè yó kem hmungol du hemtahu du. Ne ominen haway etta bè longit.

Deng Hegfan 13:8

Tódô kdéen tau te tonok gotu hemtahu béléen yóm ógóf lóbô yó. Són olo là hemtahu béléen, són yó kem tau deng gsulat boluy le bè yóm bok lowil, yóm kun bok yóm Ngà Ubiha tehe hnatay le. Deng eles gotu snulaten ne boluy yó kem tau wen klowil laen dù sónen gu laanen là deng dmimun du yóm kentihen.

1 Pitér 1:20

Deng eles nélék Dwata ne gu laanen là deng dmimun du yóm benwu, okóm ni ne yóm khógówen du ete tonok mò tmóbóng tekuy.

2 Timuti 4:17

Okóm yóm gónó tekuy mogot, là kô bayaen dou, ne du fen temgel nawahu anì hol gotu gtulónu yó kem tau là Ju le bè yó yóm mò lan le gewà gu lem hatay. Ne deng lenwà Dwata ou bè yóm tô khatay le do.

2 Tisalunika 2:13

Okóm kuy, kem dumu me setwoli, kem tau kenbong nawa yóm gónó tekuy mogot, là gbek me du ke là gel dóyón me ke Dwata lemwót bélê ye. Abay se tehe yu ekni bè hol kbut yóm benwu, deng eles nélék Dwata yu ne anì lenwaen yu gu lem hatay. Yó kmò kehewaen kuy, hlanen bè kun kfasang yóm Tulusen mò hembaling kuy kun tau hol mólós, ne bud hlanen snéen bè yóm deng kehtahu ye yóm ktahuhen.

Kulasi 1:23

Song tahu eta ye nim ni ke là monol nawa ye bè yóm kehtahu ye. Yó gónóm mon, hbegel ye yóm kehtahu ye anì là sliwo kehedem ye du yóm hendón nefet nawa ye lemwót bè yóm Tulón Hyu deng gungol ye. Nim Tulón Hyu monu ni, deng gefet bè kdéen tau bè klamangen benwu ne, ne ou Pol sotu tóbóng lówó Dwata mò fen heglalag du.

Ifisus 1:4

Gu laan Dwata là deng dmimun du he yóm benwu, deng kem gegna ne yóm kéléken tekuy mò kun tau, hlanen bè yóm deng kessotu tekuy bè Krays. Yó gónón mélék tekuy anì henbalingen tekuy kem tau mólós, kem tau laen dù belenen bè ktonen tekuy.

1 Kurin 2:7

Yóm ketngón gel toloku ni, yó se yóm ketngón Dwata tehe gbuni bè kem tau gnan. Okóm gu laan Dwata là deng dmimun du yóm benwu, deng sana eles tngónen yóm kmò kehlanen du bélê tekuy yóm ketngónen yó anì wen klowil tekuy laen dù sónen.

Kul Nmò 15:18

Ni se udél Dwata. Tehe yu ne ekni eles kehetngónen du nim ni.’

Kun Snulat Jan 10:30

Tódô me ssotu Mà.”

Kun Snulat Jan 5:19

Bud mon Jisas mò kul, “Tódô tulónu kuy ktahuhen, laen kô gmoen yóm Ngà ke són du, ke là wen Maen. Yó se gel tonen nmò Maen, yó se kun nmò yóm Ngà.

Kun Snulat Jan 5:17

Okóm yó balà Jisas kul, monen, “Yóm Mà, senflósen mò nmò, là kóen hegnô. Senged se dou, tódô senflósu mò nmò.”

Kun Snulat Luk 24:47

Lemwót bè kun boluy, wen lan Dwata hmifót salà yó kem tau deng hegsel.’ Ni se,” monen, “yóm tulón angat hlós sensból ye bè klamangen benwu. Bè ni bè Jirusalim gónó ye mbut hból du.

Matyu 25:34

Angat monen mò yó kem nô bè kwananen yóm Hol Geta yó, ‘Géhél ye ne, yu kem tau deng tendo gel tnóbóng Mà. Hlós ye ebè yóm benwu deng tehe eles hentifesen bélê ye lemwót bè hol kbut benwu.

Matyu 10:27

Bè yó kem gel tulónu kuy ke kifu, hol bud tulón ye ke kemdaw. Bè yó kem deng gel tulónu kuy sónen yu, hol bud tulón ye bè kdéen tau.

Deng Hegfan 17:8

Yóm ógóf lóbô tonem yó, tehe mowil te tonok, okóm deng matay. Bede móyón bud sut ne ni lemwót gu lem yóm tey sol leyóng. Okóm bè yóm ksuten, angat tudà le elem lanaw ofi mò sónen. Angat tey kehtaw le du yó kem tau te tonok bè yóm kton le du. Hentaw le, abay se tehe mowil, ominen matay, ne ni bud sut. Yó kem tau hemtaw du yó, duhen yó se kem tau là gsulaten yóm kul boluy bè yóm bok lowil tehe snulat le gu laanen là deng wen benwu he.

Deng Hegfan 14:6

Kogolen bè yó, tódô tonu yóm sotu hógów Dwata móyóng hegeta te kmawang. Yó nmoen, tulónen yóm Tulón Hyu laen dù sónen lemwót bè Dwata. Tódô kentihen tau bè klamangen benwu gónón e gefet yóm tulónen yó, tódô gefet bè ket but tau, bè ket kay udél, ne bè ket ból tau.

Sulat Pol Ebè Yó Kem Tau Hemtahu Bè Rom 11:25

Bud wen tulónu kuy, kem dumuhu setwoli, bè yóm nmò Dwata tehe là glileb kem tau du anì là hegmón ye du yóm deng nmò Dwata bélê ye. Yóm kgel kulu yó kem tau Israél, là kóen hlós. Okóm ke deng le gotu hemtahu bè Dwata yó kem tau là Ju le, yó he angat kkóhen yóm kgel kulu le yó.

Ifisus 3:2

Déke deng gungol ye ne yóm deng ksigang Dwata du tahu nim nmò ni mò gónóhen tmóbóng kuy.

Ifisus 6:19

Ne hol gel utóm ye ou snéen bè yóm gel kni ye anì benlay Dwata ou khulung tmolok, ne anì laen dù klikou heglileb du bè kem tau yóm Tulón Hyu tehe gbuni bélê le.

Kulasi 4:3

Ne hol gel utóm ye mi snéen bè yóm gel kni ye anì wen lan nmò Dwata mò gónó me hetngón du bè yó kem dumu tau yóm tehe bunihen bélê le, duhen Krays. Yakà ni du buten yóm gónó le bmanggù do.